ប្រធានសមាគមអ្នកសាងសង់កម្ពុជា៖ ស្នើអ្នកផ្គត់ផ្គងសម្ភារៈសំណង់ត្រូវអនុលោមតាមគុណភាពនិងបច្ចេកវិទ្យាទំនើប

ប្រធានសមាគមអ្នកសាងសង់កម្ពុជា៖ ស្នើអ្នកផ្គត់ផ្គងសម្ភារៈសំណង់ត្រូវអនុលោមតាមគុណភាពនិងបច្ចេកវិទ្យាទំនើប

ការផ្គត់ផ្គង់ ការផលិត និងការនាំចូលសម្ភារៈសំណង់មានការកើនឡើងខ្លាំងក្នុងប្រមា​ណ​​ឆ្នាំចុងក្រោយនេះកំណើនយ៉ាងគំហុកនេះ គឺគាំទ្រដោយការងើបឡើងខ្លាំងនៃវិស័យ​សំណង់​នៅកម្ពុជា

ដោយឃើញពីសន្ទុះនៃកំណើននៃវិស័យសំណង់នេះ សមាគមសាងសង់កម្ពុជា (CCA) ​បាន​អំពាវនាវដល់​អ្នកផ្គត់ផ្គង់សម្ភារៈសំណង់ទាំងអស់ ដែលផលិតនិងនាំចូល សម្ភារៈសំណង់ ត្រូវអនុ​លោម​តាម​ស្តង់​ដារ និងគុណភាពជាចម្បង។

អ្នកឧកញ៉ា​ ពុង​ ឃា​វសែ​ ប្រធាន​សមាគម​អ្នកសាង​សង់​កម្ពុជា  បានឲ្យដឹងថា តម្រូវ​ការសម្ភារៈ គ្រឿងសំណង់​ផ្សេងៗ មានការកើនឡើងខ្ពស់ក្នុងរយៈពេលប៉ុន្មានឆ្នាំចុងក្រោយនេះ។ លោកថា ការកើននេះគឺកើត​ចេញ​ពី ស្ថេរភាពនយោបាយ និងស្ថេរភាពផ្នែកសេដ្ឋកិច្ចក្នុងប្រទេស រួមផ្សំនឹង វិស័យសំណង់ក្នុងប្រទេសកម្ពុជា ក៏កំពុងមានការរីកលូតលាស់ខ្លាំងទាំងនៅក្នុងទីប្រជុំជននិងជនបទ។

អ្នកឧកញ៉ា​ ពុង​ ឃា​វសែថា៖ «ដូចដែល​យើង​បានឃើញ​កន្លងរួចមកហើយ​ថា នៅ​រាជ​ធានី​​ភ្នំពេញ​បច្ចុប្បន្ន​មាន​សំណង់​អគារខ្ពស់ៗ ទំនើបៗ ធំ​ស្កឹមស្កៃ​បាន​រីកដុះដាល​គួរឱ្យ​មាន​ភាព​ស្ញប់ស្ញែង ហើយសំណង់​ទាំងនោះ​មានដូចជា អគារ​មជ្ឈមណ្ឌល​ពាណិជ្ជកម្ម អគារ​ការិយាល័យ ធនាគារ ផ្សារ​ទំនើប សណ្ឋាគារ អគារ​ស្នាក់នៅរួមទាំង​បុរី​លំនៅឋាន ត្រូវបាន​សាងសង់​ឡើងជា​បន្តបន្ទាប់​ ដែល​សំណង់​ទាំងអស់នេះ​សុទ្ធ​តែមាន​លក្ខណៈ​ទំ​នើ​ប​ទាន់សម័យ និង​បាន​ប្រើប្រាស់​បច្ចេកវិទ្យាសម្ភារៈបរិក្ខារ និង​ឧបករណ៍​ក្នុងការ​សាងសង់​ដែលមាន​គុណភាព​ខ្ពស់ មាន​បច្ចេកទេស​ទំនើប និង​មាន​ស្តង់ដារ​ខ្ពស់ និង​ត្រឹមត្រូវ​មិន​ចាញ់​បណ្តារ​ប្រទេស​កំពុងអភិវឌ្ឍន៍​ដទៃ​នៅលើ​ពិភពលោក​ឡើយ»។

ប្រធានសមាគមអ្នកសាង​សង់​កម្ពុជារូបនេះ ក៏បានអំពាវនាវដល់អ្នកផ្គត់ផ្គង់សម្ភារៈ​សំណង់​ទាំងអស់ធ្វើការផលិត និងនាំចូលតែសម្ភារៈ បរិក្ខារ និងគ្រឿងចក្រសំណង់​ណាដែល​មាន​គុណភាព និងបច្ចេកវិទ្យាទំនើបៗ ដើម្បីធានាគុណភាព និងសុវត្ថិភាពសំណង់។

