អ្នកវិនិយោគវិស័យអចលនទ្រព្យនិយាយអ្វីខ្លះចំពោះការផ្អាកសំណង់អគារ៤២ជាន់
អគារ Gold Tower កម្ពស់៤២ជាន់បានផ្អាកការសាងសង់ជាលើកទី៣ កាលពីថ្ងៃទី២០ ខែ វិច្ឆិកា ឆ្នាំ២០១៩។
ការផ្អាកការសាងសង់គឺ ដោយសារអគារកម្ពស់៤២ជាន់ ចំកណ្តាលក្រុងភ្នំពេញមួយនេះ ធ្វើឱ្យមានករណីធ្លាក់ដែកយោងជណ្តើរយន្តមួយចេញពីអគារ បណ្តាល ឲ្យត្រូវចំ រថយន្ដស៊េរីទំនើបមួយគ្រឿង ម៉ាក Mercedes-Benz S350 រងការខូចខាតមួយកំណាត់ក្រោយ។
អគារ Gold Tower កម្ពស់៤២នេះ ត្រូវបានផ្អាកដំណើរការសាងសង ដោយសាលារាជធានីភ្នំពេញ និងក្រសួងរៀបចំដែនដី នគរូបនីយកម្ម និងសំណង់។
ជុំវិញការផ្អាកដំណើរការសាងអគារ Gold Tower ៤២ជាន់ ចំកណ្តាលក្រុងភ្នំពេញ នៅពេលនេះ ត្រូវបានអ្នកវិនិយោគ និងអ្នកនៅក្នុងវិស័យអចលនទ្រព្យបានញ្ចេញទស្សនៈខុសគ្នា និងចោទជាសំនួរថា តើ អគារ Gold Tower កម្ពស់៤២ ពេលណាទើបអាចសាងសង់រួចរាល់ ហើយថាតើអគារនេះអាចក្លាយជានិមិត្តរូបនៃអគារខ្ពស់ជាងគេនៅរាជធានីភ្នំពេញបានដែរឬទេ?
លោក ប៉ូ អ៊ាវគង់ ប្រធានគ្រប់គ្រងទូទៅក្រុមហ៊ុន អេស៊ា រៀលអេស្ទេត បាននិយាយថា ការផ្អាកដំណើរសាងសង់ គឺជានិតិវិធីល្អ ព្រោះនៅពេលដែលមានបញ្ហាគ្រោះថ្នាក់ណាមួយ ទោះមិនប៉ះពាល់ ដល់អាយុជីវិតក៏ដោយ ក៏ធ្វើឱ្យខាតទ្រព្យសម្បត្តិសាធារណៈ និងទ្រព្យសម្បត្តិឯកជនដែរ។
លោកបន្តថា រាល់ដំណើរការសាងនៅគម្រោងអគារធំ គួរតែធ្វើជាគំរូដល់ការអភិវឌ្ឍគម្រោងតូចៗ ហេតុនេះ ក្រុមហ៊ុនវិយោគអគារផ្ទាល់គួរតែគិតពីគុណភាព និងសុវត្ថិភាពសារធាណៈផងដែរ។
លោក អ៊ាវគង់ បានបន្តថា នៅកម្ពុជាមិនទាន់មានច្បាប់អ្វីរឹងមាំ ណាមួយត្រួតពិនិត្យលើការសាងសង់ណាមួយ មានប្រសិទ្ធិភាពនៅឡើយទេ ដែលជាហេតុធ្វើឱ្យដំណើរការធានាសុវត្ថិភាពនៅពេលសាងសង់នៅមានចន្លោះប្រហោង ដែលអាចបង្កឲ្យមានគ្រោះថ្នាក់ជាយថាហេតុ។
យ៉ាងណា លោកបានថ្លែងបន្តថា៖ «ខ្ញុំជឿថាក្រសួងរៀបចំដែនដីនគរូបនីយកម្ម និងសំណង់ មានវិធានការរបស់ក្រសួង ប៉ុន្តែការធ្វើបានដល់កម្រិតណានោះវាអាស្រ័យទៅលើជំនាញរបស់គាត់»។
ចំណែកឯ ប្រធានក្រុមហ៊ុន Keller Williams Cambodia និងជាអគ្គនាយកក្រុមហ៊ុន ខ្មែររៀល អ៊ីស្ទេត លោក គីម ហ៊ាង បានប្រាប់ថា គេមិនគួរទុកចោលអគារបែបនេះនៅកណ្តាលទីក្រុងឡើយ។ អាជ្ងាធរពាក់ព័ន្ធ ត្រូវតែដោះស្រាយរវាងអ្នកវិនិយោគ និងគ្រប់ភាគីទាំងអស់ដើម្បីធ្វើឲ្យការសាងសង់បន្តដំណើរទៅមុខទៀត ក៏ដូចជាផ្តល់ទំនុកចិត្តដល់អ្នកវិនិយោគនៅកម្ពុជាផងដែរ។
