អ្នកវិទ្យាសាស្ត្រហូឡង់ស្នើឲ្យសង់ទំនប់ទឹកការពារទ្វីបអឺរ៉ុបពីការកើនឡើងកម្ពស់ទឹកសមុទ្រ
ហូឡង់៖ អ្នកវិទ្យាសាស្ត្រហូឡង់ បានស្នើរដល់រដ្ឋាភិបាលហូឡង់ឱ្យសាងសង់ទំនប់ទឹកធំៗ ចំនួនពីរព័ទ្ធជុំវិញសមុទ្រ ដើម្បីការពារប្រជាជនអឺរ៉ុបប្រមាណ ២៥លាននាក់ពីការកើនឡើងនៃកម្ពស់ទឹកសមុទ្រ។
លោក Sjoerd Groeskamp អ្នកសិក្សាស្រាវជ្រាវពីមហាសមុទ្រ នៅវិទ្យាស្ថានស្រាវជ្រាវសមុទ្រ រ៉ូយ៉ាល់ហូឡង់ បានស្នើឱ្យមានការសាងសង់ទំនប់និងអាងទឹកអឺរ៉ុបភាគខាងជើង ឬ NEED ដើម្បីទប់ទល់នឹងការកើនឡើងនៃកម្ពស់ទឹកសមុទ្ទ ដែលអាចជន់លិចប្រជាជនប្រមាណ ២៥ លាននាក់។
ទំនប់ទឹកមួយនេះ ស្ថិតនៅភាគខាងជើងអឺរ៉ុបរវាងប្រទេសស្កុតឡេន និងន័រវែស។ ទំនប់មួយទៀតខណ្ឌរវាងប្រទេសបារាំង និង Cornwall ប្រទេសអង់គ្លេស។ តាមគម្រោងនៃការស្ថាបនា ទំនប់ទឹក នេះនឹងមានការតភ្ជាប់ចំនួន ២ខ្សែ គឺភ្ជាប់ពីប្រទេសស្កុតលេនជាមួយប្រទេសន័រវែស មានប្រវែង ៤៧៥ គីឡូម៉ែត្រ និងប្រទេសបារាំង ជាមួយអង់គ្លេស មានប្រវែង ១៦០គីឡូម៉ែត្រ។ តម្លៃក្នុងការសាងសង់ទំនប់ទឹកមានប្រមាណជា ១ពាន់លានដុល្លារ។
ទោះបីជាហេដ្ឋារចនាសម្ព័ន្ធទាំងនេះមានទំហំធំក៏ដោយ ក៏លោក Groeskamp បានឲ្យដឹងថា គំនិតនេះអាចធ្វើទៅបាន បើផ្អែកលើលក្ខណៈបច្ចេកទេស។ លោកបាននិយាយថា៖«បើគ្មានវិធានការណ៍ទប់ស្កាត់នោះទេ ទីក្រុងឡុងដ៍ និងមួយភាគបី នៃប្រទេសហូឡង់ នឹងស្ថិតនៅក្រោមទឹកសមុទ្រ»។
លោកថាបណ្តាប្រទេសនៅអឺរ៉ុបចំនួន១៥ នឹងត្រូវបន្ថែមការចំណាយប្រមាណ ០,១ភាគរយនៃចំណូលប្រចាំឆ្នាំ (GDP) លើការងារស្ថាបនាទំនប់ទឹកធំមួយនេះ ដើម្បីការពារពីការកើនឡើងនៃកម្ពស់ទឹកសមុទ្រនាពេលអនាគត។
ផ្អែកលើគម្រោងដែលមានស្រាប់ លោក Groeskamp និងក្រុមការងារ បានដាក់ដេញថ្លៃ ក្នុងការកសាងទំនប់ព័ទ្ធជុំវិញសមុទ្រខាងត្បូង ដែលមានតម្លៃចន្លោះពី ២៥០ផោន និង ៥០០ផោន។
ពួកគេបានគណនាថា ក្នុងរយៈពេលជាង ២០ឆ្នាំ ការចំណាយប្រចាំឆ្នាំសម្រាប់ប្រទេសចំនួន ១៥ ដែលត្រូវបានការពារ ដែលមានចំនួនត្រឹមតែ ០.១ភាគរយ នៃចំណូលសរុបរបស់ពួកគេ៕
