BNI Pioneer Chapter កំណត់យុទ្ធសាស្រ្តចំនួន៤ សម្រាប់អាណត្តិទី៣
ភ្នំពេញ៖ នៅក្នុងអាណត្តិទី៣នេះ BNI Pioneer Chapter បានដាក់ចេញយុទ្ធសាស្រ្តចំនួន៤ ដើម្បីពង្រឹងស្ថាប័នបន្ថែមទៀត ក៏ដូចជាស្វែងរកអត្ថប្រយោជន៍ជូនម្ចាស់អាជីវកម្មដែលជាសមាជិកទាំងអស់ ក្នុងការបង្កើនការលក់សេវាកម្ម និងផលិតផល ទៅកាន់ក្រុមហ៊ុនជាដៃគូរ។
លោក ស្រី សំណាង ជាប្រធានរបស់ BNI Pioneer Chapter ក្នុងអាណត្តិទី៣ និងជានាយកគ្រប់គ្រងទូទៅនៃក្រុមហ៊ុន Gold Financial Global Investment (GFGI) ដែលជាក្រុមហ៊ុនផ្តល់សេវាកម្មប្រឹក្សាជួញដូរឧបករណ៍និសន្ទរន៍នាំមុខគេនៅកម្ពុជា បានប្រាប់ KHB News ថា នៅឆ្នាំ២០២០នេះ គណៈគ្រប់គ្រងនៃ Pioneer Chapter បានរៀបចំផែនការយុទ្ធសាស្រ្តចំនួន៤ចំនុចគឺ៖ រៀបចំការប្រើប្រាស់ BNI Tools ទៅកាន់សមាជិកប្រកបដោយប្រសិទ្ធភាព ពង្រឹងវិន័យនៅក្នុងស្ថាប័ន ការចុះស្វែងយល់ផ្ទាល់លើអាជីវកម្មពី Leadership Team ទៅកាន់សមាជិក ក៏ដូចពីសមាជិកទៅកាន់ Leadership Team ដើម្បីអោយយល់កាន់តែច្បាស់ ងាយស្រួលក្នុងការណែនាំឳកាសអាជីវកម្ម និងចំនុចចុងក្រោយគឺការរៀបចំវគ្គចែករំលែកចំនេះដឹងថ្មីៗតាមរយៈ BNI U ក៏ដូចជាបទពិសោធន៍ក្នុងការដោះស្រាយបញ្ហាក្នុងដំណើរការអាជីវកម្មពីសំណាក់ Leadership Team ។
BNI ត្រូវបានបង្កើតឡើងនៅក្នុងឆ្នាំ១៩៨៥ ដែលរហូតមកដល់ពេលនេះ មានចំនួន ៧៤ប្រទេស និងមាន ៩.៥០០ក្រុម (Chapter) ដែលមានសមាជិកប្រមាណ ២៧០.០៧១នាក់នៅទូទាំងសកលលោក។ ក្នុងមួយឆ្នាំៗ BNI បានផ្តល់ឱកាសអាជីវកម្មដល់សមាជិករហូតដល់ ១១,៤ លាន ដែលបម្លែងជាសាច់ប្រាក់ស្មើរនឹង ១៦ពាន់លានដុល្លារសហរដ្ឋអាមេរិក។
លោក ស្រី សំណាង បន្ថែមទៀតថាយុទ្ធសាស្រ្តទី១ គឺការលើកទឹកចិត្តឲ្យសមាជិកទាំងអស់បង្កើនការប្រើប្រាស់ Tools ទាំងឡាយរបស់ BNI ដែលនឹងជួយដល់ម្ចាស់អាជីវកម្មឲ្យមានការរីកចម្រើនលើសពីការរំពឹងទុក។ លោកសង្កត់ធ្ងន់ថា៖ «នៅអាណត្តិថ្មីនេះ ខ្ញុំនឹងធ្វើយ៉ាងណា ជំរុញឱ្យសមាជិកយល់កាន់តែច្បាស់អំពី Tools ទាំងនេះ»។
