អង្គការសហប្រជាជាតិថា៖ដើម្បីអភិវឌ្ឍន៍ទីក្រុងឆ្លាតវៃនៅកម្ពុជា រដ្ឋាភិបាលត្រូវសិក្សាឲ្យបានលម្អិតពីតម្រូវការជាក់ស្តែង
តំណាងអង្គការសហប្រជាជាតិប្រចាំកម្ពុជា(UN) បានផ្តល់អនុសាសន៍ថា សម្រាប់បរិបទ កម្ពុជាពាក់ព័ន្ធនឹងការអភិវឌ្ឍទីក្រុងឆ្លាតវៃ កម្ពុជាចាំបាច់គួរតែចុះសិក្សាស្រាវជ្រាវពីតម្រូវការពលរដ្ឋឲ្យបានច្បាស់លាស់ ព្រោះវាជាទុនសំខាន់ឈានទៅធានាដល់ការអភិវឌ្ឍទីក្រុងឆ្លាតវៃរបស់កម្ពុជាឲ្យបានជោគជ័យ។
តំណាង UN ក៏បានលើកឡើងថា ទីក្រុងឆ្លាតវែ គឺជាគំនិតថ្មីមួយនៃទីក្រុងដែលផ្តល់ការវរីកចម្រើនប្រកបដោយនិរន្តរភាព និងត្រូវបានរចនាឡើងដើម្បីលើកកម្ពស់សកម្មភាពសេដ្ឋកិច្ច ដែលមានសុខភាពល្អ កាត់បន្ថយការបំពុលបរិស្ថាន ហើយជួយកែលម្អគុណភាពនៃជីវិតរបស់ប្រជាជនទៀតផង។
ការលើកឡើងនេះ ត្រូវបានបង្ហាញឡើងនៅក្នុងវេទិកា នគរូបនីយកម្មកម្ពុជា ស្តីពី «ការអភិវឌ្ឍទីក្រុងប្រកបដោយភាពឆ្លាតវៃ ចីរភាព និងបរិយាប័ន្ន» កាលពីថ្ងៃ ទី២៧ ខែវិច្ឆិកា ឆ្នាំ២០១៩ នៅសណ្ឋាគារសូហ្វីតែលភ្នំពេញភូគីត្រា ក្រោមកិច្ចសហការគ្នា រវាងក្រសួងរៀបចំដែនដី នគរូបនីយកម្ម និងសំណង់ និងអង្គការសហប្រជាជាតិប្រចាំប្រទេសកម្ពុជា (UN)។
អ្នកសម្របសម្រួលអង្គការសហប្រជាជាតិប្រចាំកម្ពុជា(UN) លោកស្រី Pauline Tamesis បានផ្តល់បទសម្ភាសន៍ដល់អ្នកសារព័ត៌មាន KHB Media ថា សម្រាប់កម្ពុជា ដើម្បីអភិវឌ្ឍន៍ទីក្រុងប្រកបដោយចីរភាពទៅថ្ងៃអនាគតបាន គឺយើងត្រូវចាប់ផ្តើមជាមួយប្រជាពលរដ្ឋនៅក្នុងប្រទេស មានន័យថា ភាគីពាក់ព័ន្ធត្រូវស្តាប់មតិពលរដ្ឋ ថា តើពួកគេត្រូវការអភិវឌ្ឍន៍ទីក្រុងរបៀបម៉េច?។
លោកស្រីថា បើភាគីពាក់ព័ន្ធយកសម្តីរបស់ពលរដ្ឋទៅពិចារណា ពីការអភិវឌ្ឍន៍ហេដ្ឋារចនាសម្ព័ន្ធ និងការផ្តល់សេវាកម្ម នោះការអភិវឌ្ឍន៍ទីក្រុងនឹងអាចធានាបាននិរន្តភាពមិនខាន។
អ្នកសម្របសម្រួលអង្គការសហប្រជាជាតិប្រចាំកម្ពុជារូបនេះ បានបញ្ជាក់បន្ថែមថា៖« ភាគីពាក់ព័ន្ធ ពិសេសរដ្ឋាភិបាលត្រូវចុះសិក្សាស្រាវជ្រាវពីតម្រូវការ និងសេចក្តីត្រូវការរបស់ពលរដ្ឋ នៅតាមសហគមន៍ តាមសាលារៀន ចំណត់រថយន្ត និងនៅកន្លែងណាក៏បាន ឲ្យតែធ្វើយ៉ាងណា អាចស្វែងយល់ច្បាស់ពីចំណង់ចំណូលចិត្តពួកគាត់ជុំវិញការអភិវឌ្ឍន៍ទីក្រុង»។
