CVEA នាំយកគន្លឹះសំខាន់ចំនួន៣ លើវិស័យអចលនទ្រព្យនៅអាមេរិក មកអភិវឌ្ឍន៍វិស័យអចលនទ្រព្យនៅកម្ពុជា
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA) លោក ច្រឹក សុខនីម បានឱ្យដឹងថា CVEA នឹងនាំយកចំនុចសំខាន់ៗ ចំនួន៣ ដែលបានរៀនសូត្រពីកិច្ចប្រជុំនៅសហរដ្ឋអាមេរិក ដើម្បីជំរុញការអភិវឌ្ឍវិស័យអចលនទ្រព្យនៅកម្ពុជាឱ្យកាន់តែមានសក្តានុពល និងយូរអង្វែង។
ការលើកឡើងពីសំណាក់ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នៅពេលនេះ គឺក្រោយពេល ដែលរូបលោកនិងសមាជិកសមាគមចំនួន២៣នាក់ ត្រឡប់ ពីចូលរួមសន្និសីទ និងពិព័រណ៍ប្រចាំឆ្នាំរបស់សមាគមជាតិអ្នកវាយតម្លៃអចលនទ្រព្យសហអាមេរិក(NAR)នៅទីក្រុងសេនហ្រ្វេនស៊ីស្កូ សហរដ្ឋអាមេរិកកាលពីពេលថ្មីៗនេះ។
ថ្លែងប្រាប់ KHB Media ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោក ច្រឹក សុខនីម បានឲ្យដឹងថា ការចូលរួមសន្និសីទនេះ គឺក្នុងគោលបំណងបង្កើនទំនាក់ទំនង និងកិច្ចសហប្រតិបត្តិការអន្តរជាតិ ជាពិសេសពង្រីកការវិនិយោគលើវិស័យអចលនទ្រព្យឱ្យកាន់តែរីកចម្រើនថែមទៀតជាមួយនឹងក្រុមហ៊ុនកម្ពុជា និងសហរដ្ឋអាមេរិក ពិសេសពីបណ្តាប្រទេសជិត៨០ទៀតមកពីជុំវិញពិភពលោកដែលចូលរួមសន្និសីទនោះ។
តាមរយៈបទពិសោធន៍នៃការចូលរួមសន្និសីទនេះដែរ លោកប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានអះអាងថា សមាគមអាចរៀនសូត្របានច្រើនពីចំនុចអភិវឌ្ឍន៍វិស័យអចលនទ្រព្យពីសហរដ្ឋអាមេរិក។ ប៉ុន្តែលោកថា ចំនុច៣សំខាន់ ដែលសមាគមនឹងយកពីសន្និសិទនៅអាមេរិក មកអភិវឌ្ឍន៍វិស័យអចលនទ្រព្យកម្ពុជា នោះគឺ៖ ចំណេះដឹងបច្ចេកវិទ្យា និងភាពជោគជ័យក្នុងវិស័យអចលនទ្រព្យរបស់សហរដ្ឋអាមេរិក។
លោកថា សមាគមជាតិអ្នកវាយតម្លៃអចលនទ្រព្យសហអាមេរិក(NAR) បានចែករំលែកមកកាន់កម្ពុជាថា ដើម្បីអនុវត្តន៍ចំនុចសំខាន់ៗទាំង៣ មានប្រសិទ្ធភាពក្នុងវិស័យអចលនទ្រព្យកម្ពុជា ជាយុទ្ធសាស្រ្តសំខាន់ គឺអ្នកវិនិយោគសហរដ្ឋអាមេរិក បានជំរុញឱ្យកម្ពុជា ចាំបាច់ត្រូវបង្កើន និងពង្រឹងសមត្ថភាពធនធានមនុស្សក្នុងវិស័យនេះឱ្យខ្លាំង ឲ្យមានសក្តានុពលពេញលេញនិងមានវិជ្ជាជីវៈជាមុនសិន។ នេះបើតាមការបញ្ជាក់របស់ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។
លោកបន្តថា សហរដ្ឋអាមេរិក គឺជាប្រទេសដែលមានធនធានមនុស្សច្រើន ហើយអចលនទ្រព្យវិញ គឺគេប្រើប្រាស់បច្ចេកវិទ្យាយ៉ាងទូលំទូលាយ ហើយផ្តល់ទំនុកចិត្តខ្លាំងដល់អ្នកវិនិយោគ ដែលជាហេតុជួយឲ្យសហរដ្ឋអាមេរិកអភិវឌ្ឍន៍លឿនឆាប់រហ័សបែបនេះ ។
លោកបញ្ជាក់ថា ចំនុចទាំង៣ ដែលរួមមាន៖ ចំណេះដឹង បច្ចេកវិទ្យា និងភាពជោគជ័យក្នុងវិស័យអចលនទ្រព្យរបស់សហរដ្ឋអាមេរិក CVEA នឹងចែករំលែកចំណេះដឹងនិងបទពិសោធន៍ដែលទទួលបាននេះ តាមរយៈកិច្ចប្រជុំ សិក្ខាសាលា សន្និសីទ និងវគ្គបណ្តុះបណ្តាលនានា ទៅកាន់អ្នករកស៊ីក្នុងវិស័យអចលនទ្រព្យកម្ពុជា។
គួរបញ្ជាក់ថា ក្រុមអ្នកជំនាញ មកពីបណ្តាប្រទេសជិត៨០ ដែលចូលរួមកម្មវិធីសន្និសីទ និងពិព័រណ៌ប្រចាំឆ្នាំរបស់សមាគមជាតិអ្នកអចលនទ្រព្យរបស់សហរដ្ឋអាមេរិក ក៏បានសន្យានឹងបន្តជួយកម្ពុជា តាមរយៈការចែករំលែកចំណេះដឹង បទពិសោធន៍ និងផ្តល់វគ្គបណ្តុះបណ្តាលពីវិស័យអចលនទ្រព្យទៅកាន់សមាគម CVEA ដើម្បីពង្រីកសក្ដានុពលអចលនទ្រព្យកម្ពុជាទៅកាន់ពិភពលោកផងដែរ៕