អ្នកជំនាញពន្យល់ពីអត្ថប្រយោជន៍នៃការរៀបចំឃ្លាំងទំនិញបែបស្តង់ដារ ខណៈតម្រូវការឃ្លាំងកើនឡើង
ខណៈកម្ពុជាកំពុងវិវត្តខ្លួនចូលទៅក្នុងសង្វាក់ផលិតកម្មសកល ស្របទៅតាមកំនើនសេដ្ឋកិច្ច អាជីវកម្មបម្រើឲ្យវិស័យឃ្លាំងទំនិញបានដើរតួនាទីយ៉ាងសំខាន់ក្នុងការស្តុក លើកដាក់ និងផ្ទេរបន្តទំនិញ។ ប៉ុន្តែអ្នកជំនាញផ្នែករៀបចំឃ្លាំងទំនិញលើកឡើងថា មានឃ្លាំងស្តុកទំនិញមួយចំនួនធំនៅកម្ពុជា នៅដំណើរការតាមបែបបុរាណនៅឡើយ ដែលនាំឲ្យខាតបង់ថវិកា ពេលវេលា និង មានហានិភ័យច្រើន។
លោក វ៉ា សុជាតិ ស្ថាបនិក និងជាអគ្គនាយកក្រុមហ៊ុន S3V Group ដែលមានបទពិសោធន៍លើការរៀបចំ និង ផ្គង់ផ្គង់ឧបករណ៍បម្រើឲ្យវិស័យឃ្លាំងតាំងពីឆ្នាំ២០០៦មកបានប្រាប់ KHB News ថា ការតម្លើងឃ្លាំងទំនិញប្រកបដោយស្តង់ដារផ្តល់នូវភាពងាយស្រួលក្នុងការស្វែងរកទំនិញ ចំណេញថវិកា និង ពេលវេលា មានសុវតិ្ថភាព សោភ័ណភាព សណ្តាប់ធ្នាប់ ព្រមទាំងផ្តល់បរិយាកាសល្អដល់អតិថិជន និង កម្មករដែលបម្រើការនៅក្នុងឃ្លាំង។
ជាមួយនឹងបទពិសោធន៍លើវិស័យរៀបចំឃ្លាំងនៅតាមបណ្តាប្រទេសអភិវឌ្ឍន៍មួយចំនួន ដែលមានស្តង់ដាររៀបចំឃ្លាំងទំនិញប្រកបដោយប្រសិទិ្ធភាពខ្ពស់ លោកសុជាតិ សង្កេតឃើញថាមានឃ្លាំងទំនិញ និង រោងចក្រមួយចំនួនធំនៅកម្ពុជា តែងដាក់ទំនិញគរលើគ្នា ពុំមានបញ្ជីរទំនិញច្បាស់លាស់ និងមិនទាន់ប្រើប្រព័ន្ធទិន្នន័យគ្រប់គ្រងឃ្លាំងនៅឡើយ ដែលនាំឲ្យពិបាកស្វែងរក ឫ ពិបាកលើកដាក់ដោយប្រើកម្លាំងមនុស្ស។
លោកកត់សម្គាល់ឃើញថា មានឃ្លាំងស្តុកទំនិញជាច្រើន នៅបន្តប្រើប្រាស់ធ្នើរដាក់ទំនិញដែលប្រើជាងដែកផ្សារធម្មតានៅឡើយ ដោយមិនមានការធានា បង្កហានិភ័យ និង ពិបាកលើកដាក់ទំនិញ។
លោកថ្លែងថា៖ «ខ្ញុំចង់ចូលរួមកែប្រែផ្នត់គំនិតរបស់ប្រជាជនខ្មែរមួយចំនួន ដែលនៅនិយមប្រើធ្នើរដែកបុរាណដែលផ្សារដោយជាងដែកដែលមិនមានជំនាញអំពីឧបករណ៍ធ្នើរ មិនបានឆ្លងកាត់ការធ្វើតេស្តត្រឹមត្រូវ ដែលអាចបង្ករគ្រោះថ្នាក់ដល់អ្នកប្រើប្រាស់ ហើយប្តូរមកប្រើប្រាស់ធ្នើរស្តង់ដារត្រឹមត្រូវ និងមានការធានាច្បាស់លាស់វិញ»។
ស្ថាបនិករូបនេះដែលមានបទពិសោធន៍តម្លើងឃ្លាំងជូនអតិថិជនគ្រប់ប្រភេទនៅទូទាំងប្រទេសកម្ពុជា បានពន្យល់ថា ដំណើរការនៃការរៀបចំឃ្លាំងប្រកបដោយស្តង់ដារត្រូវចាប់ផ្តើមពីការផ្តល់ការប្រឹក្សាស្វែងយល់អំពីតម្រូវការរបស់អតិថិជនជាមុន បន្ទាប់មកផ្តល់ដំណោះស្រាយ និង ការឌីហ្សាញប្លង់ឃ្លាំងទំនិញពីអ្នកជំនាញ មុននឹងសាងសង់ និង ទិញឧបករណ៍សម្ភារៈ រួមទាំងប្រព័ន្ធគ្រប់គ្រងឃ្លាំង ដែលមានគុណភាព ប្រសិទិ្ធភាព និងស្តង់ដារជូនអតិថិជន រួមទាំងសេវាថែទាំឃ្លាំងជាប្រចាំផងដែរ។
