ដោយសារកង្វល់នៃការកើនឡើងកំដៅផែនដីឥតឈប់ឈរ ពិភពលោកបានងាកមកស្ថាបនាអគារដែលបង្ករផលប៉ះពាល់ដល់បរិស្ថានតិចតួច (អគារបៃតង) ក្នុងន័យរួមចំណែកកាត់បន្ថយផលប៉ះពាល់ដល់បរិស្ថាន និងផ្តល់ការសន្សំសំចៃដល់អ្នកប្រើប្រាស់អគារក្នុងរយៈពេលវែងផងដែរ។
នៅក្នុងចំណោមការអភិវឌ្ឍន៍សំណង់បែបបែតងជាច្រើននៅទូទាំងពិភពលោក អគារប្រភេទ LEED ត្រូវបានប្រសិទិ្ធនាមឡើង ដើម្បីលើកទឹកចិត្តឲ្យក្រុម ស្ថាប័ត្យករ និង ម្ចាស់អគារ ទាំងឡាយចូលរួមកាត់បន្ថយ ផលប៉ះពាល់ដល់បរិស្ថានជាអតិប្បរមា។ ដូច្នេះតើអ្វីគឺជាអគារ LEED ហើយអគារប្រភេទនេះមានសារៈប្រយោជន៍ដូចម្តេចខ្លះដល់បរិស្ថាន និង ម្ចាស់អគារ?
ខុសពីបច្ចេកវិទ្យាអគារបៃតងទាំងឡាយ ដែលផ្តោតជាទូទៅលើតែអគារណាដែលប្រើសំម្ភារៈដែលមាននិរន្តភាពដល់បរិស្ថាន សន្សំសំចៃថាមពល និងបង្ករផល ប៉ះពាល់ដល់បរិស្ថានតិចតួច សម្រាប់អគារប្រភេទ LEED រឺ អគារដែលនាំមុខគេលើការឌីហ្សាញពីថាមពល និង បរិស្ថាន (Leadership in Energy and Environment Design) គឺជាបច្ចេកវិទ្យា ដែលខ្ពស់ជាង និងទំនើបជាងបច្ចេកវិទ្យាបៃតងឆ្ងាយណាស់ ដោយសារស្តង់ដារនេះត្រូវបានបង្កើតឡើងដោយលក្ខណៈ ពិសេសជាច្រើនយ៉ាង និងរចនាឡើង ដើម្បីកាត់បន្ថយការប្រើប្រាស់ថាមពល និងកាត់បន្ថយផលប៉ះពាល់ដល់បរិស្ថានជាអតិបរមា។
សព្វថ្ងៃមានអគារជាច្រើននៅកម្ពុជាដែលប្រកាសថាខ្លួនជាអគារបៃតង ប៉ុន្តែមានតែអាគារមួយចំនួនតូចប៉ុណ្ណោះដែលទទួលបានវិញ្ញាបនប័ត្រទទួលស្គាល់កម្រិត LEED ដោយសារវាជាកម្រិតដែលខ្ពស់និងពិបាកក្នុងការបំពេញលក្ខខណ្ឌណាស់។
ស្តង់ដារអគារ LEED មាន៤កំរិត ដែលខុសគ្នាលើបរិមាណពិន្ទុទៅតាមកម្រិតនិមួយៗ។ កំរិតទី១ Certified (៤០-៤៩ ពិន្ទុ), កំរិតទី២ Silver (៥០-៥៩ ពិន្ទុ), កំរិតទី៣ Gold (៦០-៧៩ ពិន្ទុ) និងកំរិតទី៤ Platinum ( ៨០-១១០ ពិន្ទុ)។
នៅកម្ពុជា ការិយាល័យកណ្តាលរបស់ក្រុមហ៊ុន Bureau Veritas Cambodia គឺជាអាគារទី១ ដែលបានទទួលវិញ្ញាបនប័ត្រអគារដែលមិនប៉ះពាល់ដល់បរិស្ថានកម្រិត Platinum Certification ដែលបញ្ជាក់ថា ជាប្រភេទអគារ LEED ដែលខ្ពស់បំផុត។
