ផ្លែផ្កានៃកំណើនសេដ្ឋកិច្ចជំរុញឱ្យតម្លៃអចលនទ្រព្យកម្ពុជាហក់ឡើងខ្ពស់

ផ្លែផ្កានៃកំណើនសេដ្ឋកិច្ចជំរុញឱ្យតម្លៃអចលនទ្រព្យកម្ពុជាហក់ឡើងខ្ពស់

សមាគម​អ្នក​វាយតម្លៃ​ និង​ភ្នាក់ងារ​អចលនវត្ថុ​កម្ពុជា​បានលើកឡើងថា​ វិស័យ​អច​ល​ន​​ទ្រព្យ​កម្ពុជា​នឹង​នៅតែ​រឹងមាំ​ល្អ​សម្រាប់​ ៥ឆ្នាំទៅ​មុខ​ទៀត​ ហើយ​តម្លៃ​អចលនទ្រព្យ​នៅ​​កម្ពុជា​នឹងនៅ​តែ​បន្ត​កើន​ឡើងជាលំដាប់។

តម្លៃអចលនទ្រព្យនឹងបន្តកើនឡើងក្នុងកម្រិត​ពី១០​% ទៅ១៥​% ជា​រៀង​រាល់​ឆ្នាំ​ដោយ​សារ​កម្ពុជាមានសេដ្ឋកិច្ចរឹងមាំ​ខ្លាំងក្លា​ ដែលជំរុញ​​វិស័យ​នេះ​កាន់តែរីកចម្រើន នឹងទាក់​ទាញអ្នក​វិនិយោគ​មកវិនិយោគលើ​វិស័យ​អចលនទ្រព្យ​។

ប្រធាន​សមាគម​អ្នក​វាយតម្លៃ​ និង​ភ្នាក់ងារ​អចលនវត្ថុ​កម្ពុជា លោក​ ច្រឹក​ សុ​ខនីម​ ប្រធាន​សមាគម​ ​បាន​ថ្លែង​បញ្ជាក់​ថា វិស័យលំនៅឋាន វិស័យដីធ្លី និងវិស័យទិញ ជួលផ្សេងៗ ជាកត្តាជំរុញតម្លៃ អចលនទ្រព្យឲ្យមានតម្លៃខ្ពស់ និងកើនឡើងក្នុងរង្វង់ ១០ %ទៅ ១៥%។ 

បើ​ធៀប​នឹង​ប្រទេសជិតខាង​ ដូចជា​ប្រទេស​ថៃ​ វៀតណាម​ និង​បណ្ដា​ប្រទេស​ផ្សេង​ៗ​នៅ​​ក្នុង​តំបន់​អាស៊ាន​នេះ​ សម្រាប់​កម្ពុជា​តម្លៃ​អចលនទ្រព្យ​នៅ​មិនទាន់​ខ្ពស់​នៅ​ឡើយ​ ហេតុនេះ លោក​ថា សម្រាប់​វិស័យ​លំនៅឋាន​នៅ​កម្ពុជា​ គឺ​ត្រូវការ​បន្ថែម​ទៀត​ ព្រោះថា​ បើ​ធៀប​ចំនួន​ប្រជាជន​ និង​ចំនួន​ខ្នង​ផ្ទះ​ គឺ​មិនទាន់​សមាមាត្រ​គ្នា​នៅឡើយ​ទេ​។

លោក​បាន​បន្ថែម​ថា​៖ «មួយវិញទៀត​ចំនួន​ខ្នង​ផ្ទះ​នេះ​ គឺ​ត្រូវការ​បន្ថែម​ទៀត​ ដោយ​សារ​តែ​ចំនួន​ប្រជាជន​មានការ​កើនឡើង​ជា​រៀងរាល់ថ្ងៃ​ និង​ត្រូវ​រៀបការ​ ហើយ​ត្រូវការ​ផ្ទះ​​ថ្មី​សម្រាប់​គ្រួសារ​ថ្មី​ផង​ដែរ​ ទើបត្រូវ​ទាមទារ​ឱ្យ​មានផ្ទះ​បន្ថែម​ទៀត​ ដូចនេះ​លំនៅ​ឋាន​នៅតែ​ជា​កត្តា​សំខាន់​សម្រាប់​ ការ​អភិវឌ្ឍ​នៅ​កម្ពុជា​ ជាពិសេស​លំនៅឋាន​សាង​សង់​​ថ្មី​ៗដូចជា​ បុរី​ផ្ទះល្វែង​ និង​វីឡា​ជាដើម​»។

