បច្ចុប្បន្នកម្ពុជាពឹងផ្អែកលើវិស័យអ្វីខ្លះដើម្បីជំរុញកំណើនសេដ្ឋកិច្ចជាតិ ?
ក្នុងបរិបទនៃការអភិវឌ្ឍប្រទេស ក៏ដូចជាជំរុញកំណើនសេដ្ឋកិច្ចជាតិមួយរយៈកាលកន្លងមក កម្ពុជាតែងពឹងផ្អែកលើវិស័យកសិកម្មជាស្នូលដ៏សំខាន់ ប៉ុន្ដែសព្វថ្ងៃនេះ កម្ពុជាបានប្រែខ្លួនបន្តិចម្តងៗចេញពីការលែងពឹងផ្អែកទាំងស្រុងលើវិស័យកសិកម្មទៀតហើយ ។ ដូច្នេះ ដើម្បីជំរុញសេដ្ឋកិច្ចជាតិ តើកម្ពុជាងាកមកពឹងផ្អែកលើវិស័យអ្វី ?
អ្នកជំនាញមកពីក្រុមប្រឹក្សាអភិវឌ្ឍន៍កម្ពុជា (CDC) ដែលជាសេនាធិការរបស់រដ្ឋាភិបាល បញ្ជាក់ថា បច្ចុប្បន្នកម្ពុជាបានឈានផុតពីប្រទេសពឹងផ្អែកទាំងស្រុងទៅលើវិស័យកសិកម្ម មកពឹងផ្អែកលើទេសចរណ៍ ព្រោះវិស័យនេះកំពុងមានសកម្មភាពវិនិយោគកើនឡើង និងលេចធ្លោជាបន្តបន្ទាប់ បើគិតចាប់ពីឆ្នាំ២០១៦ រហូតមកដល់សព្វថ្ងៃនេះ។
លោក ជា វុទ្ធី អគ្គលេខាធិការរង គណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា មានប្រសាសន៍ក្នុងនៅក្នុងសន្និសីទសារព័ត៌មាន ស្តីពី សក្តានុពលនៃការវិនិយោគនៅក្នុងព្រះជាណាចក្រកម្ពុជា ដែលរៀបចំឡើង នាទីស្តីការគណៈរដ្ឋមន្រ្តី កាលពីពេលថ្មីៗនេះថា បើគិតចាប់ពីឆ្នាំ២០១៦ រហូតមកដល់ខែសីហាឆ្នាំ២០១៩នេះ គឺកំណើននៅក្នុងវិស័យទេសចរណ៍ បានកើនខ្ពស់ជាងវិស័យកសិកម្មហើយ មានន័យថា កម្ពុជាយើងបានចាកផុតពីប្រទេសដែលពឹងផ្នែកទាំងស្រុងទៅលើវិស័យកសិកម្ម ក្លាយទៅជាប្រទេសពឹងផ្អែកលើវិស័យកសិ-ទេសចរណ៍វិញ។
អគ្គលេខាធិការរង នៃក្រុមប្រឹក្សាអភិវឌ្ឍន៍កម្ពុជារូបនេះបញ្ជាក់ថា នៅពេលប្រទេសមួយបានឈានផុតពីប្រទេសកសិកម្ម បានន័យថា ប្រទេសនោះមានកំណើនសេដ្ឋកិច្ចខ្ពស់គួរសម មិនតែប៉ុណ្ណោះនេះជាបរិយាកាសថ្មីមួយទៀតដែលប្រទេសកម្ពុជាមិនត្រូវពឹងផ្អែកទាំងស្រុងទៅលើកសិកម្មទេ ត្រូវឈានចាប់យកចំណុចមួយៗ ដែលជាឱកាសនៃវិស័យទេសចរណ៍មានកំណើនខ្ពស់ ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ដោយឈរលើមូលដ្ឋាននៃសុខសន្តិភាព និងស្ថិរភាពនយោបាយយ៉ាងរឹងមាំ ក្នុងរយៈពេលជាងពីរទស្សវត្សរ៍ចុងក្រោយនេះ កម្ពុជាសម្រេចបាននូវកំណើនសេដ្ឋកិច្ច ប្រចាំឆ្នាំជាមធ្យមក្នុងរង្វង់ ៧,៧% ហើយបានចាកចេញពីឋានៈ ជាប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប ក្នុងឆ្នាំ២០១៥។
របាយការណ៍ដដែលបានឱ្យដឹងបន្ថែមទៀតថា កំណើនសេដ្ឋកិច្ចកម្ពុជា បច្ចុប្បន្នពិតជាមិនអាចខ្វះបានចំពោះវិស័យធំៗទាំងនេះបានឡើយ ពោលបើគិតចាប់ពីឆ្នាំ២០១៦ រហូតមកប្ចុប្បន្ននេះ សកម្មភាពវិយោគដែលលេចធ្លោជាងគេ គឺវិស័យទេសចរណ៍ដែលមានប្រមាណ៤៧% វិស័យហេដ្ឋារចនាសម្ព័ន្ធប្រមាណ២៤%, វិស័យឧស្សាហកម្ម និងកម្មន្តសាល ២៣%, និងវិស័យកសិកម្ម និងកសិ-ឧស្សាហកម្ម ៦% នៃទំហំវិនិយោគសរុប។
ជាមួយគ្នានេះដែរ ក្នុងរយៈពេល៨ខែដើមឆ្នាំ២០១៩ ចំនួនគម្រោងវិនិយោគក្នុងវិស័យឧស្សាហកម្ម និងកម្មន្តសាលមានការកើនឡើងខ្លាំង ខណៈទុនវិនិយោគក្នុងវិស័យទេសចរណ៍មានការកើនឡើង ជាគំហុកប្រមាណ៩៥% បើធៀបនឹងរយៈពេលដូចគ្នាក្នុងឆ្នាំ២០១៨។ដោយឡែក តួរលេខវិនិយោគក្នុងវិស័យកសិកម្មនិងកសិ-ឧស្សាហកម្ម និងវិស័យហេដ្ឋារចនាសម្ព័ន្ធនិងផ្សេងៗមានការ ថយចុះ។
យ៉ាងណាបើទោះ ជាសេដ្ឋកិច្ចកម្ពុជា បច្ចុប្បន្នពឹងផ្អែកច្រើនលើវិស័យទេសចរណ៍ខ្លាំងជាងគេក្តី ក៏បារាជរដ្ឋាភិបាលសម្រេចដាក់ចេញនូវយុទ្ធសាស្ត្រគន្លឹះធំៗចំនួន៤ ដែលគន្លឹះសំខាន់មួយនោះ គឺការកៀងគរ និងទាក់ទាញការវិនិយោគផ្ទាល់ពីបរទេស និងវិនិយោគឯកជនក្នុងស្រុក ដោយផ្តោតលើវិស័យឧស្សាហកម្មធំៗ, ការអភិវឌ្ឍទីផ្សារ និងការអភិវឌ្ឍ/ផ្ទេរបច្ចេកវិទ្យាជាដើម ដើម្បីជម្រុញអភិវឌ្ឍន៍វិស័យស្នូលរបស់កម្ពុជាដែលកំពុងធ្លាក់ចុះផងដែរ៕