ពាក់ព័ន្ធនឹងការលើកឡើងនេះប្រធានសមាគមអ្នកអភិវឌ្ឍន៍លំនៅឋានកម្ពុជា លោក ឧកញ៉ា លី ហួរ បានលើកឡើងដែរថា បច្ចុប្បន្នវិស័យសំណង់កំពុងលេចធ្លោ និងរីក​ចម្រើន ហើយវិស័យនេះ នៅក្នុងឆ្នាំ២០១៨ បានជួយឲ្យមានកំណើនសេដ្ឋកិច្ចជាតិកើនក្នុងរង្វង់ជាមធ្យម ៧.៥%។

លោក ឧកញ៉ាបន្តថា ក្នុងមួយឆ្នាំៗ កម្ពុជាមានតម្រូវការលំនៅឋាន៥ម៉ឺនខ្នង់ផ្ទះ សម្រាប់បំពេញតម្រូវការរស់នៅ។ ដូច្នេះតម្រូវការដ៏ច្រើនលើសលប់នេះ ធ្វើឲ្យអ្នកវិនិ​យោគលើការផលិត និងការនាំចូលសម្ភារៈសំណង់ពុំអាចផ្គត់ផ្គង់បានតាមតម្រូវ​ការទីផ្សារនៅឡើយ។ ជាមួយគ្នានេះ លោកឧកញ៉ា ក៏បាន​ប្តេជ្ញា​ចិត្តនឹងជម្រុញការអនុវត្តច្បាប់សំណង់ឲ្យបានល្អ ដើម្បីធានាដល់គុណភាព នៃវិស័យសំណង់កម្ពុជា។

ចំណែកឯ លោក ប៊ុន ចាន់សុភាព នាយកប្រតិបត្តនៃក្រុមហ៊ុន ធីខេ អេស គ្រុប ដែលជា​ក្រុមហ៊ុននាំចូលផលិតផល ម៉ាក់ Makita ពាក់ព័ន្ធនឹងវិស័យសំណង់ និងវិស័យកសិ​កម្ម ពីប្រទេស​ជប៉ុន បានលើកឡើងថា កង្វះ​គុណភាព​ក្នុង​វិស័យ​សំណង់ ​គឺ​ជា​រឿងគួរឲ្យចាប់អារម្មណ៍ ចាំបាច់​ត្រូវតែមានការគិតគួរ​​និង​​យកចិត្តទុកដាក់​ខ្ពស់សម្រាប់​អនា​គតសង្គម​ខ្មែរ។

អ្នកផ្គត់ផ្គង់សម្ភារៈសំណង់រូបនេះ បានឲ្យ​ដឹងទៀតថា កន្លងមកមានផលិតផលមួយចំនួន មានការក្លែងបន្លំម៉ាកផលិតផលដែលគ្មាន​គុណ​ភាពនិងគ្មានស្តង់ដារច្បាស់លាស់ ជាក់ស្តែងដូចជាផលិតផលម៉ាក់ ​Makita​ផ្ទាល់ កន្លងមកមានការក្លែងបន្លំ​នៅលើ​ទីផ្សារផងដែរ។

លោក ចាន់សុភាព ក៏បានអំពាវនាវដល់អ្នកប្រកបមុខរបរលើវិស័យសំណង់ទាំងអស់ ត្រូវគិតនិងនាំចូលផលិតផល ដែលមានគុណភាពខ្ពស់ មានក្រុមហ៊ុនច្បាស់លាស់ និងការទទួលស្គាល់គុណភាពត្រឹមត្រូវ ដើម្បីបញ្ចៀសគ្រោះថ្នាក់អ្នកប្រើប្រាស់ ចំណេញពេលវេលា និងចំណេញថវិកាថែមទៀត។

គួរបញ្ជាក់ថា កម្ពុជាមានហេតុការបាក់​រលំ​អាគារ និងគ្រោះថ្នាក់​ដែលបណ្តាលមកពីការផ្គត់​ផ្គង់​សម្ភារៈសំណង់មិនទាន់មានគុណភាព និងស្របតាមស្តង់​ដារត្រឹមត្រូវ ​ដែលកន្លងមកក៏បានបណ្តាលឲ្យ​ស្លាប់​និង​របួស​រយៈពេល​ប៉ុន្មានខែចុងក្រោយ​នេះផងដែរ។

ទោះបីជា​វា​មិនទាន់​ធ្ងន់ធ្ងរ​ដូច​នៅ​ប្រទេស​មួយចំនួនក្តី ដែលមាន​អ្នកស្លាប់​និង​របួស​រាប់ពាន់​អ្នក​ក៏ដោយ​ក៏​នេះ​ជាស​ញ្ញា​ដំបូង​មួយ​សម្រាប់​ដាស់​ស្មារតី​សង្គម​ខ្មែរ​យើង​ឲ្យ​គិត​គូរ​ដល់​គ្រោះថ្នាក់​ជាច្រើន​ទៀត​ដែល​អាច​កើតឡើង​នៅពេល​ខាងមុខ

អត្ថបទដោយ: Pisey