លោក​ ច្រឹក​ សុ​ខនីម​ ក៏បាន​បញ្ជាក់​ផង​ដែរ​ថា​ វិស័យ​អចលនទ្រព្យ​របស់​កម្ពុជា​នឹង​នៅតែ​មាន​ភាពរឹងមាំ​សម្រាប់​រយៈពេល​ ៥ឆ្នាំទៅ​មុខ​ទៀត​ ដោយ​ផ្អែក​ទៅលើ​មូលដ្ឋាន​តម្លៃ​សេដ្ឋកិច្ច​ក្នុង​កំណើន​រង្វង់៧​% ជាមួយនឹង​មូលដ្ឋាន​នៃ​ការ​គាំពារ​ពី​រាជ​រដ្ឋា​ភិបាល​ ដោយមាន​ស្ថិរភាព​នយោបាយ​ល្អ​ និង​មូលដ្ឋាន​តម្លៃ​នៃ​ការ​វិនិយោគ​ពីក្រៅ​ប្រទេស​ផង​ដែរ​។

ទន្ទឹមគ្នានេះ លោក តេង រឹទ្ធី ស្ថាបនិកក្រុមហ៊ុនអចលនទ្រព្យ R. Investment Group. បានប្រាប់ KHB ថា នាប៉ុន្មានឆ្នាំចុងក្រោយនេះ លោកមើលឃើញកំណើន​តម្រូវ​ការបាន​ធ្វើ​ឲ្យ​តម្លៃអចលនទ្រព្យនៅ​ក្នុង​ប្រ​ទេស​​កម្ពុជាមានសន្ទុះខ្លាំងពីមួយឆ្នាំទៅមួយឆ្នាំ។

លោក​បន្ត​ថា មូលហេតុដែលធ្វើ​ឱ្យមានកំណើននៃតម្រូវការនេះដែរ ដោយសារ កំណើនសេដ្ឋកិច្ច ធ្វើឱ្យប្រជាពលរដ្ឋមាន​ធនធានដើម្បី​ទិញលំនៅឋាន  លំហូរវិនិយោគិនបរទេស​មកវិនិយោគក្នុងវិស័យអចលនទ្រព្យកើនឡើង កំណើន​នៃ​វិស័យសំខាន់ៗរបស់កម្ពុជាបន្តរីកចំរើន ខណៈកំណើនប្រជាជនមករស់នៅទីក្រុងកាន់តែច្រើន។​

លោកបន្តថា ហេតុនេះបើក្រឡេកមើលពីសំណង់ផ្ទះសំបែង គឺមិនទាន់អាចឆ្លើយតបនឹងតំរូវការលើ វិស័យអចលនទ្រព្យបាននៅឡើយទេ។

​យោង​តាមរបាយ​ការណ៍​ថ្មី​មួយ​របស់​ក្រុម​ហ៊ុន​វាយ​តម្លៃអចល​ន​ទ្រព្យ​ V-Trust Appraisal ដែល​ព្យា​ករណ៍​ពី​ទីផ្សារ​អចល​ន​ទ្រព្យ​នៅ​កម្ពុជា​សម្រាប់​ ១០ ឆ្នាំ​ទៀត​​​មាន​ចំ​ណង​ជើង​ថា «​ភ្នំពេញ​ឆ្នាំ ២០៣០» ដែលបានចេញផ្សាយកាលពីពេលថ្មីៗនេះ បាន​ឲ្យ​ដឹង​ថា​ គិត​ត្រឹម​ដំណាច់​ឆ្នាំ​ ២០១៨ ចំ​នួន​ផ្ទះ​នៅ​ក្នុង​បុរី​នៅ​ភ្នំពេញ​មាន​ចំនួន​សរុប ១៥ ម៉ឺន​ផ្ទះ។