គួរបញ្ជាក់ផងដែរថា Tools របស់ BNI មានដូចជា៖ BNI Connect ដែលជាកម្មវិធីសម្រាប់ទំនាក់ទំនងរវាងសមាជិក, BNI U ដែលជាបណ្តុំនៃចំណេះដឹងពាក់ព័ន្ធនឹងអាជីវកម្ម, Member Success Program ដែលជាវគ្គបណ្តុះបណ្តាលសមាជិក, Member Passport ដែលជាសៀវភៅសម្រាប់ណែនាំដល់សមាជិក, និង BNI Name Card Holder ដែលជាសៀវភៅចងក្រងបណ្តុំសមាជិកទាំងអស់ ជាដើម។
យុទ្ធសាស្រ្តទី២ គឺការពង្រឹងវិន័យ ដែលសមាជិកទាំងអស់ត្រូវតែគោរពទៅតាមវិន័យ និង បទបញ្ជាផ្ទៃក្នុង ដើម្បីពង្រឹងដំណើរការ និង ចូលរួមសហការគ្នា ដើម្បីសម្រេចបានគោលដៅរួម។
យុទ្ធសាស្រ្តទី៣ គឺការចុះស្វែងយល់ផ្ទាល់លើអាជីវកម្មរបស់សមាជិកទៅវិញទៅមក ដើម្បីជួយបង្កើនប្រាក់ចំណូលសម្រាប់សមាជិកទាំងអស់ ក៏ដូចជាការបង្កើនប្រាក់ចំណូលសម្រាប់ក្រុមទាំងមូលផងដែរព្រោះនៅពេលសមាជិកទាំងអស់បានយល់ច្បាស់ពីសេវាកម្ម និងផលិតរបស់គ្នាទៅវិញទៅមក នាំឲ្យមានភាពងាយស្រួលក្នុងការណែនាំដល់ម្ចាស់អាជីវកម្មផ្សេងទៀត ដើម្បីគាំទ្រប្រើប្រាស់ក៏ដូចជាទិញផលិតផលទាំងនោះ។
លោកប្រធានវ័យក្មេងរូបនេះ បានថ្លែងថា នៅក្នុងរយៈពេល ២ឆ្នាំចុងក្រោយនេះ BNI Pioneer Chapter បានផ្តល់ឱកាសអាជីវកម្មរហូតដល់ ២.២៤៨ ឱកាសអាជីវកម្ម ដល់សមាជិក ដែលបានបម្លែងជាសាច់ប្រាក់មានតម្លៃសរុប ៦.៧៩០.០០០ដុល្លារសហរដ្ឋអាមេរិក។
លោកបានបន្ថែមទៀតថា៖ «កាន់តែពិសេស នៅក្នុងអាណត្តិថ្មីនេះ យើងបានដាក់ផែនការសម្រេចឱ្យបានក្នុងរយៈពេល ៦ខែក្នុងអាណត្តិឆ្នាំ២០២០ នេះ ដោយបង្កើនសាច់ប្រាក់ ២លានដុល្លារសហរដ្ឋអាមេរិកបន្ថែមទៀត បានន័យថា គោលដៅររបស់យើង នឹងបន្ថែមឱ្យបាន ៨.៧៩០.០០០ដុល្លារអាមេរិច»។
សម្រាប់យុទ្ធសាស្រ្តទី៤ គឺចំណេះដឹងនិងជំនាញពិតជាមានសារៈសំខាន់ណាស់ក្នុងការដឹកនាំក៏ដូចជាគ្រប់គ្រងទៅលើអាជីវកម្មរបស់ខ្លួន។ នៅក្នុង Pioneer Chapter មានឃ្លាំងសិក្សា (BNI U) ក្នុងការផ្តល់ចំណេះដឹងបន្ថែមទៅដល់សមាជិកក៏ដូចជាលោក លោកស្រីដែលចង់ចូលរួមជាសមាជិក។
