កម្ពុជានឹងត្រូវការផ្ទះ១លានខ្នងទៀតត្រឹមឆ្នាំ២០៣០
តាមការប៉ាន់ស្មានសម្រាប់រយៈពេល ១៥ឆ្នាំខាងមុខ (២០១៥-២០៣០) កម្ពុជានឹងមានតម្រូវការលំនៅឋានប្រមាណ១លានខ្នង ទៀតក្នុងនោះ សម្រាប់តំបន់រាជធានី ទីក្រុង និង ទីប្រជុំជនមានប្រមាណ ៨០មឺន លំនៅឋាន ដែលគិតជាមធ្យម មានតម្រូវ ការប្រមាណ ៥មឺនលំនៅឋានក្នុងមួយឆ្នាំ។ ថ្លែងនៅក្នុងពិធីសម្ភោធបើកការដ្ឋានសាងសង់អគារ World Trade Center Phnom Penh កាលពីថ្ងៃ២៦មករានេះ ឯកឧត្តម ជា សុផារា រដ្ឋមន្រ្តីក្រសួងរៀបចំដែនដី នគរូបនីយកម្ម និង សំណង់ បានលើកឡើងថា សព្វថ្ងៃនេះកម្ពុជាមាន ទីក្រុងរណប បូរី លំនៅឋាន និង លំនៅឋានមានលក្ខណៈជាបូរីសរុបចំនួន ១៨៧ទីតាំង និងមានសំណង់អគារខ្ពស់ៗចាប់ពី៥ជាន់ឡើងទៅ ចំនួន ៩២៥អគារ។ 
វិស័យសំណង់បានក្លាយជាសរសរស្តម្ភមួយសម្រាប់សេដ្ឋកិច្ចកម្ពុជា បន្ទាប់ពីវិស័យ កសិកម្ម ទេសចរណ៍ និង វិស័យ វាយនភ័ណ្ឌ ក្នុងការជំរុញកំណើនសេដ្ឋកិច្ចជាតិ។ តម្រូវការលំនៅឋានបន្ថែមនេះក៏មានការជម្រុញដោយសារ កំណើនភ្ញៀវ ទេសចរណ៍អន្តរជាតិ និងជនបរទេសមករស់នៅ និង ធ្វើការនៅកម្ពុជាដែរ។ ជាក់ស្តែងបើតាមឯកឧត្តមរដ្ឋមន្រ្តី នៅក្នុងទស្សវត្សចុងក្រោយនេះ ចំនួនអ្នកទេសចរណ៍មកទស្សនាកម្ពុជាបានកើនឡើង ដល់ ៥,៦លាននាក់ នៅឆ្នាំ២០១៧ និង ទទួលបានចំណូលប្រមាណ ៣,៤០០លានដុល្លារ។ ចំនួនសណ្ឋាគារសរុបមាន ៧៨១ ស្មើនឹង ៤៥,០៧០បន្ទប់ ផ្ទះសំណាក់មាន ២,២៥០ ស្មើនឹង ៣៣,៧២៧បន្ទប់ និង ភោជនីយដ្ឋានចំនួន ២,២៣៩។ 
នៅឆ្នាំ២០១៧ ទុនវិនិយោគក្នុងវិស័យសំណង់មានចំនួន ៦,៤០០លានដុល្លារអាមេរិច និងបានផ្តល់ការងារធ្វើប្រចាំឆ្នាំជូន យុវជនប្រមាណ២០នាក់។ ប្រទេសចំនួន ១៨ បានមកដាក់ទុនវិនិយោគនៅកម្ពុជា ក្នុងនោះប្រទេសជប៉ុន ជាប់ចំណាត់ថ្នាក់ លេខ៣។ ជាមួយនឹងការរីកចម្រើនវិស័យសំណង់ ចំនួន ក្រុមហ៊ុនប្រកបអាជីវកម្មសិក្សាគម្រោងប្លង់ និង សាងសង់ដែលចុះបញ្ជីនៅ ក្រសួងរៀបចំដែនដី នគរូបនីយកម្ម និងសំណង់ មានចំនួន ១,០៣១ក្រុមហ៊ុន ដែលក្នុងនោះ ក្រុមហ៊ុនសិក្សាគម្រោងប្លង់មាន ចំនួន ៤០ ក្រុមហ៊ុន និងក្រុមហ៊ុនសាងសង់មានចំនួន ៩៩១ក្រុមហ៊ុន។ ស្ថាបត្យករសរុបមានចំនួន ២,៤៣៥នាក់ និង វិស្វករ មានចំនួន៣០,០០០ នៅទូទាំងប្រទេស។ ឯកឧត្តមក៏បានរំលឹកដល់អ្នកវិនិយោគទាំងអស់ ត្រូវអនុវត្តឲ្យបានត្រឹមត្រូវតាមបទដ្ឋានគតិយុត្ត និង បច្ចេកទេស ដើម្បីធានា សុវត្ថិភាព ប្រសិទិ្ធភាព និងចូលរួមការពារបរិស្ថាន។