របាយ​ការណ៍​ដ​ដែល​បញ្ជាក់​ថា​ ការ​ផ្គត់​ផ្គង់​ផ្ទះ​នៅ​តាម​បុរី​បាន​បន្ត​កើន​ឡើង​ជា​មធ្យម​ ៩ %​ក្នុង​មួយ​ឆ្នាំ​ ដែល​ស្មើនឹង​ចំ​នួន​ផ្ទះ​ ២៥,០០០ ខ្នងក្នុង​មួយ​ឆ្នាំ​។ តាម​រយៈ​អត្រា​កំ​ណើន​នេះ នៅ​ឆ្នាំ ២០៣០ ចំ​នួន​ផ្ទះ​នៅ​តាម​បុរី​នៅ​ភ្នំពេញ​នឹង​កើន​ដល់ ៤៥ ម៉ឺន​​ខ្នង​​។

របាយការណ៍ដដែលបញ្ជាក់ថា​ ​កំ​ណើន​ដ៏​ខ្លាំង​នេះ​ ដោយ​សា​រ​ការ​កើន​ឡើង​​​ចំ​នួន​ប្រ​ជា​ជន​នៅ​ទី​ក្រុង​ និង​​កំណើន​លទ្ធភាព​ទិញ​ដោយ​មាន​ការ​បង់​រំ​លស់​​។

ដោយឡែកបើនិយាយពីខណ្ឌ​សំខាន់​ៗ​ចំនួន ៧ នៅ​ភ្នំពេញ ដែល​ជា​តំ​បន់កំ​ពុង​មាន​កំណើ​នលំនៅដ្ឋានច្រើននៅ​ពេល ​បច្ចុប្បន្ន​នឹង​បន្ត​កើនឡើង​​ខ្លាំង​ថែមទៀត​​សម្រាប់​រយៈ​ពេ​ល​ ១០ ឆ្នាំ​បន្ទាប់។

ខណ្ឌ​ ពោធិ​សែន​ជ័យ ខណ្ឌ​ដង្កោ និង​ ខណ្ឌ​ជ្រោយ​ចង្វា​រ នឹង​មាន​កំ​ណើន​ចំ​នួន​ផ្ទះ​សាង​សង់​ថ្មី​៤ ដង​នៅ​ឆ្នាំ  ២០៣០ ធៀបនឹង​ចំ​នួន​បច្ចុប្បន្ន ខណៈ​ខណ្ឌ ឬស្សី​កែវ ខណ្ឌសែន​សុខ និង​ ខណ្ឌ​ច្បារអំ​ពៅ នឹង​មាន​កំណើន​ ៣​ដង​ដូច​គ្នា។ ខណ្ឌ​មាន​ជ័យ​នឹង​មាន​កំ​ណើន ២ ដង​។

ខណ្ឌទាំង ៧ ខាង​លើ​គឺជា​ទី​តាំ​ង​ដែល​សំ​ណង់​ផ្ទះ​ល្វែង​ ពី​គម្រោង​​អភិវឌ្ឍន៍លំនៅដ្ឋានកំពុង​កើន​ឡើង។​ ក្នុងចំណោមខណ្ឌទាំងនេះ ខណ្ឌពោធិ៍សែនជ័យបច្ចុប្បន្នមានការផ្គត់ផ្គង់ធំជាងគេដែលមានផ្ទះជិត ៥០,០០០។ ខណ្ឌសែនសុខនិងខណ្ឌដង្កោ​មានការ​ផ្គត់​ផ្គង់​​ជាង ២ ម៉ឺនដូច​គ្នា​។​ 

ទោះយ៉ាងណារបាយការណ៍របស់ V Trust ព្យាករណ៍ថាមានការរីកចម្រើនយ៉ាងខ្លាំងនៅខណ្ឌដង្កោ។ ការព្យាករណ៍បានបញ្ជាក់​ថា ខណ្ឌ​ដង្កោ​​នឹងមានផ្ទះជិត ១០០,០០០ ខ្នងនៅឆ្នាំ ២០៣០។

