ក្រសួងរៀបចំដែនដី រកចំណូលចូលរដ្ឋបានជាង១១៤លានដុល្លារសហរដ្ឋអាមេរិកនៅក្នុងឆ្នាំ២០១៩
ក្រសួងរៀបចំដែនដី នគរូបនីយកម្ម និងសំណង់ បានរកចំណូលចូលជាតិពាក់ព័ន្ធនឹងការងារចំណូល និងលទ្ធកម្ម ក្នុងឆ្នាំ២០១៩នេះបានចំនួនជាង ១១៤លានដុល្លាសហរដ្ឋអាមេរិកឬប្រមាណ៤៥៦,៦១៧,៦៨៦,០៧៧រៀល។ នេះបើយោងតាមរបាយការណ៍បូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ នាថ្ងៃទី ២៥ ខែធ្នូ ឆ្នាំ២០១៩។
ក្រសួងរៀបចំដែនដី នគរូបនីយកម្ម និងសំណង់ បានបង្ហាញក្នុងរបាយការណ៍ថា ក្រសួងបានប្រមូលចំណូលចូលថវិកាជាតិនៅក្នុងឆ្នាំ២០១៩ បានចំនួនជាង ១១៤លានដុល្លាសហរដ្ឋអាមេរិកគិតទាំងពន្ធប្រថាប់ត្រាលើការផ្ទេរអចលនទ្រព្យ រួមមាន ៖ចំណូលរបស់រដ្ឋបាលកណ្តាល បានចំនួន ២៩ ១០៧ ៧៣៦ ៣៧៤រៀល ដោយក្នុងនោះ៖ សេវាសំណង់ទូទៅ ចំនួន ១៤ ៤០៩ ៤៨៩ ៧៥៨រៀល សេវាសំណង់លើសសន្ទស្សន៍ ចំនួន ១៤ ៤១៧ ៧៨០ ០០០រៀល ការជួលអចលនទ្រព្យចំនួន ២៨០ ៤៦៦ ៦១៦រៀល។
នៅក្នុងនោះដែរ ចំណូលរបស់មន្ទីរ ដ.ន.ស.ស.រាជធានី ខេត្ត មានចំនួន ៨០ ២៣៤ ៨០៣ ២២៧រៀល ក្នុងនោះ៖ សេវាសុរិយោដី ចំនួន ៥០ ០២៥ ៧៨២ ៥១៤រៀល លក្ខណៈជាប្រព័ន្ធ ចំនួន១១ ៧៧១ ៥០៨ ៣០០រៀល លក្ខណៈដាច់ដោយដុំ ចំនួន៣៨ ២៥៤ ២៧៤ ២១៤រៀល និងសេវាសំណង់ទូទៅ ចំនួន ៣០ ២០៩ ០២០ ៧១៣រៀល។
ដោយឡែក ក្រសួងរៀបចំដែនដីបានឲ្យដឹងទៀតថាការងារលទ្ធកម្មវិញ មានគម្រោងលទ្ធកម្មសរុបសម្រាប់ឆ្នាំ២០១៩ មានចំនួន៣២គម្រោង ក្នុងនោះ៖បានអនុវត្តនីតិវិធីទូទាត់ចំនួន២៩គម្រោង ស្មើនឹង៩០,៦២ % ហើយបន្តអនុវត្តចំនួន១គម្រោង ស្មើនឹង៣,១% និងគម្រោងដែលមិនអាចអនុវត្តបានចំនួន២គម្រោង ស្មើនឹង៦,២៥ %។
រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ក៏បានចាត់ទុកថា ឆ្នាំ២០១៩គឺជាឆ្នាំទី១នៃការអនុវត្តយុទ្ធសាស្រ្តចតុកោណ ដើម្បីកំណើន ការងារ សមធម៌ និងប្រសិទ្ធភាព៖ កសាងមូលដ្ឋានឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ដំណាក់កាលទី៤ របស់រាជរដ្ឋាភិបាល ក្រោមការដឹកនាំដោយប្រមុខរដ្ឋាភិបាលកម្ពុជា។
រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់រូបនេះ អះអាងថា វិស័យអចលនទ្រព្យ និងសំណង់នៅកម្ពុជា កំពុងបន្តរក្សាបានយ៉ាងគត់មត់ និងរឹងមាំ ដោយធានាបាននូវស្ថិរភាពសេដ្ឋកិច្ច-សង្គម ការកាត់បន្ថយភាពក្រីក្រ និងការអភិវឌ្ឍលើគ្រប់វិស័យ បង្កើនបាននូវកិត្យានុភាពជាតិនៅក្នុងតំបន់និងនៅលើឆាកអន្តរជាតិផងដែរ៕
