កម្ពុជាអនុញ្ញាតលើគម្រោងសាងសង់អាកាសយានដ្ឋានថ្មី

ដោយ: Vutha 28 មិថុនា 2019 04:06 PM

សម្តេចហ៊ុន សែន នាយករដ្ឋមន្រ្តីនៃកម្ពុជា បានប្រកាសកាលពីពេលថ្មីៗនេះថាខេត្តសៀមរាប នឹងត្រូវការអាកាសយានដ្ឋាន អន្តរជាតិ ថ្មីមួយទៀត ដើម្បីទទួលស្វាគមន៍នូវចំនួនភ្ញៀវទេសចរដែល កំពុងកើនឡើងនៅក្នុងតំបន់ជាបន្តបន្ទាប់។ សម្តេចនាយករដ្ឋមន្រ្តី ក៏បាន ប្រកាសពីការពង្រីកន្ថែមនូវ អាកាសយានដ្ឋានអន្តរជាតិធំៗទាំងពីរដែលមានស្រាប់នៅ ក្នុងប្រទេស ផងដែរ។ ‍«គោលដៅរបស់យើង គឺត្រូវទទួលបានភ្ញៀវទេសចរអន្តរជាតិប្រហែល ៧លាននាក់នៅត្រឹមឆ្នាំ២០២០ ហើយយើងជឿជាក់ យ៉ាងមុត មាំថា យើងនឹងធ្វើបាន‍»។ សម្តេចបានថ្លែងបែបនេះដោយបន្ថែមទៀតថា «ផែនការរបស់យើងគឺធ្វើឲ្យប្រសើរឡើង និងពង្រីកសមត្ថភាព នៃអាកាសយានដ្ឋានទាំងឡាយដែលមានស្រាប់ និង សាងសង់អាកាសយានដ្ឋានថ្មីៗបន្ថែមទៀត ដើម្បី អាចឲ្យយន្តហោះធុនធំដែលហោះហើររយៈឆ្ញាយអាចចុះចតបាន»។

សេចក្តីប្រកាសនេះ ត្រូវបានធ្វើឡើងក្រោយពេលដែល កិច្ចព្រមព្រៀងមួយដែលមានតម្លៃ ៨៨០ លានដុល្លារ ត្រូវបានធ្វើ ឡើងរវាង រាជរដ្ឋាភិបាលកម្ពុជា និង ក្រុមហ៊ុន Yunnan Investment Holding Ltd នៃប្រទេសចិន ស្តីពីការអភិវឌ្ឍន៍ និង សាងសង់អាកាសយានដ្ឋានថ្មីមួយនៅកម្ពុជា។ តាមរយៈកិច្ចព្រមព្រៀងនេះ ក្រុមហ៊ុនចិននឹងគ្រប់គ្រងអាកាសយានដ្ឋានអន្តរជាតិថ្មីនេះ ក្នុងរយៈពេល ៥៥ឆ្នាំ ក្រោមល័ក្ខខ័ណ្ឌ សាងសង់ ដំណើរការ និង ផ្ទេរ (BOT)។ អាកាសយានដ្ឋានថ្មីនេះ នឹងត្រូវស្ថាបនាលើផ្ទៃដីទំហំជាង ៧០០ហិកតា ដែលស្ថិតនៅក្នុងស្រុកសូត្រនិគម ដែលមានចម្ញាយ ប្រមាណ ៥០គីឡូម៉ែត្រពីទីរួមខេត្តសៀមរាប។ ការសាងសង់ត្រូវបានរំពឹងថានឹងចាប់ផ្តើមនៅដើមឆ្នាំ ២០១៨។