(មានវីដេអូ) វត្ថុចម្លែក១២ ដែលបានរកឃើញនៅតាមការដ្ឋានសាងសង់ទូទាំងពិភពលោក
ផែនដីនេះបានលាក់ទុកនូវអាថ៌កំបាំងជាច្រើនកាលពីអតីតកាល ដែលមនុស្សជាច្រើនមិនដែលបានឃើញនៅឡើយទេ។ ប៉ុន្តែវត្ថុអាថ៌កំបាំងជាច្រើនត្រូវបានរកឃើញ តាមរយៈការជីកកកាយរបស់គ្រឿងចក្រក្នុងគម្រោងសាងសង់ជាច្រើននៅទូទាំងពិភពលោក។ យ៉ាងណាក៏ដោយ ពួកគេត្រូវបង្ខំចិត្តមិនអើពើជាមួយនឹងវត្ថុទាំងនោះ ដោយសារវារំខានដល់ដំណើរការសាងសង់របស់ខ្លួន។ យោងតាមគេហទំព័រ CONSTRUCTION JUNKIE វត្ថុចម្លែកខាងក្រោមត្រូវបានរកឃើញក្នុងការសាងសង់នានាលើលោក។ ១. ឆ្អឹងចំឡែកធំៗ ខណៈកំពុងធ្វើការពង្រីកកីឡាដ្ឋានបាល់ទាត់របស់រដ្ឋ Oregon ក្រុមនាវិកបានរកឃើញឆ្អឹងចម្លែកធំៗដែលមានអាយុប្រហែល១០.០០០ឆ្នាំ ដែលមើលទៅដូចជាឆ្អឹងសត្វដំរីម៉ាមូតដែលបានផុតពូជទៅហើយ។ 
២. ទូដែកស្ដេចគ្រឿងញៀនដ៏ល្បីល្បាញម្នាក់ កាលពី២៩ឆ្នាំមុន រដ្ឋាភិបាលបានរឹបអូសផ្ទះស្ដេចគ្រឿង Pablo Escobar នៅឆ្នេរសមុទ្រMiami រដ្ឋ Florida។ ចុងក្រោយម្ចាស់ផ្ទះថ្មីបានសម្រេចវាយកម្ទេចផ្ទះនេះ ហើយខណៈកំពុងវាយកម្ទេច គេបានរកឃើញរបស់គួរអារម្មណ៍មួយ គឺទូដែកពណ៌ប្រផេះ ប៉ុន្តែជាអកុសលពួកគេមិនបានបង្ហាញឲ្យដឹងថាមានអ្វីក្នុងហ្នឹងទេ។ មួយសប្ដាហ៍ក្រោយមកស្បោងមួយត្រូវបានរកឃើញ ដែលម្ចាស់ផ្ទះថ្មីជឿថាមានកូកាអ៊ីន។ 
៣. កប៉ាល់ចំបាំងសតវត្សទី១៨ ក្នុងដំណើរការនៃការសាងសង់សណ្ឋាគារថ្មីមួយនៅតាមមាត់ទន្លេអាឡិចសាន់ឌ័រ រដ្ឋវីជីនៀ គេបានរកឃើញនាវាសម័យសង្គ្រាមបដិវត្តន៍មួយកប់នៅក្រោមដី ដែលត្រូវបានគេជឿថាត្រូវបានលិចនៅចន្លោះឆ្នាំ១៧៧៥ និង១៧៩៨។ 
៤. ឆ្អឹងមនុស្ស កម្មករម្នាក់នៅឯកន្លែងសាងសង់ Hillsdale រដ្ឋ Missouri បានរកឃើញឆ្អឹងជើងមនុស្សដ៏ភ្ញាក់ផ្អើលមួយ ក្នុងពេលដែលឡានបានជាប់ផុង។ អាជ្ញាធរក៏បានចាប់ផ្ដើមធ្វើការស៊ើបអង្កេត ដោយឆ្កែហិតក្លិន និងអ្នកពិនិត្យវេជ្ជសាស្ត្រម្នាក់ និងបានរកឃើញលលាក្បាលមនុស្សមួយផ្សេងទៀត។ ពួកគេជឿថា បុរសនោះត្រូវបានបុកស្លាប់ដោយរថភ្លើង ដែលក្បាលបានដាច់ជាប់ស្ពាន។ 