លោកស្រីមានប្រសាសន៍បន្តថា៖«វាមានន័យថា ទាំងភាគីរដ្ឋាភិបាល និងប្រជាពលរដ្ឋត្រូវតែធ្វើការរួមគ្នា យើងមិនគួរឲ្យភាគីណាមួយធ្វើការដាច់តែឯង ហើយយើងចង់បានការអភិវឌ្ឍន៍ទីក្រុងប្រកបដោយចីវភាពនិងឆ្លាតវៃបានទេ»។
សូមបញ្ជាក់ដែរថា វេទិកានគរូបនីយកម្មកម្ពុជា ស្តីពី «ការអភិវឌ្ឍទីក្រុងប្រកបដោយភាពឆ្លាតវៃ ចីរភាព និងបរិយាប័ន្ន» ក៏មានការចូលរួមពីអ្នកជំនាញគោលនយោបាយខាងផ្នែកអភិវឌ្ឍន៍ទីក្រុងថ្នាក់ជាតិ និងអន្តរជាតិ តំណាងក្រសួងស្ថាប័នពាក់ព័ន្ធ តំណាងអង្គការសហប្រជាជាតិនិងដៃគូអភិវឌ្ឍន៍ ស្ថានទូតបរទេស ស្ថាប័នសិក្សា សភាពាណិជ្ជកម្មកម្ពុជា និងវិស័យឯកជន សរុបអ្នកចូលរួមមានប្រមាណ២៥០នាក់។
នៅក្នុងវេទិការនោះ ទីក្រុងចំនួន ៣ របស់ប្រទេសកម្ពុជារួមមាន រាជធានីភ្នំពេញ សៀមរាប និងខេត្តបាត់ដំបងត្រូវបានជ្រើសរើសជាបណ្តាញទីក្រុងឆ្លាតអាស៊ាន (Smart City) បន្ទាប់ពីមេដឹកនាំទាំងអស់នៃប្រទេសជាសមាជិកបានឯកភាពលើគំនិតផ្តួចផ្តើមឲ្យមានទីក្រុងឆ្លាតវៃ ដែលស្នើដោយនាយករដ្ឋមន្ត្រីសិង្ហបុរី លោក Lee Hsien Loong នៅក្នុងអំឡុងពេលកិច្ចប្រជុំកំពូលអាស៊ានលើកទី ៣២ ដែលបានប្រារព្ធធ្វើឡើងនៅប្រទេសសិង្ហបុរីកាលពីខែមេសាកន្លងទៅ។
ឆ្លើយតបទៅនឹងតំណាង អង្គការសហប្រជាជាតិប្រចាំកម្ពុជា ជុំវិញការការអភិវឌ្ឍទីក្រុងឆ្លាតវៃនោះដែរ លោក ប៉ែន សុផល រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ បានចាត់ទុកថា ការលើកឡើងនេះ មានសារៈសំខាន់សម្រាប់កម្ពុជា និងបណ្តាប្រទេសអាស៊ាន ដើម្បីទទួលបានបទពិសោធល្អៗ ពីការអភិវឌ្ឍ ដើម្បីសម្រេចបានទិសដៅប្រែក្លាយប្រទេសខ្លួន ក្លាយជាទីក្រុងឆ្លាតវៃ និងមាននិរន្តភាព។
យ៉ាងណាលោកថា សម្រាប់កម្ពុជា រដ្ឋាភិបាលបានខិតខំរៀបចំនូវបទដ្ឋានគតិយុត្តសមស្រប និងដាក់ចេញផែនការសកម្មភាពជាក់ស្តែង ដើម្បីធានាដល់ការអភិវឌ្ឍទីក្រុងឆ្លាតវៃ៕
