គណៈវិស្វករកម្ពុជា ជូនដំណឹងឲ្យវិស្វករចុះឈ្មោះចូលរួមវគ្គបណ្តុះបណ្តាលពីច្បាប់សំណង់លើកទី២
អគ្គលេខាធិការគណៈវិស្វករកម្ពុជា បានជូនដំណឹងជាថ្មី ដល់វិស្វករចុះបញ្ជី និងវិស្វករអាជីព ជំនាញសំណង់ស៊ីវិល និងជំនាញអគ្គិសនី នៃគណៈវិស្វករកម្ពុជា នៅទូទាំងប្រទេសដែលអវត្តមានមិនបានចូលរួមប្រជុំផ្សព្វផ្សាយស្ដីពី ច្បាប់សំណង់ ដែលបានប្រព្រឹត្តទៅកាលពីថ្ងៃទី ១៤ ខែមករា ឆ្នាំ២០២០ កន្លងមកនៅសណ្ឋាគារសុខាភ្នំពេញជ្រោយចង្វា ឱ្យចូលរួមវគ្គទី២ទៀតដែលនឹងប្រព្រឹត្តទៅនៅថ្ងៃទី ១៣ ខែកុម្ភៈ ឆ្នាំ២០២០ ខាងមុខនេះ។
អគ្គលេខាធិការគណៈវិស្វករកម្ពុជា លោក លឹម សុថាវ បានប្រាប់ KHB News ថា មូលហេតុដែលគណៈវិស្វករជូនដំណឹងជាថ្មី ព្រោះនៅមាន វិស្វករដែលចុះបញ្ជី និងវិស្វករអាជីព ជំនាញសំណង់ស៊ីវិល និងជំនាញអគ្គិសនី នៃគណៈវិស្វករកម្ពុជា បានអវត្តមានចូលរួមវគ្គបណ្តុះបណ្តាលពីច្បាប់សំណង់លើកទី១។
ហេតុនេះ ក្នុងនាមជាអគ្គលេខាធិការគណៈវិស្វករកម្ពុជា លោកសូមអំពាវនាវដល់ គ្រប់វិស្វករទាំងអស់ ទាំងជាតិ និងវិស្វករបរទេស នៃគណៈវិស្វករកម្ពុជា ចុះឈ្មោះឲ្យបានគ្រប់គ្នា ដើម្បីសិក្សាឲ្យបានស៊ីជម្រៅពីច្បាប់សំណង់ ដើម្បីធានាបាននូវសុវត្ថិភាព និងគុណភាពសំណង់នៅកម្ពុជា។
លោកបន្តថា វគ្គបណ្តុះបណ្តាលនេះ គឺពិតជាមានសារៈសំខាន់ សម្រាប់វិស្វករកម្ពុជា ដើម្បីបម្រើការងារលើវិស័យសំណង់ ព្រោះវិស្វករត្រូវគោរពច្បាប់ និងបទដ្ឋានបច្ចេកទេសសំណង់ដែលមាន នៅក្នុងច្បាប់នេះ។លោកថា វគ្គបណ្តុះបណ្តាលពីច្បាប់សំណង់លើកទី២ នឹងប្រព្រឹត្តទៅនៅថ្ងៃទី ១៣ ខែកុម្ភៈ ឆ្នាំ២០២០ នៅសណ្ឋាគារសុខាភ្នំពេញជ្រោយចង្វា។
ពាក់ព័ន្ធវគ្គបណ្តុះបណ្តាលពីច្បាប់សំណង់នេះដែរ ថ្លែងក្នុងវគ្គផ្សព្វផ្សាយច្បាប់ស្តីពីសំណង់សម្រាប់អ្នកវិជ្ជាជីវៈក្នុងវិស័យសំណង់ នាពេលថ្មីៗនេះ លោក ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ដើម្បីឲ្យការអនុវត្តច្បាប់សំណង់ ដែលទើបតែអនុម័ត និងដាក់ឲ្យប្រើប្រាស់ថ្មីៗនេះកាន់តែមានប្រសិទ្ធភាព និង ស័ក្តសិទ្ធភាព ក្រសួងរៀបចំដែនដី នគរូបនីយកម្ម និង សំណង់ នឹងធ្វើការបណ្តុះបណ្តលដល់សិស្សនិស្សិត និងវិស្វករ ក៏ដូចជាស្ថាបត្យករពីច្បាប់នេះ ចាប់ពីខែមករា រហូតដល់ខែមិនា ឆ្នាំ២០២០។
