ពលរដ្ឋក្នុងខេត្តព្រះសីហនុជួបវិបត្តិផ្ទួនៗក្រោយការចាកចេញរបស់ជនជាតិចិននិងវត្តមានវីរុសកូរ៉ូណា
ភ្នំពេញ ៖ បន្ទាប់ជនជាតិចិនបានចាកចេញពីប្រទេសកម្ពុជា បន្ទាប់ពីការបិទ ល្បែងអនឡាញ ពលរដ្ឋក្នុងខេត្តព្រះសីហនុ ដែលធ្លាប់តែទទួលបានផល ប្រយោជន៍ខ្ពស់ពីវត្តមានជនជាតិចិន ដូចជាការជួលផ្ទះទៅជនជាតិ ជួលអគារ ជួលដីជាដើម បាននិងកំពុងជួបវិបត្តិជាបន្តបន្ទាប់។
ផលលំបាកគឺដោយសារតែពួកគេជាប់បំណុលក្នុងធនាគារ ដោយការយកឥណទានពីធនាគារមកសាងសង់អគារ ផ្ទះ ទុកជួលឲ្យតែជនជាតិចិន ប៉ុន្តែតែនៅពេលជនជាតិចិនចាកចេញក៏ធ្វើឲ្យសំណង់ត្រូវគាំងនិងមិនមានប្រភពចំណូលសម្រាប់បង់ទៅធនាគារវិញ ។
បន្ទាប់ពីបញ្ហាចិនចាកចេញពីខេត្តព្រះសីហនុនេះ ធ្វើឲ្យពលរដ្ឋមានវិបត្តិមួយទៅហើយ ប៉ុន្តែនៅពេលដែលវីរុសកូរ៉ូណាមានវត្តមាននៅខេត្តព្រះសីហនុថែមទៀតនោះ ធ្វើឲ្យចរន្តសេដ្ឋកិច្ចនៃខេត្តនេះ ហាក់បានបន្តស្ងាត់មួយកម្រិតទៀត ដោយសារតែពលរដ្ឋមួយចំនួនធំ មិនសូវហ៊ានចេញពីផ្ទះព្រោះខ្លាចឆ្លងនឹងជម្ងឺនេះ អ្នកប្រកបរបរនៅតាមទីផ្សារក៏មិនសូវកាក់កបដូចមុនដែរ ក្នុងនោះអាជីវកម្មដឹកជញ្ជូនដូចជារ៉ឺម៉កកង់បី ម៉ូតូឌុប និងតាក់ស៊ីក្នុងខេត្តក៏កំពុងមានបញ្ហាផងដែរ ។
ប្រជាពលរដ្ឋមួយរូបនៅក្នុងខេត្តព្រះសីហនុនេះ លោក ងួន ណេត បានឲ្យដឹងថា រហូតមកដល់ពេលនេះបញ្ហាផ្ទះជួលនៅតែមានវិបត្តិដដែលក្រោយចូលឆ្នាំចិនរួច ។ លោកថា៖« កាលពីចុងឆ្នាំមុននេះ ពលរដ្ឋដែលមានផ្ទះជួល មានអគារជួលសង្ឃឹមថា ក្រោយចូលឆ្នាំចិនរួច ជនជាតិចិននឹងត្រឡប់មកកាន់ខេត្តព្រះសីហនុឡើងវិញ ដែលធ្វើឲ្យពួកគាត់អាចរកចំណូលពីចិនតាមរយៈការជួលអគារ ឬផ្ទះជួលទៅជនជាតិចិនទាំងនោះ តែក្រោយមក ពោលគឺបន្ទាប់ចូលឆ្នាំចិនរួច ចិននៅតែមិនមក និងកាន់តែស្ងាត់ ដោយសារតែវីរុសកូរ៉ូណាត្រូវបានរកឃើញមួយករណីនៅក្នុងខេត្តព្រះសីហនុ » ។
លោបន្តថាផលប៉ះពាល់គឺកាន់តែខ្លាំង ដោយសារតែបំណុលធនាគារកាន់តែកើនច្រើនទាំងដើមទាំងការ ហើយពលរដ្ឋខ្លះពិបាកក្នុងការស្វែងរកប្រាក់ដើម្បីមកបង់ធនាគារប្រចាំខែ ។ ម្យ៉ាងអាជីវកម្មផ្សេងទៀតនៅតាមផ្សារក៏ហាក់ស្ងប់ស្ងាត់ទៀត ដោយសារតែពលរដ្ឋមិនហ៊ានចេញ ហើយនៅពេលចេញទៅផ្សារម្ដងៗពួកគាត់ត្រូវពាក់ម៉ាស់បិទជិតការពារជម្ងឺដ៏សាហាវដែលផ្ទុះឡើងនៅប្រទេសចិន ។
បើតាមលោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានមានប្រសាសន៍ថាព្រឹត្តិការណ៍នៅក្នុងខេត្តព្រះសីហនុ នឹងមិនអាចប៉ះពាល់ធ្ងន់ធ្ងរដល់វិស័យអចលនទ្រព្យកម្ពុជាទាំងមូលនោះទេ ។
គុណវិបត្តិនៅក្នុងខេត្តព្រះសីហនុ ដោយសារតែការឡើងថ្លៃហួសហេតុពេកធ្វើឲ្យស្ថានការណ៍មិនអាចគ្រប់គ្រងបាន។ ជាក់ស្ដែងតម្លៃជួលអចលនទ្រព្យ ដូចជាផ្ទះ អគារ និងដីធ្លីជាដើម បានហក់ឡើងខ្ពស់ ដែលវាមិនមែនជាតម្លៃទីផ្សារឡើយ ដូច្នេះហើយទើបធ្វើឲ្យតម្លៃនេះបានធ្លាក់ចុះមកវិញនិងទទួលរងនូវផលប៉ះពាល់បែបនេះ ។
គួរបញ្ជាក់ថា ក្រៅពីតំបន់ក្រុងព្រះសីហនុ តំបន់ផ្សេងទៀតដូចជានៅបាវិតជាដើម ក៏កំពុងទទួលរងនូវផលវិបត្តិធ្ងន់ធ្ងរផងដែរ ពីការចាកចេញរបស់ចិននៅក្នុងរយៈពេលប៉ុន្មានខែកន្លងទៅនេះ ។
នៅក្នុងក្រុងបាវិត គេសង្កេតឃើញថាសកម្មភាពពាណិជ្ជកម្មនិងការអភិវឌ្ឍនានាត្រូវស្ងប់ស្ងាត់ខ្លាំង ។ បណ្ដាការដ្ឋាននានា បានបិទអត់មានកម្មករធ្វើការដូចមុនទៀតឡើយ បណ្ដាអាជីវកម្មផ្សេងទៀតជាពិសេសអាជីវកម្មកាស៊ីណូ សណ្ឋាគារ និងភោជនីយដ្ឋានក៏បានស្ងប់ស្ងាត់ផងដែរ ៕
