អ្នកឧកញ៉ា ពុង ឃាវសែ៖ ការសាងសង់ព្រលានយន្តហោះអន្តរជាតិភ្នំពេញថ្មី អាចនឹងរួចរាល់នៅឆ្នាំ២០២៣
អ្នកឧកញ៉ា ពុង ឃាវសែ អគ្គនាយកនៃក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) ដែលជាក្រុមហ៊ុនទទួលសិទ្ធិសាងសង់ព្រលានយន្តហោះអន្តរជាតិភ្នំពេញថ្មី ដែលស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល បានឲ្យដឹងថា បើមិនមានឧបសគ្គណាមួយពាក់ព័ន្ធនឹងការដោះស្រាយវិវាទដីធ្លីទេ ព្រលានយន្តហោះអន្តរជាតិភ្នំពេញថ្មី អាចនឹងបញ្ចប់ការសាងសង់នៅឆ្នាំ២០២៣ខាងមុខ។
ការលើកឡើងពីសំណាក់ អ្នកឧកញ៉ា ពុង ឃាវសែ អគ្គនាយកនៃក្រុមហ៊ុនសាជីវកម្មវិនិយោគក្រៅប្រទេសកម្ពុជានៅពេលនេះ ត្រូវបានបង្ហាញនៅក្នុងពិធីបើកសន្និបាតបូកសរុបការងារប្រចាំឆ្នាំលើកទី៨របស់សមាគមអ្នកសាងសង់កម្ពុជានិងសម្ពោធបើកការតាំងពិព័រណ៍ឧស្សាហកម្មសំណង់កម្ពុជាឆ្នាំ២០១៩ ដែលធ្វើឡើងកាលពីថ្ងៃទី៥ ខែធ្នូ។
តាមរយៈការផ្តល់បទសម្ភាសន៍ដល់ក្រុមអ្នកសារព័ត៌មាន អ្នកឧកញ៉ា ពុង ឃាវសែ អគ្គនាយកនៃក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) បានឲ្យដឹងបន្ថែមថា រហូតមកទល់ពេលនេះដំណើរការសាងសង់អាកាសយានដ្ឋានអន្តរជាតិភ្នំពេញថ្មី កំពុងស្ថិតក្នុងដំណាក់បុកគ្រឹះ ដើម្បីធ្វើផ្លូវសម្រាប់យន្តហោះ។
អ្នកឧកញ៉ា បន្តថា ដំណើរការសាងសង់ព្រលានបច្ចុប្បន្ន មិនសូវមានឧបសគ្គពីប្រជាពលរដ្ឋដែលជាម្ចាស់ដីប៉ុន្មានទេ ហើយអ្នកឧកញ៉ាជឿជាក់ បើសិនជាដំណើរការប្រមូលដីធ្លីបន្តគ្មានឧបសគ្គ ដូច្នេះប្រលានយន្តហោះនេះ អាចនឹងរួចរាល់នៅឆ្នាំ ២០២៣ ខាងមុខ។
ជុំវិញដំណឹងពី ការសាងសង់ព្រលានយន្តហោះអន្តរជាតិភ្នំពេញថ្មី អាចនឹងរួចរាល់នៅឆ្នាំ២០២៣នេះដែរ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA) លោក ច្រឹក សុខនីម បានលើកឡើងថា ដំណើរការគម្រោងដ៏មហិមានេះ គឺជាមោទនភាពមួយសម្រាប់ប្រទេសកម្ពុជា ដែលអាចនឹងទទួលបានចំណូលជាច្រើនជូនជាតិ បន្ទាប់ពីអាកាសយានដ្ឋានអន្តរជាតិភ្នំពេញថ្មីនេះដាក់ឱ្យដំណើរនាពេលអនាគត។
ជាងនេះទៀត លោកថា វិស័យអចលនទ្រព្យនិងសំណង់កម្ពុជា នឹងទាក់ទាញវិនិយោគបរទេសបន្ថែម ម្យ៉ាងទៀត ដីនៅតំបន់ព្រលាននឹងមានការអភិវឌ្ឍ បន្ទាប់តំបន់នេះត្រូវបានជ្រើសរើសជាតំបន់ ដែលត្រូវសាងសង់ព្រលានយន្ដហោះនេះ។
គួរបញ្ជាក់ថា ទីតាំងព្រលានយន្តហោះថ្មីក្នុងប្រទេសកម្ពុជា នឹងសាងសង់លើផ្ទៃដីទំហំប្រមាណ ២,៦០០ហិកតា ដែលជាដីស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល ត្រូវចំណាយទុនវិនិយោគរហូតដល់ទៅ ១,៥០០លានដុល្លារអាមេរិក។ ក្នុងនោះទឹកប្រាក់ ១,១០០លានដុល្លារ ជាកម្ចីពីធនាគារបរទេស និង ២៨០លានដុល្លារជារបស់ក្រុម OCIC របស់ឧកញ៉ា ពុង ខៀវសែ ហើយដើមទុនចុះបញ្ជីមានរហូតដល់ ១២០លានដុល្លារអាមេរិក៕