របាយ​ការណ៍​របស់​ V Trust គឺសំ​ដៅ​ត្រឹម​ផ្ទះ​ថ្មី​ដែល​សាង​សង់​ពី​បុរី ឬ សំណង់​ផ្ទះ​ល្វែង​ដែលមាន​ចាប់​ពី ២០ ផ្ទះ​ឡើង​ទៅប៉ុណ្ណោះ។ ការ​សាង​សង់​ផ្ទះ​ជា​លក្ខណៈ​បុគ្គល ឬ បណ្តុំ​ផ្ទះ​ល្វែង​បី​បួន​ល្វែង​ជាប់​គ្នា​មិន​បាន​រាប់​បញ្ចូល​ក្នុង​របាយ​ការណ៍​នេះ​នោះ​ទេ។

មន្រ្តីជំនាញ​ក្រសួង​រៀបចំ​ដែនដី​ នគរូបនីយកម្ម​ និង​សំណង់​ធ្លាប់​មានប្រសាសន៍​កាលពីពេលកន្លង​ទៅ​ថា​៖“កំណើន​នគរូបនីយកម្ម​ និង​សំណង់​បាន​កើនឡើង​យ៉ាង​ឆាប់រហ័ស​ ជាក់ស្តែង​ចំនួន​ប្រជាជន​នៅក្នុង​រាជធានី​-ក្រុង​ និង​ទីប្រជុំជន​មាន​ចំនួន​ប្រមាណ​ ៤.៥លាន​នាក់​ និង​នៅ​ឆ្នាំ២០៣០​ នឹង​បន្ត​កើន​ដល់​ ៧.៩២លាន​នាក់​ស្មើនឹង​៥៤​%។

ទិន្នន័យ​នេះ​បង្ហាញថា​ ក្នុងរយៈពេល​ ១៥ឆ្នាំ​ តម្រូវការ​លំនៅឋាន​ សំណង់​អគារ​ និង​ទីប្រជុំជន​នឹង​មាន​ចំនួន​ប្រមាណ​ ៨០ម៉ឺន​លំនៅឋាន​ដែល​គិតជា​មធ្យម​ គឺ​ ៥ម៉ឺន​លំនៅឋាន​សម្រាប់​ ១ឆ្នាំ​

មន្រ្តីជំនាញ​ក្រសួង​រៀបចំ​ដែនដីរូបនេះ បានឱ្យដឹងដែរថា ដើម្បី​គាំទ្រ​ដល់​ការ​រីកចម្រើន​នគរូបនីយកម្ម​នេះ​ រាជរដ្ឋាភិបាល​បាន​ដាក់​ឱ្យ​អនុវត្ត​ ដោយ​បាន​កំណត់​ច្បាស់លាស់​ពី​តំបន់​ដែល​មាន​សក្តា​នុ​ពល​សម្រាប់​ការ​អភិវឌ្ឍ​ និង​តំបន់​អភិវឌ្ឍន៍​អចលនទ្រព្យ​ឱ្យ​ឆ្លើយតប​ទៅ​នឹង​កំណើនប្រជាជន​ និង​ការ​អភិវឌ្ឍ​សេដ្ឋកិច្ច​។

ប៉ូលចំនួន៥​ ដែលជំរុញសេដ្ឋកិច្ចកម្ពុជា ក្នុងនោះរួមមាន ប៉ូល​អភិវឌ្ឍន៍​រាជធានី​ភ្នំពេញ​ ប៉ូល​អភិវឌ្ឍន៍​សៀមរាប​ ប៉ូល​អភិវឌ្ឍន៍​ខេត្ត​ព្រះសីហនុ​ ប៉ូល​អភិវឌ្ឍន៍​ក្រុង​ និង​ទីប្រជុំជន​តាម​បណ្តោយ​ព្រំដែន​ តាម​បណ្តោយ​អ័ក្ស​នៃ​ការ​អភិវឌ្ឍ​ ដោយ​បានសម្រេច​និង​ដាក់​ឱ្យ​ប្រើប្រាស់​ជាបន្តបន្ទាប់​នូវ​គោលការណ៍​ប្រើប្រាស់​ដី​តាមលំដាប់​អាទិភាព​៕

,

អត្ថបទដោយ: Pisey