ក្រសួងប្រើទុនជាង៥២លានរៀលលើការងារស្ថាបនាជួសជុលថែទាំផ្លូវថ្នល់ គិតត្រឹមខែសីហា ឆ្នាំ២០១៩
របាយការណ៍សង្ខេប ស្តីពីសមិទ្ធផលការងារ១ឆ្នាំ នៃអាណត្តិទី៦ របស់ក្រសួងសាធារណការ និងដឹកជញ្ជូន ដែលបានចេញផ្សាយនៅថ្ងៃទី២៨ ខែ តុលានេះ បានគូសបញ្ជាក់ថា ចាប់ពីខែកញ្ញា ឆ្នាំ២០១៨ ដល់ខែសីហាឆ្នាំ២០១៩ ការងារស្ថាបនាជួសជុលថែទាំផ្លូវថ្នល់ មានចំនួន ២១៦គម្រោង មានតម្លៃកិច្ចសន្យាសរុបចំនួន ៥២២ ៨៧៤លានរៀល។
ទន្ទឹមគ្នានេះ បើនិយាយដល់ការងារជួសជុលខួប និងថែទាំប្រចាំ(ផ្លូវ និង ស្ពាន)ប្រចាំឆ្នាំ២០១៨ សម្រេចបានជាង៩៤% ខណៈការការជួសជុលខួបផ្លូវ និងស្ពាន ប្រចាំឆ្នាំ២០១៩សម្រេចបានជា៣៤%។
របាយការណ៍ដដែល ក៏បានវាយតម្លៃខ្ពស់ចំពោះសមិទ្ធផលដែលសម្រេចបានក្នុងរយៈពេល១០០ថ្ងៃដំបូង ដើមអាណត្តិទី៦ នៃរាជរដ្ឋាភិបាល ដោយសមិទ្ធផលសំខាន់ៗទាំងនោះរួមមាន៖ ការដាក់ឱ្យដំណើរការកម្មវិធីថែទាំផ្លូវ យុទ្ធនាការជិះកង់ត្រួតពិនិត្យមើលផ្លូវ ការជួសជុលថែទាំផ្លូវ-ស្ពាន ដែលរងការខូចខាតដោយសារទឹកជំនន់ ការងារភស្តុភារកម្ម ការងារសហគ្រាសសាធារណៈ និងការងារព័ត៌មានវិទ្យាជាដើម។
បើយោងតាមរបាយការណ៍ ក្រសួងបានថ្លែងការកោតសរសើរចំពោះបណ្តាប្រទេសផ្តល់ជំនួយ ដៃគូអភិវឌ្ឍន៍ អង្គការជាតិ អន្តរជាតិ និងស្ថាប័នពាក់ព័ន្ធទាំងអស់ ដែលបានសហការ និងផ្តល់ការឧបត្ថម្ភគាំទ្រ ទាំងស្មារតី សម្ភារ ថវិកា និងបច្ចេកទេស លើការរៀបចំផែនការ និងការអនុវត្តសកម្មភាពការងារក្នុងវិស័យសាធារណការ និងជញ្ជូនដែលជាវិស័យអាទិភាពមួយក្នុងការជំរុញកំណើនសេដ្ឋកិច្ចជាតិ។ជាមួយគ្នានេះក្រសួងសាធារណៈការ បានប្តេជ្ងាជំរុញការអភិវឌ្ឍន៍ហេដ្ឋារចានាសម្ព័ន្ធបន្ថែមទៀតដើម្បីបង្ក លក្ខណៈងាយស្រួលជូនបងប្អូនប្រជាពលរដ្ឋ៕