លោកបានបន្តថា អតិថិជនអាចមានការខ្លាចរអា និងបាត់បង់ទំនុកចិត្ត ប្រសិនបើមានអគារដែលកំពុងសាងសង់ត្រូវផ្អាកទុកចោលបែបនេះ ជាច្រើនលើកច្រើនសារ ដោយវាមិនត្រឹមតែខាតប្រាក់ដែលពួកគេវិនិយោគនោះទេ ប៉ុន្តែការទុកចោលបែបនេះធ្វើឲ្យមានផលប៉ះពាល់ដល់គុណភាពសំណង់ផងដែរ។ ការទុកចោលបែបនេះនឹងធ្វើឲ្យសំណង់ពុកផុយ និងធ្វើឲ្យដែកច្រែះខូចគុណភាព។
លោកបានបន្តថា «អគារ ហ្គោល ថោវើ កន្លងមកធ្លាប់បានក្លាយជាហេតុផលមួយដែលធ្វើឲ្យគ្រប់គ្នាបាត់ទំនុកចិត្តលើទីផ្សារអចលនទ្រព្យនៅកម្ពុជា ព្រមទាំងបានធ្វើឲ្យប៉ះពាល់ដល់អារម្មណ៍អ្នកវិនិយោគម្តងជាពីរដងហើយ។ ហេតុនេះ លោកចង់ឃើញ ស្ថាប័នពាក់ព័ន្ធគួរតែចាត់វិធានចំពោះក្រុមហ៊ុន ដែលទទួលខុសត្រូវម៉ៅការសាងសងដែលធ្វើឱ្យមានគ្រោះថ្នាក់កើតឡើងមកដោះស្រាយ តែជុំវិញដំណើរការសាងសង់គួរតែបន្តដដែល ដើម្បីកុំឱ្យខាតបង់ពេលវេលា បាត់ទំនុកចិត្តទាំងអតិថិជន ទាំងអ្នកវិយោគផ្ទាល់ ម្យ៉ាងបាត់សោភណ្ឌភាពទីក្រុងថែមទៀត»។
ជុំវិញការផ្អាក់ដំណើរការនេះដែរ បើយោងតាមការបញ្ជាក់របស់ លោក ម៉េត មាសភក្តី អ្នកនាំពាក្យសាលារាជធានីភ្នំពេញ ថ្លែងប្រាប់ KHB Media ថា ក្រោយកើតមានឧបទ្ទវហេតុ ធ្លាក់ដែកមកលើរថយន្តប្រជាពលរដ្ឋរួចមក កាលពីព្រឹកថ្ងៃទី២១ ខែវិច្ឆិកានេះ មន្រ្តីជំនាញសាលារាជធានីភ្នំពេញ និងមន្រ្តីជំនាញក្រសួងដែនដី បានចុះទៅកាន់ទីតាំងកើតហេតុផ្ទាល់ ដើម្បីបញ្ជាឱ្យបិទទីតាំងសាងសងបណ្តោះអាសន្នសិន។
ជាមួយគ្នានេះ មន្រ្តីក្រសួងរៀបចំដែនដី នគរូបនីយកម្ម និងសំណង់ ក៏បានណែនាំដល់លោក លីសាន់ហ៊ីម តំណាងក្រុមហ៊ុន យ៉ុន វ៉ូ ខេបូឌា ដែលជាម្ចាស់សំណង់អគារពាណិជ្ជកម្ម Gold Tower កម្ពស់៤២ ត្រូវរុះរើចេគកន្រ្តក់យោងសម្ភារៈ ដែលនៅជាប់តាមបណ្តោយផ្លូវសាធារណៈ,ភាគីក្រុមហ៊ុនក៏ត្រូវរកក្រុមហ៊ុនជំនាញឯករាជ្យដទៃផ្សេងទៀត ដែលមានអាជ្ញាបណ្ណនិងមានជំនាញវិជ្ជាជីវៈច្បាស់លាស់ក្នុងការគិតគួរបញ្ហាសុវត្ថិភាពសំណង់ រួចវាយតម្លៃ និងកែតម្រូវនៅចំណុចខ្វះខាតណាមួយ ទើបអាចដាក់លិខិតសំណើរសុំការសាងសង់ឡើងវិញពីក្រសួងដែនដី។
សូមជម្រាបថា នេះមិនមែនជាលើកទី១នោះទេ ដែលមានការធ្លាក់ដែកចេញអគារកម្ពស់៤២ជាន់ ដែលកំពុងដំណើរការសាងសង់នេះ ពោលកន្លងទៅ ក៏មានហេតុការណ៍ធ្លាក់ដែកចំរថយន្ដ នៅក្បែរនោះ បណ្ដាលឲ្យរងការខូចខាតផងដែរ។
យ៉ាងណា អ្នកវិនិយោគ និងអ្នកជំនាញក្នុងវិស័យអចលនទ្រព្យ រំពឹងថា អគារ Gold Tower កម្ពស់៤២មួយនេះ នឹងត្រឡប់មកដំណើរការសាងសង់ឡើងវិញក្នុងពេលឆាប់ៗនេះ៕