គណៈវិស្វករកម្ពុជាជំរុញវិស្វករគ្រប់មុខជំនាញចាំបាច់ត្រូវចុះបញ្ជី
ភ្នំពេញ៖ គណៈវិស្វករកម្ពុជា បានស្នើ និងជំរុញជាថ្មីម្តងទៀត ឱ្យវិស្វករគ្រប់មុខជំនាញវិជ្ជាជីវៈវិស្វកម្មទៅចុះបញ្ជីនៅគណៈវិស្វករកម្ពុជាជាចាំបាច់ ព្រោះបើគ្មានចុះបញ្ជីឈ្មោះ វិស្វករនោះ នឹងមិនអាចទទួលគោរមងារជាវិស្វករអាជីពជាតិ វិស្វករអាស៊ាន ឬវិស្វករអាជីពឆ្នើមអាស៊ានបាននោះទេ។
ការជំរុញជាថ្មីម្តងទៀតនេះ ខណៈបច្ចុប្បន្នចំនួនវិស្វករដែលមកចុះបញ្ជីនៅមានកម្រិតនៅឡើយ ទោះខាងគណៈវិស្វករកម្ពុជាបានខិតខំផ្សព្វផ្សាយអំពីបញ្ហានេះបែបណាក្តី។
អគ្គលេខាធិការគណៈវិស្វករកម្ពុជា លោក លឹម សុថាវ បានប្រាប់ KHB Media ថា គណៈវិស្វករកម្ពុជាមានតួនាទីប្រមូលផ្តុំ និងគ្រប់គ្រងវិស្វករទូទាំងប្រទេស ក្នុងគោលបំណងបណ្តុះបណ្តាលពង្រឹងសមត្ថភាពបច្ចេកទេស ស្របតាមកាលៈទេសៈនៃវិទ្យាសាស្ត្របច្ចេកទេសជឿនលឿនបច្ចុប្បន្ន និងទៅអនាគត ដើម្បីធានាគុណភាពវិស្វកម្មរបស់វិស្វករជាតិប្រកបការងារសេវាវិស្វកម្មនេះ។
លោកបានពន្យល់ថា មូលហេតុដែលវិស្វករទាំងជាតិ និងអន្តរជាតិ កំពុងបម្រើការនៅកម្ពុជាចាំបាច់ត្រូវចុះបញ្ជីនៅគណៈវិស្វករកម្ពុជា ព្រោះមានគុណប្រយោជន៍ច្រើន អាចក្លាយជាវិស្វករស្របច្បាប់ មានសិទ្ធិដាក់បេក្ខភាពរបស់ខ្លួនសម្រាប់ទទួលគោរមងារជាវិស្វករអាជីពជាតិ និងវិស្វករអន្តរជាតិ ក្នុងតំបន់អាស៊ាន ព្រមទាំងមានសិទ្ធិបើកក្រុមហ៊ុនស្របច្បាប់ពេលទទួលគោរមងារជាវិស្វករអាជីពជាតិ។ មិនតែប៉ុណ្ណោះ ការចុះបញ្ជីនៅគណៈវិស្វករកម្ពុជាអាចជួយឲ្យវិស្វករទាំងអស់ មិនប្រឈមនឹងការផាកពិន័យតាមប្រព័ន្ធច្បាប់ថែមទៀត។
បន្ថែមលើនេះ កាលណាវិស្វករទាំងអស់បានចុះបញ្ជីរួចរាល់ ពួកគេក៏មានឱកាសទទួលបានការបណ្តុះបណ្តាលជំនាញវិជ្ជាជីវៈបន្ថែម ដែលគណៈវិស្វករកម្ពុជានឹងរៀបចំតាមវគ្គបណ្តុះបណ្តាលរយៈពេលខ្លី រយៈពេលវែង និងតាមរយៈសិក្ខាសាលានានាជាដើម។
ទាក់ទងនឹងបញ្ហានេះ រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ លោក ពេជ សោភ័ន ក៏បានលើកទឹកចិត្តឲ្យវិស្វករដែលកំពុងបម្រើការងារនៅតាមស្ថាប័នរដ្ឋ ឱ្យមកចុះបញ្ជីវិស្វករនៅគណៈវិស្វករកម្ពុជា ដើម្បីទទួលបានជាគោរមងារ ពិសេសមានឱកាសផ្លាស់ទីធ្វើការងារស្មើមុខស្មើមាត់ជាមួយប្រទេសក្នុងតំបន់ និងពិភពលោក។ លោកថា មុននឹងគណៈវិស្វករកម្ពុជាទទួលចុះបញ្ជីវិស្វករនីមួយៗត្រូវឆ្លងកាត់ការត្រួតពិនិត្យ និងវាយតម្លៃផ្នែកគុណវឌ្ឍដោយភាពប្រាកដប្រជា រួចទើបស្ថាប័នជំនាញនេះសម្រេចលទ្ធផលតាមក្រោម។
រហូតបច្ចុប្បន្នមានវិស្វករជាង៤ពាន់នាក់ហើយ ដែលបានមកចុះបញ្ជីនៅគណៈវិស្វករកម្ពុជា ក្នុងនោះមានទាំងវិស្វករដំបូង វិស្វករអាជីព វិស្វករបរទេស វិស្វករអាស៊ាន វិស្វករអាជីពឆ្នើមអាស៊ាន វិស្វករអាស៊ានវ័យក្មេង និងវិស្វករកិត្តិយសអាស៊ានជាដើម។
ផ្អែកតាមការសិក្សារបស់អង្គការជប៉ុន JICA ដែលធ្វើការនៅកម្ពុជាកាលពីពេលថ្មីៗនេះ បានបង្ហាញថា ចាប់តាំងពីឆ្នាំ២០១៨ ដល់ឆ្នាំ២០២០ កម្ពុជាត្រូវការកម្លាំងវិស្វករប្រមាណ ៣៥,០០០នាក់ សម្រាប់បម្រើការងារក្នុងវិស័យឧស្សាហកម្ម កម្មន្តសាល សំណង់ កសិកម្ម សេវាកម្ម ទេសចរណ៍ និងអចលនទ្រព្យក្នុងប្រទេស។ ដូច្នេះគ្រប់ភាគីពាក់ព័ន្ធនៅតែអំពាវនាវឲ្យវស្វករខ្មែរ និងវិស្វករបរទេសទាំងអស់បម្រើការនៅកម្ពុជា ដែលមិនទាន់មកចុះបញ្ជី គប្បីរួសរាន់មកចុះបញ្ជីជាមួយគណៈវិស្វករកម្ពុជា ដើម្បីទទួលបានអត្ថប្រយោជន៍ ហើយបង្កើនប្រសិទ្ធភាពការងាររបស់ខ្លួន៕
