ប៉េងហួតបរិច្ចាគ១០ម៉ឺនដុល្លារដល់មន្ទីរពេទ្រគន្ធបុប្ផាថ្ងៃបើកការដ្ឋាន PH Eco Mall

ដោយ: Vutha 28 មិថុនា 2019 04:06 PM

ក្រុមហ៊ុន ប៉េង ហួត គ្រុប បានបរិច្ចាកថវិកា១០ម៉ឺនដុល្លារដល់មន្ទីរពេទ្យគន្ធបុប្ផា ស្របថ្ងៃបើកការដ្ឋានសាងសង់គម្រោង ផ្សារ ទំនើប PH Eco Mall ដែលស្ថិតក្នុងគម្រោង ហ្គ្រេនស្តាផ្លាទីនីមបឹងស្នោ កាលពីថ្ងៃទី១៧ ខែធ្នូ កន្លងទៅនេះ ហើយក៏មានការចូលរួមពីសំណាក់ ថ្នាក់ដឹកនាំ បុគ្គលិកគ្រប់ជាន់ថ្នាក់របស់ក្រុមហ៊ុន ប៉េង ហួត គ្រុប រួមបញ្ចូលទាំងភ្ញៀវកិត្តិយស និងអ្នកកាសែតជាង២០០នាក់ផងដែរ។ គម្រោងនេះគ្របដណ្ដប់ដោយផ្សារទំនើប ដែលមានផ្ទៃសំណង់សរុប២៦ម៉ឺន៨ពាន់ម៉ែត្រក្រឡា និងផ្ទៃជួល ជិត៩ម៉ឺនម៉ែត្រ ក្រឡា រួមបន្ថែមទាំងចំណតរថយន្ត ដែលអាចចតរថយន្ត និងម៉ូតូបានដល់ទៅ ជាង ៥ពាន់គ្រឿង ឯណោះ។

គម្រោងផ្សារទំនើបនេះ នឹងនាំមកនូវភាពសម្បូរបែបថ្មីៗ ជាច្រើនដើម្បីបម្រើទទួលស្វាគមន៍អតិថិជនជាតិ និង អន្តរជាតិ នូវបទពិសោធន៍ថ្មីដែលមិនធ្លាប់មាននៅប្រទេសកម្ពុជា។ មិនត្រឹមតែប៉ុណ្ណោះគម្រោងនេះ នឹងពង្រីកនូវគម្រោងហ្គ្រេនស្តាផ្លា ទីនីម ឲ្យក្លាយជាទីក្រុងមួយដែលកាន់តែទំនើប និងសម្បូរបែបបន្ថែមទៅលើ សាលារៀនអន្តរជាតិ ដែលបានបើកដំណើរការ តាំងពីពាក់កណ្ដាលឆ្នាំ២០១៧ រួមបញ្ចូលទាំងក្លឹបកីឡា និងសួនកម្សាន្តបែបអឺរ៉ុប។ ក្នុងឱកាសនោះដែរ ក្រុមហ៊ុន បុរី ប៉េង ហួត គ្រុប ក៏បានចូលរួមចំណែកលើកស្ទួយវិស័យសាធារណៈសង្គម ដោយបរិច្ចាគថវិកាចំនួន១០ម៉ឺនដុល្លារ ដល់មន្ទីរពេទ្យកុមារគន្ធបុប្ផា ដើម្បីឲ្យកុមារទទួលបានឱកាស ក្នុងការព្យាបាលជំងឺដោយឥតគិតថ្លៃ។

លោក ប៊ុន យ៉ៃ គុណករ តំណាងមូលនិធិគន្ធបុប្ផា បានប្រាប់អ្នកសារព័ត៍មានថា នេះពុំមែនជាលើកទីមួយទេ ដែលក្រុមហ៊ុន ប៉េង ហួត គ្រុប បានចូលរួមចំណែកបរិច្ចាគថវិកាដល់ មូលនិធិ គន្ធបុប្ផា ដើម្បីជួយគាំទ្រដល់ដំណើរការមន្ទីរពេទ្យកុមារ ដែលធំជាងគេក្នុងប្រទេសកម្ពុជា ហើយដែលព្យាបាលកុមារនិងស្ត្រីមានផ្ទៃពោះដោយឥតគិតថ្លៃ សម្រាប់គ្រប់ៗគ្នាប្រកបទៅដោយគុណភាព ប្រសិទ្ធភាពខ្ពស់ និងឥតរើសអើង។ បើផ្អែកលើរបាយការណ៍របស់មន្ទីរពេទ្យបានឲ្យដឹងថា កុមារដែលមានជំងឺចំនួន១៤,៨៣៧,១៥៥ នាក់បានទទួលការពិនិត្យ ព្យាបាលនៅក្នុងផ្នែកពិគ្រោះជំងឺក្រៅ និងកុមារដែលមានជំងឺ និងរបួសធ្ងន់ៗ មានចំនួន១,៥១៦,៤៧១នាក់ ត្រូវបានជួយ សង្គ្រោះ និងបានជាសះស្បើយនៅ មន្ទីរពេទ្យគន្ធបុប្ផាក្នុង រយៈពេល២៤ឆ្នាំមកនេះ៕

អត្ថបទដោយ: Vutha

អានអត្ថបទមុន