ដោយសង្កេតឃើញពីបញ្ហាទាំងនេះ លោកបានសម្រេចចិត្តនាំចូលផលិតផល និង បច្ចេកវិទ្យាបម្រើឲ្យវិស័យឃ្លាំងម៉ាក Helli ដែលមានរោងចក្រផលិតកម្មធំជាងគេនៅប្រទេសចិន និង លំដាប់លេខ៧នៅលើពិភពលោកមកកម្ពុជា ដែលផលិតផលនេះត្រូវបានឌីហ្សាញឡើងប្រកបដោយស្តង់ដារអន្តរជាតិ និង មានការធានាត្រឹមត្រូវ។
លោកថ្លែងថា៖«ខ្ញុំចង់នាំចូលបច្ចេកវិទ្យាទាំងនេះមកកម្ពុជា ដើម្បីរួមចំណែកជាមួយរាជរដ្ឋាភិបាល និងវិស័យឯកជន ក្នុងការជួយធ្វើឲ្យប្រសើរឡើងនូវវិស័យនៅកម្ពុជាឲ្យមានកម្រិតស្តង់ការល្អ ដើម្បីធានាឲ្យមានសណ្តាប់ធ្នាប់ ប្រសិទិ្ធភាព សុវតិ្ថភាព និង ភាពងាយស្រួល»។
សភាពាណិជ្ជកម្មកម្ពុជា (CCC) កាលពីចុងឆ្នាំ២០១៩បានកត់សម្គាល់ថា វិនិយោគិនជាច្រើនកំពុងជួបការលំបាកក្នុងការស្វែងរកឃ្លាំងទំនិញ ដើម្បីជួលនៅតាមតំបន់សេដ្ឋកិច្ចពិសេសនានានៅទូទាំងប្រទេស ហើយជម្រុញឲ្យតំបន់សេដ្ឋកិច្ចពិសេសនានា ស្ថាបនាឃ្លាំងទំនិញថ្មីៗបន្ថែមទៀត ឬ ពង្រឹងសមត្ថភាពរបស់ឃ្លាំងដែលមានស្រាប់។
បើយោងតាមក្រុមប្រឹក្សាអភិវឌ្ឍន៍កម្ពុជា(CDC) គិតត្រឹមឆ្នាំ២០១៧ មានតំបន់សេដ្ឋកិច្ចពិសេសចំនួន ៤៤ កំពុងប្រតិបតិ្តការនៅកម្ពុជា។ កាលពីឆ្នាំ២០១៩ ការនាំចេញពីតំបន់សេដ្ឋកិច្ចពិសេសទាំងអស់នៅទូទាំងប្រទេសមានតម្លៃសរុបរហូតដល់ ១.៤ ពាន់លានដុល្លារអាមេរិច ដែលមានកំនើន ១៨% ធៀបនៅឆ្នាំ២០១៨។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA) បានប្រាប់កាសែតភ្នំពេញប៉ុស្ត៍កាលពីពេលថ្មីៗនេះថា តម្រូវការឃ្លាំងជួលពិតជាមានការរអាក់រអួលខ្លះក្នុងអំឡុងការរីករាលដាលជំងឺកូវីដ១៩ ប៉ុន្តែវាស្ថិតក្នុងកម្រិតតិចតួចប៉ុណ្ណោះ។ លោកបន្តថា វិស័យសេវាកម្មធ្លាក់ចុះមែន តែតម្រូវការកន្លែងស្តុកទុកទំនិញគឺនៅតែមាន។ លោកបន្តថា៖ «វាមិនធ្លាក់ច្រើនទេ ព្រោះការជួលឃ្លាំងគេតែងធ្វើកិច្ចសន្យារយៈពេលយូរឆ្នាំ»។
លោកប្រាប់ទៀតថា តម្លៃឃ្លាំងជួលពេលនេះក៏មិនបានប្រែប្រួលដែរបើធៀបនឹងមុនពេលការផ្ទុះឡើងនៃជំងឺកូវីដ១៩។
របាយការណ៍ប្រចាំឆ្នាំរបស់ក្រសួងពាណិជ្ជកម្ម ដែលបានចុះផ្សាយនៅខែធ្នូឆ្នាំ២០១៩ បានបង្ហាញថា ការនាំចេញពីកម្ពុជា រយៈពេល១០ ខែដំបូងនៅឆ្នាំ២០១៩ មានចំនួនជិត១១ពាន់លានដុល្លារសហរដ្ឋអាមេរិក ធៀបនឹងចំនួនជាង ១០ពាន់លានដុល្លារអាមេរិកក្នុងរយៈពេលដូចគ្នានេះនៅឆ្នាំ២០១៨។
