រដ្ឋាភិបាលបង្គាប់ឲ្យក្រសួង៤ និងសមត្ថកិច្ច ចាត់វិធានការការដ្ឋានសំណង់គ្មានលិខិតអនុញ្ញាត និងខុសបច្ចេកទេស
ភ្នំពេញ៖ រាជរដ្ឋាភិបាលបានសម្រេចដាក់ចេញវិធានការចាំបាច់មួយចំនួន ដោយបង្គាប់ឲ្យក្រសួងចំនួន ៤ និងអង្គភាពសមត្ថកិច្ច ចាត់វិធានការចំពោះការដ្ឋានសំណង់ទាំងឡាយដែលគ្មានលិខិតអនុញ្ញាត និងសាងសង់ខុសលក្ខណៈបច្ចេកទេស ប៉ុន្ដែត្រូវលើកលែងសំណង់លំនៅឋានផ្ទាល់ខ្លួនរបស់ប្រជាពលរដ្ឋ។
តាមសេចក្តីជូនដំណឹងរបស់ទីស្តីការគណៈរដ្ឋមន្ត្រី ដែលចុះហត្ថលេខាដោយលោក ហ៊ីង ថូរ៉ាក់ស៊ី រដ្ឋលេខាធិការប្រចាំការនៃទីស្ដីការគណៈរដ្ឋមន្រ្តី ដែល KHB Media ទទួលបាននៅថ្ងៃទី ០៦កក្កដានេះបានបង្ហាញថា រាជរដ្ឋាភិបាលបានសម្រេចដាក់ចេញវិធានការចាំបាច់មួយចំនួន ចំពោះការដ្ឋានសំណង់សណ្ឋាគារ អគារស្នាក់នៅរួម អគារពាណិជ្ជកម្ម អគាររោងចក្រ អគារសិប្បកម្ម និងសំណង់ផ្សេងៗទៀត ដែលគ្មានលិខិតអនុញ្ញាត និង/ឬសាងសង់ខុសលក្ខណៈបច្ចេកទេស លើកលែងតែសំណង់លំនៅឋានផ្ទាល់ខ្លួនរបស់ប្រជាពលរដ្ឋ។
ទីស្តីការគណៈរដ្ឋមន្ត្រីបន្តថា វិធានការចាំបាច់ដែលរាជរដ្ឋាភិបាលសម្រេចដាក់ចេញស្ថាប័នពាក់ព័ន្ធរួមមាន៖ ទី១-ក្រសួងរ៉ែ និងថាមពល ចាត់វិធានការមិនឲ្យមានការផ្គត់ផ្គង់ថាមពលអគ្គិសនីដល់ការដ្ឋានសំណង់ ទី២-ក្រសួងឧស្សាហកម្ម និងសិប្បកម្ម ចាត់វិធានការមិនឲ្យមានការផ្គត់ផ្គង់ទឹកស្អាតដល់ការដ្ឋានសំណង់ ទី៣-ក្រសួងសាធារណការ និងដឹកជញ្ជូន មិនត្រូវអនុញ្ញាតឲ្យតភ្ជាប់លូចូលបណ្តាញលូសាធារណៈ ទី៤-ក្រសួងស្ថាប័ន និងអង្គភាពមានសមត្ថកិច្ច មិនត្រូវផ្តល់លិខិតអនុញ្ញាតឲ្យប្រកបអាជីវកម្ម និងទី៥-ក្រសួងព័ត៌មាន និងអង្គភាពមានសមត្ថកិច្ច មិនត្រូវអនុញ្ញាតឲ្យផ្សព្វផ្សាយពាណិជ្ជកម្ម។
លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពល បានថ្លែងថា លោកបានទទួលលិខិតជូនដំណឹងនេះហើយ ដោយក្រសួងក្រសួងរ៉ែ និងថាមពល បាននិងកំពុងធ្វើជាហូរហែរកន្លងមកនេះ ហើយក្រសួងនឹងចាប់ផ្ដើមបន្តធ្វើកិច្ចការងារនេះបន្ថែមទៀត ស្របតាមលិខិតជូនដំណឹងរបស់ទីស្ដីការគណៈរដ្ឋមន្រ្តី។
លោកបន្តថា ក្រសួងរ៉ែ និងថាមពល នឹងចាត់វិធានការតាមការណែនាំនេះ ទៅតាមច្បាប់ដែលបានចែងជាធរមាន ដើម្បីចូលរួមទប់ស្កាត់ការដ្ឋានសំណង់ខុសច្បាប់ ក្នុងការធានាអាយុជីវិតមនុស្ស ទ្រព្យសម្បត្តិ សុវត្ថិភាព និងគុណភាពសំណង់ទូទាំងប្រទេស។
លោកបញ្ជាក់ថា៖«ខ្ញុំបានឃើញសេចក្ដីជូនដំណឹងហ្នឹងហើយ ឥឡូវយើងកំពុងកំណត់ពេលប្រជុំពិភាក្សាគ្នាលើបញ្ហានេះ ការពិតយើងក៏ធ្លាប់បានធ្វើកន្លងមកជាបន្តបន្ទាប់ដែរ។ ករណីទាំងនេះ បើសិនជាយើងរកឃើញភាពមិនប្រក្រតីណាមួយ គឺយើងប្រគល់កិច្ចការនេះ ជូនទៅ EDC ដើម្បីផ្ដាច់ភ្លើង ឬមិនផ្គត់ផ្គង់ភ្លើងឲ្យការដ្ឋាននោះទេ»។
គួររំឭកថា មួយរយៈចុងក្រោយនេះ គេសង្កេតឃើញញថា អាជ្ញាធរនៅខេត្តព្រះសីហនុ និងរាជធានីភ្នំពេញ បាននិងកំពុងចេញបញ្ជាឲ្យផ្អាកសកម្មភាពការដ្ឋានសំណង់ដែលរកឃើញភាពមិនប្រក្រតីជាបន្តបន្ទាប់ ដើម្បីឲ្យម្ចាស់ការដ្ឋានទាំងនោះ បំពេញបែបបទទៅតាមច្បាប់ និងពង្រឹងគុណភាពសំណង់របស់ខ្លួន ចៀសវាងបង្កហានីភ័យណាមួយកើតឡើង៕