អគារការិយាល័យដែលមានកម្ពស់៣ជាន់ ដែលស្ថិតក្នុងខ័ណ្ឌមានជ័យ រាជធានីភ្នំពេញ បានចាប់ផ្តើមសាងសង់ក្នុងឆ្នាំ២០១៣ និងបានបញ្ចប់ក្នុងឆ្នាំ២០១៤ ដែលមានតំលៃប្រហែលជា ៣លានដុល្លារអាមេរិក។ អគារនេះទទួលបាន វិញ្ញាបនប័ត្រ LEED កំរិតទី៤គឺ Platinum ក្នុងឆ្នាំ ២០១៣ ដោយទទួលបាន ៩០ពិន្ទុ ដែលចេញ ដោយ ទីស្តីការអគារបៃតងរបស់សហរដ្ឋអាមេរិក (U.S. Green Building Council (USGBC) ដែលជាស្ថាបនិកនៃកម្រិតស្តង់ដារអគារ LEED នេះឡើង។ ពិន្ទុដែល ក្រុមហ៊ុន Bureau Veritas ទទួលបានគឺខ្ពស់ជាងពិន្ទុ របស់អគារ Vattanac Capital Tower ដែលទទួលបានការបញ្ជាក់ LEED ត្រឹមកំរិត Gold ក្នុងឆ្នាំ២០១១ សំរាប់ ការអភិវឌ្ឍពាណិជ្ជកម្មដែលល្អបំផុតនៅឆ្នាំ២០១១។
ដោយបានចុះបញ្ជីនៅក្នុងផ្នែកការតុបតែងផ្ទៃខាងក្នុងរបស់អគារពាណិជ្ជកម្ម នៃស្តង់ដារ LEED ផ្ទៃខាងក្នុងរបស់អគារ បានបំពេញលក្ខខណ្ឌសំខាន់ៗ៧ យ៉ាងនៃ ស្តង់ដារ LEED ពីសមាគម USGBC។ ក្រុមហ៊ុនទទួលបាន ២០ពិន្ទូលើ២១ សំរាប់ទីតាំងដែលមាននិរន្តភាព ១១ពិន្ទុលើ១១ សំរាប់ការសន្សំសំចៃទឹក ៣៤ពិន្ទុលើ៣៧ សំរាប់ការប្រើប្រាស់ថាមពល និងបរិយាកាស ៦ពិន្ទុលើ១៤ សំរាប់សំភារៈប្រើប្រាស់ និងធនធាន ៩ពិន្ទុលើ១៧ សំរាប់គុណភាពបរិយាកាសក្នុងអាគារ ៦ពិន្ទុលើ៦ សំរាប់គំនិតច្នៃប្រឌិតក្នុងការឌីហ្សាញ និងចុងក្រោយគឺ ៤ពិន្ទុលើ៤ សំរាប់ គុណភាពអាទិភាពប្រចាំតំបន់។
លោក យឹម កែវកល្យាណ នាយកប្រតិបត្តិ របស់ក្រុមហ៊ុន VRK Corporation
លោក យឹម កែវកល្យាណ នាយកប្រតិបត្តិ របស់ក្រុមហ៊ុន VRK Corporation ដែលជាក្រុមហ៊ុនម៉ៅការសាងសង់អគារនេះ បាននិយាយថា “ដើម្បីទទួលបានការបញ្ជាក់ស្តង់ដារកម្រិត LEED ធម្មតាមួយ តំរូវឲ្យមានលក្ខណៈសម្បត្តិ និងការខិតខំប្រឹងប្រែងជាច្រើន កុំថាឡើយការទទួលបានវិញ្ញាបនប័ត្រកម្រិត LEED ដែលខ្ពស់បំផុត”។
ដោយព្រោះតែ Bureau Veritas គឺជាក្រុមហ៊ុនអន្តរជាតិ ដែលផ្តល់ជូននូវការបញ្ជាក់ និងធ្វើតេស្តសំរាប់ទំនិញប្រើប្រាស់ ដូចជាសំលៀកបំពាក់ជាដើមនោះ ដូច្នេះ ក្រុមហ៊ុនបានស្នើរសាងសង់អគារស្តង់ដារលំដាប់ LEED នេះមកក្រុមហ៊ុនសាងសង់។ លោក កែវកល្យាណ មានការជឿជាក់ថា ម្ចាស់អាគារមិនត្រឹមតែទទួលនូវ ការ សន្សំសំចៃក្នុងការប្រើបា្រស់ថាមពល និងផ្តល់បរិយាកាសល្អដល់បុគ្គលិកនោះទេ ប៉ុន្តែក៏នឹងទទួលបានការចាប់អារម្មណ៍ពីអតិថិជនធំៗផងដែរ។