៥. ថ្មមុខផ្នូរ អ្នកម៉ៅការម្នាក់នៅទីក្រុង Oakbrook Terrace រដ្ឋIllinois បានរំលាយកន្លែងមួយ ដើម្បីធ្វើផ្លូវសម្រាប់ខុនដូ ហើយអ្នកជិតខាងម្នាក់ក៏បានឃើញថ្មមុខថ្នូរ និងបំណែកឈើដែលមើលទៅដូចមឈូស។ ក្រោយការស៊ើបអង្កេតរបស់អាជ្ញាធរ មិនបានរកឃើញមានសាកសពក្នុងហ្នឹងទេ ប៉ុន្តែដំណើរការងារត្រូវបានអាជ្ញាធរស្នើឲ្យផ្អាក។ 
៦. សត្វភេ ក្នុងគម្រោងឈូសឆាយផ្លូវលំនៅឋានមួយនៅទីក្រុង Titusville រដ្ឋ Florida បានឃើញរូងមួយ និងភេអាយុ៥សប្ដាហ៍។ ភេបានរត់ចេញពីរូងនោះ ប៉ុន្តែក្រោយមកត្រូវបានចាប់បាន និងយកទៅមន្ទីរពេទ្យសត្វព្រៃ Florida សម្រាប់ធ្វើការថែទាំ។ 
៧. សត្វពស់ធំវែង បន្ទាប់ពីបំផ្ទុះរូងភ្នំមួយដើម្បីធ្វើការរៀបចំទំនប់អគ្គិសនី Belo Monte រដ្ឋ Para ប្រទេសប្រេស៊ីល ស្រាប់តែមានពស់ដ៏ធំមួយដែលមានប្រវែង១០ម៉ែត្រ ទម្ងន់៤០០គីឡូក្រាម អង្គត់ផ្ចិត១ម៉ែត្រ បានលេចឡើងចេញពីកន្លែងងងឹត។ គេមិនបានបញ្ជាក់ថា ពស់នោះជាប្រភេទពស់អ្វីទេ ប៉ុន្តែវាជាសត្វល្មូនដ៏មួយ និងមិនដឹងថាវាស្លាប់ ដោយសារតែការបំផ្ទុះរបស់ក្រុមការងារសាងសង់ ឬដោយសារមូលហេតុអ្វីផ្សេង។ 
៨. សំណង់វិហារបុរាណ នៅពេលអគ្គមេបញ្ជាការមូស្លីម ឈ្មោះ Amr ibn al-As បានសញ្ជ័យតំបន់ហ្គាហ្សា នៅប៉ាឡេស្ទីនឆ្នាំ ៦៣៧គ.ស ដែលកាលណោះប្រជាជនភាគច្រើនបានកាន់សាសនាអិស្លាម។ បន្ទាប់មកនេះនាំឱ្យវិហាគ្រិស្តបរិស័ទជាច្រើនត្រូវបានគេបោះបង់ចោល។ កន្លែងវិហារបុរាណមួយត្រូវបានគេជីកសម្រាប់ការសាងសង់កាលពីឆ្នាំមុន និងបានរកឃើញវត្ថុបុរាណមួយចំនួន រួមមានសសរកែវដែលបាននាំចូលពីក្រិកកាលពី១៥០០ឆ្នាំមុនមកម្លេះ។ ជាអកុសល ក្រសួងវត្ថុបុរាណរបស់ប៉ាឡេស្ទីនតូចពេកនិងខ្វះមូលនិធិដើម្បីស្វែងរក និងថែរក្សាវត្ថុបុរាណទាំងអស់ឲ្យបានត្រឹមត្រូវ ដែលធ្វើឲ្យប្រវត្តិនៃព្រះវិហារទាំងនេះអាចនឹងបាត់បង់។ https://youtu.be/ocTDVOqv2Tw ៩. កាក់រ៉ូម៉ាំងបុរាណចំនួន១,៣០០ផោន ក្រុមការងារសាងសង់ក្នុងប្រទេសអេស្ប៉ាញ បានរំភើបយ៉ាងខ្លាំងក្នុងឆ្នាំ២០១៦ នៅពេលពួកគេបានរកឃើញ កាក់រ៉ូម៉ាំងប្រាក់និងសម្រិតចំនួន៦០០គីឡូក្រាម ដែលបានកប់ក្នុងដីជម្រៅប្រហែល១ម៉ែត្រ។ កាក់ទាំងនេះមិនដែលបានប្រើប្រាស់ទេ និងបានកប់នៅក្នុងក្រឡរ៉ូម៉ាំង ជាប្រភេទធុងសេរ៉ាមិចដែលប្រើប្រាស់យ៉ាងទូលំទូលាយនៅសម័យបុរាណ។ សារមន្ទីរបុរាណវិទ្យា Seville បានរំភើបរីករាយយ៉ាងខ្លាំងចំពោះការរកឃើញនេះ ហើយពួកគេជឿថា កាក់នេះមានតាំងពីសតវត្សទី៤ និងមិនធ្លាប់ឃើញមាននៅកន្លែងណាផ្សេងទៀតទេ ដែលតម្លៃរបស់ពួកវាមិនអាចកាត់ថ្លៃបាន។ 
១០. គ្រាប់បែកចំណាស់ ក្រុមការងារសាងសង់នៃរដ្ឋម៉ាសាឈូសេត បានភ័យស្លន់ស្លោមិនស្ទើរ នៅពេលដែលពួកគេបានរកឃើញគ្រាប់បែកដ៏ចំណាស់មួយនៅការដ្ឋានសាងសង់របស់ខ្លួន។ ភ្លាមនោះប៉ូលិសក៏បានមកដល់និងយកវាចេញ។ សំណាងណាស់គ្រាប់នេះស្អុយ ហើយប៉ូលិសជឿថា វាត្រូវបានប្រើសម្រាប់ការហ្វឹកហាត់។ ១១. មឈូសសពក្មេងស្រី ខណៈអ្នកម៉ៅការកំពុងធ្វើការជួសជុលផ្ទះនៅ San Francisco រដ្ឋ California ពួកគេបានរកឃើញមឈូសតូចមួយ។ ទីតាំងលំនៅឋាននេះជាអតីតកន្លែងបញ្ចុះសព ដែលបានប្ដូរទៅ Colma ក្នុងឆ្នាំ១៩៣០។ មឈូសទាំងនេះបានបញ្ចុះប្រហែល១២០ឆ្នាំកន្លងមកហើយ ដែលក្រោយមកទីតាំងនេះត្រូវបានអភិវឌ្ឍទៅជាតំបន់លំនៅឋាន។ ម្ចាស់ផ្ទះបានធ្វើការជាមួយអង្គការ Garden of Innocence ដើម្បីបញ្ចុះសពកុមារដែលមិនមានអត្តសញ្ញាណនេះឡើងវិញ បន្ទាប់ពីទីក្រុងមិនអនុញ្ញាតឱ្យបញ្ចុះសពដោយគ្មានលិខិតបញ្ជាក់មរណភាព។ ១២. ពងដាយណូស័រ ទីក្រុងហឺយួន ប្រទេសចិន មានមោទនភាពណាស់ ដែលពួកគេបានរកឃើញស៊ុតដាយណូស័ររាប់ម៉ឺននៅក្នុងរយៈពេល២ទសវត្សរ៍កន្លងមកនេះ។ តាំងពីឆ្នាំ១៩៩៦ ទីក្រុងបានរកឃើញហ្វូស៊ីលស៊ុតជា១៧.០០០គ្រាប់ ដែលភាគច្រើនត្រូវបានរកឃើញដោយជនស៊ីវិល ជាជាងអ្នកវិទ្យាសាស្ត្រ។ សំបុកស៊ុតដែលទើបរកឃើញថ្មីមានចំនួន៤៣គ្រាប់ នៅពេលធ្វើការជួសជុលផ្លូវមួយ។ អ្នកវិទ្យាសាស្ត្របានធ្វើតេស្តស៊ុតទាំងនេះ និងរកឃើញថា ជាប្រភេទដាយណូស័រ Oviraptorid និង Duck-billed dinosaurs ដែលមានអាយុកាលនៅលើផែនដី៨៩លានឆ្នាំកន្លងមកហើយ។ 
