Adidas កែច្នៃដបប្លាស្ទិកចាស់ ១.៨លានដប ដើម្បីសាងសង់តារាងបាល់ទាត់
អាម៉េរិក៖ ថ្មីៗនេះ ក្រុមហ៊ុនលក់សម្លៀកបំពាក់ និងសម្ភារៈកីឡាដ៏ល្បីល្បាញរបស់សហរដ្ឋអាម៉េរិក Adidasបានសាងសង់តារាងបាល់ទាត់មួយសម្រាប់សាលារៀន នៅក្នុងតំបន់ Miami រដ្ឋ Florida ដោយប្រើប្រាស់ដបប្លាស្ទិកចាស់ៗប្រហែល ១.៨លានដប ដែលប្រមូលមកពីកោះដាច់ស្រយាល តំបន់ឆ្នេរ និងសហគមន៍ជាប់សមុទ្រមួយចំនួន ហើយបើគិតជាទំងន់សរុបគឺប្រហែល ៤ ម៉ឺនផោន។
ការសាងសង់នេះ ត្រូវបានគេកោតសរសើរថាជាដំណោះស្រាយថ្មី ដែលមានប្រយោជន៍ខ្លាំងចំពោះបរិស្ថាន ជាពិសេសការកាត់បន្ថយការប្រើប្រាស់ប្លាស្ទិក និងជ័រកៅស៊ូលើការសាងសង់តារាងបាល់ទាត់ ជាពិសេសការជម្រុញឲ្យបរិស្ថាននៅតំបន់ជាប់សមុទ្រ កាន់តែមានភាពប្រសើរឡើង។
លោក James Carnes មន្រ្តីយុទ្ធសាស្រ្តផ្នែកម៉ាក្សយីហោសកលរបស់Adidas បានលើកឡើង ថា តារាងបាល់ទាត់នេះ ត្រូវបានសាងសង់ពីដបប្លាស្ទិកដែលប្រមូលចេញ ពីតំបន់ក្បែរសមុទ្រ ដើម្បីរួមចំណែកកាត់បន្ថយការបំពុលទឹកសមុទ្រ។
លោកបន្ថែមថា៖ «យើងមានជំនឿចិត្តថា តាមរយៈកីឡា យើងមានថាមពលក្នុងការផ្លាស់ប្តូរ ហើយនេះគឺជាការបង្ហាញសកម្មភាពរបស់យើងទៅលើជំនឿនោះ។ ក្រៅពីជាកន្លែងសម្រាប់អត្តពលិកវ័យក្មេង តារាងបាល់ទាត់នេះក៏បង្ហាញពីការទទួលខុសត្រូវរួមរបស់ពួកយើង ក្នុងការបញ្ចប់បញ្ហាកាកសំណល់ប្លាស្ទិកផងដែរ»។
ជាទៅ ស្មៅសិប្បនិម្មិតនៃតារាងបាល់ទាត់ស្ទើរតែ ត្រូវបានផលិតឡើងពីសារធាតុជ័រកៅស៊ូ ព្រោះវាមានលក្ខណៈពិសេស ដែលអាចឲ្យបាល់លោតបានល្អ។ ប៉ុន្តែក្រុមហ៊ុន Adidas បានយកដបប្លាស្ទិកចាស់ៗមកសម្អាត និង ថែរក្សាយ៉ាងល្អ បន្ទាប់មកទើបបម្លែងវាជាធាតុផ្សំនៃស្មៅសិប្បនិម្មិត្តសម្រាប់ក្រាលតារាង។ គេជឿថាទីលានថ្មីនេះ នឹងមានឥទ្ធិពលកាន់តែប្រសើរចំពោះការប្រកួត ជាពិសេសលក្ខខណ្ឌសុវត្ថិភាពរបស់កីឡា ព្រោះវាអាចជួយកាត់បន្ថយគ្រោះថ្នាក់នៅពេលមានការដួល ឬរអិលលើទីលានប្រកួត។
គួររំលឹកថា ការសាងសង់តារាងបាល់ទាត់ខាងលើនេះ ជាជំនួយឧបត្ថមមួយរបស់ក្រុមហ៊ុន Adidas ទៅកាន់វិទ្យាល័យ Miami Edison ដើម្បីជាការរួចចំណែក បង្កើនទីលានកីឡាដែលមានចេរភាពចំពោះបរិស្ថាន លើកកម្ពស់ការកែច្នៃសំណល់ និងបញ្ចប់បញ្ហាកាកសំណល់ប្លាស្ទិក៕