បន្ទាប់ពីការសាងសង់អាគារស្តង់ដារ LEED នេះមក ក្រុមហ៊ុន VRK បានយល់ច្បាស់ពីផលប្រយោជន៍បច្ចេកវិទ្យា របស់អគារបៃតង ហើយក៏បានប្តូរគោលដៅ អាជីវកម្មរបស់ខ្លួនដោយផ្តោតលើ ការសាងសង់អាគារបៃតង និងផ្គត់ផ្គង់ផលិតផលបែបបៃតងជាចំបង។ ដើម្បីញែកខ្លួនពីក្រុមហ៊ុនសាងសង់ជាច្រើននៅក្នុង ទីផ្សារ VRK បានដាក់ពាក្យស្នើសុំ USGBC ធ្វើជាសមាជិកតាំងពីឆ្នាំ២០១៤។ ក្រុមហ៊ុន VRK ដែលបានចូលជាសមាជិក សមាគមអ្នកសាងសង់កម្ពុជា (Cambodia Constructors Association (CCA)) កាលពីឆ្នាំ២០១៤ ក៏កំពុងផ្គត់ផ្គង់សំភារៈស្តង់ដារ LEED មួយចំនួន ដែលទាក់ទងទៅនឹងផ្នែកមេកានិច អគ្គិសនី និងបំពង់ ទឹក (M.E.P) ដោយសារតែក្រុមហ៊ុនកត់សំគាល់ឃើញថា សំភារៈស្តង់ដារ LEED មិនសូវមានអ្នកផ្គត់ផ្គង់នៅក្នុងប្រទេសកម្ពុជានៅឡើយទេ។
លោក កែវកល្យាណ បានបញ្ជាក់ថា ការសាងសង់អគារដែលអាចទទួលបានការបញ្ជាក់ LEED ពិតជាមានការលំបាក ជាពិសេសការស្វែងរកសម្ភារៈស្តង់ដារ LEED ហើយលោកបានបន្ថែមទៀតថា ការសាងសង់អាគារដែលមានស្តង់ដារ LEED មានតំលៃខ្ពស់ជាង អាគារធម្មតារហូតដល់ ៣០% ទៅ ៤០%។
ដោយខ្លួនជាសមាជិកតែមួយគត់របស់ USGBC នៅក្នុងប្រទេសកម្ពុជា លោកកែវកល្យាណ បានសង្កេតឃើញថា ក្រុមហ៊ុនក្នុង ស្រុកមួយចំនួន ដែលមាន បទពិសោធន៍ក្នុងការសាងសង់អាគារបៃតង កំពុងពិចារណាចូលរួមសមាគមនេះដែរ។
លោកបាននិយាយថា “មានក្រុមហ៊ុនសាងសង់ជាច្រើនអាចសាងសង់អាគារបៃតងបាន ប៉ុន្តែពួកគេមិនមានជំនាញ ដូចជា ក្រុមហ៊ុនរបស់ខ្ញុំទេ ដោយព្រោះ ក្រុមហ៊ុនទាំងនោះ ជាសមាជិករបស់សមាគម អាគារបៃតង នៅវៀតណាម ថៃ និង សិង្ហបុរី ដែលមានស្តង់ដារទាបជាង USGBA”។
ជាមួយបទពិសោធន៍ជាង១០ឆ្នាំក្នុងវិស័យសំណង់ លោកកល្យាណ ក៏បានសង្កេតឃើញថា បច្ចុប្បន្នក្រុមហ៊ុនអភិវឌ្ឍន៍ និងក្រុមហ៊ុនម៉ៅការសំណង់មួយចំនួនងាក មក ផ្តោតសំខាន់ទៅលើសម្ភារៈបៃតង ព្រោះពួកគេឲ្យអាទិភាពទៅលើគំរោង ដែលមានការសន្សំសំចៃ ក្នុងរយៈពេលវែង។
ខណៈដែលលោកចង់ឃើញក្រុមហ៊ុនសាងសង់ និងក្រុមហ៊ុនម៉ៅការសំណង់ យកចិត្តទុកដាក់ លើបច្ចេកវិទ្យាអាគារបៃតង ដោយប្រើសំភារៈ ដែលមានម៉ាក់យីហោល្អៗ លោកក៏បានស្នើសុំឲ្យរដ្ឋាភិបាល បន្ថូរបន្ថយពន្ធទៅក្រុមហ៊ុនសាងសង់ និងក្រុមហ៊ុនម៉ៅការសំណង់ ណាដែលសាងសង់អាគារបៃតង ព្រោះនៅប្រទេសមួយចំនួន បានអនុវត្តន៍ការបន្ថូរបន្ថយនេះរួចទៅហើយ។
សម្រាប់ព័ត៍មានបន្ថែមទាក់ទងនឹងការស្ថាបនាអគារបៃតង រឹអគារប្រភេទLEED សូមទំនាក់ទំនងមកក្រុមហ៊ុន VRK Corportation តាមរយៈទូរស័ព្ទលេខ
012 726 192 / 093 726 192 ។