ក្រសួងដែនដី គ្រោងនឹងបញ្ចប់ច្បាប់សំណង់នាពេលឆាប់ៗនេះ
លោក ជា សុផារ៉ា រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា បច្ចុប្បន្នច្បាប់សំណង់ គឺស្ទើរតែបានសម្រេចជោគជ័យ ១០០% ដែលគ្រោងនឹងដាក់ចូលឱ្យប្រើប្រាស់ជាធរមាននាពេលឆាប់ៗខាងមុខនេះ។
ការថ្លែងបែបនេះ ធ្វើឡើងនៅក្នុងជំនួបរវាងក្រសួងដែនដី នគរូបនីយកម្ម និងសំណង់ និងលោក MIKAMI Masahiro ឯកអគ្គរាជទូតជប៉ុនថ្មី ប្រចាំនៅព្រះរាជាណាចក្រកម្ពុជា នាទីស្តីការក្រសួង កាលពីចុងខែកញ្ញាកន្ងទៅ។
ក្នុងជំនួបដដែល រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានឱ្យដឹងបន្ថែមថា ស្របពេលដែលរាជរដ្ឋាភិបាលកម្ពុជា កំពុងអនុវត្តយ៉ាងសកម្មនូវគោលនយោបាយ និងយុទ្ធសាស្ត្រចតុកោណដំណាក់កាលទី៤របស់ខ្លួន ជាមួយនឹងស្ថិរភាពនយោបាយនិងការអភិវឌ្ឍន៍ដែលកម្ពុជាមានសព្វថ្ងៃនេះ ក៏មិនអាចកាត់ផ្ដាច់ចេញពីការគាំទ្រពីរដ្ឋាភិបាល និងប្រជាជនជប៉ុនបានឡើយ។
បន្ថែមពីនេះ លោកថា បច្ចុប្បន្នច្បាប់សំណង់ ដែលជិតសម្រេចជោគជ័យ ១០០% នឹងដាក់ឱ្យប្រើប្រាស់ជាធរមាននាពេលដ៏ខ្លីនេះ ហើយដើម្បីឱ្យច្បាប់សំណង់កាន់តែល្អនិងមានប្រសិទ្ធភាពថែមទៀតនោះ គឺគួរតែមានច្បាប់រៀបចំដែនដី បន្ថែមមួយទៀត ដោយមានកិច្ចសហការពីភាគីជប៉ុន ដើម្បីឱ្យដំណើរការទទួលបានលទ្ធផលល្អ និងផ្លែផ្កា។
ពាក់ព័ន្ធនឹងរឿងនេះដែរ លោក MIKAMI MA SAHARO អគ្គរាជទូតជប៉ុនថ្មីប្រចាំកម្ពុជា ក៏បានបង្ហាញពីក្ដីរីករាយ និងធ្វើកិច្ចសហប្រតិបត្តិការជាមួយកម្ពុជា ក៏ដូចជាក្រសួងរៀបចំដែនដី នគរូបនីយកម្ម និងសំណង់របស់កម្ពុជា។ លោកបន្តថា បច្ចុប្បន្នជប៉ុនក៏កំពុងតែធ្វើកិច្ចសហប្រតិបត្តិការលើផ្នែកផ្សេងៗចំពោះការកសាងឡើងវិញនូវការអភិវឌ្ឍរបស់កម្ពុជាក្នុងនោះមានផ្នែកនយោបាយ សេដ្ឋកិច្ច និងវប្បធម៌ជាដើម។
សូមបញ្ជាក់ថា ច្បាប់ស្តីពីសំណង់មាន ២២ ជំពូក និង ១១៣មាត្រា។ ច្បាប់នេះ ធ្វើឡើងក្នុងគោលបំណងពង្រឹងគុណភាព សន្ដិសុខ សុវត្ថិភាពសំណង់ ការពារទ្រព្យសម្បត្តិនិងសុខុមាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណជន។ ច្បាប់ថ្មីនេះ ក៏នឹងបង្កើនគណនេយ្យភាព និងប្រសិទ្ធភាពក្នុងការប្រកបការងារ និងការប្រកបវិជ្ជាជីវៈក្នុងវិស័យសំណង់ ព្រមទាំងបង្កើនការជឿទុកចិត្តរបស់វិនិយោគិននៅក្នុងវិស័យសំណង់ផងដែរ។
ក្រសួងរៀបចំដែនដីរំពឹងថា ក្រោយច្បាប់នេះដាក់ឱ្យប្រើប្រាស់ជាធរមាន ច្បាប់នេះនឹងផ្ដល់អត្ថប្រយោជន៍ជាច្រើន ពិសេសបង្កើនភាពសុខដុមរមនាជាមួយនឹងGDPក្នុងជីវភាពរស់នៅរបស់ប្រជាពលរដ្ឋ ហើយធ្វើឱ្យកម្ពុជារក្សាបាននូវកំណើនសេដ្ឋកិច្ច ៧% ជារៀងរាល់ឆ្នាំ៕