លោកសង្កត់ធ្ងន់ថា៖ « ការចែករំលែកបទពិសោធន៍ក្នុងការដោះស្រាយបញ្ហាជាក់ស្តែងដែលម្ចាស់អាជីវកម្មម្នាក់ៗបានជួបប្រទះ មិនមានបង្រៀននៅក្នុងសាលានោះទេ ប៉ុន្តែមាននៅ Pioneer Chapter វាជាការជួយជាគំនិត និងវិធីសាស្រ្តល្អៗ ដើម្បីឲ្យអាជីវកម្មរបស់សមាជិកទាំងអស់ដំណើរការបានរលូន និងមានភាពរីកចំរើន»។
អ្វីដែលពិសេសជាងនេះទៅទៀត លោក សំណាងប្រាប់ KHB News ថា នេះជាពេលវេលាដ៏ល្អបំផុត ដែលម្ចាស់អាជីវកម្មទាំងឡាយណាដែលកំពុងមានបំណងចង់បង្កើនប្រាក់ចំនូល ក៏ដូចជាទំនាក់ទំនងនិងចំណេះដឹងក្នុងការគ្រប់គ្រងអាជីវកម្មរបស់ខ្លួនពីអាជីវកម្មបែបគ្រួសារទៅជាអាជីវកម្មដែលមានស្តង់ដា គួរចូលរួមជាមួយ Pioneer Chapter។
លោកថ្លែងថា៖ «ថ្ងៃនេះអស់លោក លោកស្រីនឹងមានឳកាសជួបជាមួយម្ចាស់អាជីវកម្មជិត ៣០នាក់ ដែលអាចជួយលោកលោកស្រីក្នុងការបង្កើនប្រាក់ចំនូល»។
ជាបទពិសោធន៍ផ្ទាល់ខ្លួន លោកស្រី សំណាង លើកឡើងថា Pioneer Chapter ផ្តល់អត្ថប្រយោជន៍ច្រើនដល់លោក ដូចជា ការបង្កើនការលក់ ការទទួលបានចំណេះដឹង និង បទពិសោធន៍ល្អៗ និង មិត្តភាពយូរអង្វែងរវាងសមាជិក។ «ក្នុងរយៈពេលតែ ២ឆ្នាំប៉ុណ្ណោះ ដែលខ្ញុំចូលជាសមាជិកBNI ក្រុមហ៊ុន GFGI មានការរីកចម្រើនខ្លាំង តាមរយៈការទទួលបាននូវចំណេះដឹងបន្ថែមក្នុងការដឹកនាំ គន្លិះដោះស្រាយបញ្ហាល្អៗ និងការបង្កើតនូវទំនាក់ទំនងជាមួយនឹងម្ចាស់អាជីវកម្មថ្មីៗជាច្រើន។ ហើយអ្វីដែលសំខាន់ជាងនេះទៅទៀតនោះ គឺទទួលបានការលក់កើនឡើងគួរឱ្យកត់សម្គាល់ ដែលអាចនិយាយបានថា កើនឡើង ១ គុណនឹង ៥»។
ក្នុងនាមជាប្រធាន BNI Pioneer Chapter លោក ស្រី សំណាង អញ្ជើញម្ចាស់អាជីវកម្មទាំងឡាយ ដែលមានចំណាប់អារម្មណ៍ក្នុងការបង្កើនឱកាសអាជីវកម្ម មិត្តភាព និង ចំណេះដឹងបន្ថែម មកចូលរួមប្រជុំរៀងរាល់ថ្ងៃពុធ នៅអគារ Diamond Twin Towel ជាន់ទី១៥ ចាប់ពីម៉ោង 6:30 ដល់ ម៉ោង 8:40 ព្រឹក។
គួរបញ្ជាក់ផងដែរថា BNI Cambodia ត្រូវបានបង្កើតឡើងនៅឆ្នាំ២០១៣ ដែលបច្ចុប្បន្នមាន៣ តំបន់ និងចំនួន ២១ក្រុម និង សមាជិកសរុបចំនួន ៧៤០នាក់។ Pioneer Chapter ត្រូវបានបង្កើតឡើងនៅឆ្នាំ២០១៨ ដែលជាក្រុមទី៩ ស្ថិតនៅក្នុងតំបន់ភ្នំពេញ២ ជាមួយសមាជិក២៥នាក់។