លោក ជា សុផារ៉ា ក៏បានអំពាវដល់អ្នកដែលពាក់ព័ន្ធក្នុងវិស័យសំណង់ ពិសេសសិស្សនិស្សិត និងវិស្វករ ក៏ដូចជាស្ថាបត្យករ ចូលរួមសិក្សាស្វែងយល់ និងធ្វើការផ្សព្វផ្សាយច្បាប់នេះឲ្យបានទូលំទូលាយនៅទូទាំងប្រទេស ដើម្បីប្រាកដថា ច្បាប់នេះត្រូវបានជ្រួលជ្រាបដល់បណ្តាភាគីពាក់ព័ន្ធទាំងអស់។
ក្រៅពីអំពាវនាវនេះ លោក ជា សុផារ៉ា ក៏បានបន្តក្រើនរំលឹកវិស្វករ និងស្ថាបត្យករនៅក្នុងវិស័យសំណង់ទាំងអស់ត្រូវតែគោរព បទដ្ឋានបច្ចេកទេស ស្តង់ដារសំណង់ឱ្យបានត្រឹមត្រូវ ដើម្បីធានាគុណភាព សោភ័ណភាព សុវត្ថិភាពសំណង់ជាដើម ។
ជាងនេះទៀត ក្រុមហ៊ុនឬវិស្វករ និងស្ថាបត្យករដែលទទួលបានវិញ្ញាបនបត្របញ្ជាក់ពីការធ្វើអាជីវកម្មលើវិស័យសំណង់ ត្រូវគោរពច្បាប់ និងបទដ្ឋានបច្ចេកទេសសំណង់ជាពិសេសត្រូវមានការទទួលខុសត្រូវនិងត្រួតពិនិត្យការដ្ឋានសាងសង់ឲ្យបានហ្មត់ចត់និងចៀសវាងការធ្វេសប្រហែសដែលអាចបង្កគ្រោះថ្នាក់ជាយថាហេតុ។
គួរបញ្ជាក់ដែរថា ច្បាប់សំណង់ ដែលបានសម្រេចដាក់ឲ្យប្រើប្រាស់ជាផ្លូវការ កាលពីថ្ងៃទី ៣ ខែ វិច្ចិកា ឆ្នាំ២០១៩ មានទាំងអស់២២ជំពូក និង១១១មាត្រា។ ច្បាប់នេះ ធ្វើឡើងក្នុងគោលបំណងពង្រឹងគុណភាព សន្ដិសុខ សុវត្ថិភាពសំណង់ ការពារទ្រព្យសម្បត្តិនិងសុខុមាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណជន។ ច្បាប់ថ្មីនេះ ក៏នឹងបង្កើនគណនេយ្យភាព និងប្រសិទ្ធភាពក្នុងការប្រកបការងារ និងការប្រកបវិជ្ជាជីវៈក្នុងវិស័យសំណង់ ព្រមទាំងបង្កើនការជឿទុកចិត្តរបស់វិនិយោគិននៅក្នុងវិស័យសំណង់ផងដែរ។
បើតាមការឲ្យដឹងពីគណៈវិស្វករកម្ពុជា បានឲ្យដឹងថា វគ្គផ្សព្វផ្សាយច្បាប់ស្តីពីសំណង់សម្រាប់អ្នកវិជ្ជាជីវៈក្នុងវិស័យសំណង់ ដែលរៀបចំដោយក្រសួងរៀបចំដែនដី នគរូបនីយកម្ម និង សំណង់ កាលពីថ្ងៃទី ១៤ ខែមករា ឆ្នាំ២០២០ កន្លងទៅ មានអ្នកចូលរួមជា វិស្វករចុះបញ្ជីនៅគណៈវិស្វករកម្ពុជា ចំនួន៣៤២រូប ក្នុងនោះវិស្វករសំណង់ស៊ីវិលចំនួន៣៣៦រូប និងវិស្វករអគ្គីសនីចំនួន៦រូប ខណៈមានវិស្វករដែលបានចុះបញ្ជីនៅគណៈវិស្វករកម្ពុជា ចំនួន ២ ២៨០រូប បានអវត្ថមាន មិនបានចូលរួមកាលពីវគ្គបណ្តុះបណ្តាលលើកទី១៕
