ម៉ាឡេស៊ីដាក់ឲ្យដំណើរការប្រព័ន្ធរថយន្តក្រុងល្បឿនលឿនថ្មី

ដោយ: Vutha 28 មិថុនា 2019 04:06 PM

ប្រព័ន្ធដឹកជញ្ជូនរថយន្តក្រុងល្បឿនលឿន (BRT)ដែលបង្កើតឡើង ដោយអាជ្ញាធរអភិវឌ្ឍន៍តំបន់អ៊ីសកានដារ (IRDA) និងរដ្ឋាភិបាលម៉ាឡេស៊ី ត្រូវបានគេរំពឹងថា នឹងដំណើរការនៅឆ្នាំ២០២១ ហើយនឹងគ្របដណ្ដប់តំបន់អ៊ីសកានដាម៉ាឡេស៊ី ចំនួន៩០%។ វានឹងមានផ្លូវប្រវែង៥១គីឡូម៉ែត្រ និង៣៩ស្ថានីយ៍។ យោងតាមនាយករដ្ឋមន្ត្រីម៉ាឡេស៊ី លោក Datuk Seri Najib Razak ប្រព័ន្ធBRTនេះ នឹងដើរតួជាឆ្អឹងខ្នង នៃហេដ្ឋារចនាសម្ព័ន្ធដឹកជញ្ជូនសាធារណៈ នៅអ៊ីសកាន់ដារម៉ាឡេស៊ី ក្នុងរយៈពេល២០ឆ្នាំខាងមុខ។

BRT គឺជាប្រព័ន្ធដឹកជញ្ជូនតាមរថយន្តក្រុងដ៏មានគុណភាពខ្ពស់ ដែលផ្ដល់នូវសេវាកម្មប្រកបដោយភាពជឿជាក់ ផាសុកភាព និងមានតម្លៃទាប ដល់ប្រជាជនមូលដ្ឋាន។ លើសពីនេះទៀត លោកក៏បានអះអាងដែរថា ប្រព័ន្ធ BRT នឹងត្រូវបានភ្ជាប់ទៅនឹងប្រព័ន្ធផ្លូវដែក (RTS) រថភ្លើងល្បឿនលឿន (HSR) និងសេវារថយន្តក្រុងអន្តរក្រុង។ ប្រព័ន្ធ BRT គឺជាគម្រោងមួយក្នុងចំណោមគំនិតផ្ដួចផ្ដើមចំនួន៤ ដែលត្រូវបានប្រកាសឡើងដោយនាយករដ្ឋមន្ត្រីម៉ាឡេស៊ី លោក Datuk Seri Najib Razak។ គំនិតផ្ដួចផ្ដើមចំនួន៣ផ្សេងទៀតមាន៖ ផែនការមេអភិវឌ្ឍន៍ជំនាញចូហរ គោលនយោបាយនិរន្តរភាពចូហរ និងកម្មវិធីលំនៅឋានប្រជាជនចំនួន៤ (PPR) ដែលមានទីតាំងនៅក្នុងទីក្រុងចូហរ។