តើមជ្ឈមណ្ឌលពាណិជ្ជកម្ម និងពិព័រណ៍ថ្មីB2B Park មានលក្ខណៈពិសេសអ្វីខ្លះ?
មជ្ឈមណ្ឌលពាណិជ្ជកម្ម និងតាំងពិព័រណ៍លំដាប់អន្តរជាតិ B2B Park ដែលជាការវិនិយោគដោយវិនិយោគិនក្នុងស្រុកស្ថិតនៅតាមមហាវិថីហាណូយក្នុងខណ្ឌសែនសុខ រាជធានីភ្នំពេញគ្រោងនឹងបើកដំណើរការក្នុងត្រីមាសទី ១ ឆ្នាំ ២០២០ ខាងមុខ ខណៈការសាងសង់គម្រោងទាំងមូលនឹងរួចរាល់នៅចុងឆ្នាំនេះ។
លោក ធួន ស៊ីណាន អគ្គនាយក B2B Park បានប្រាប់ KHB ថា មជ្ឈមណ្ឌល B2B Park ដ៏ធំមួយនេះមានកម្ពស់ ៦ ជាន់ មានទំហំអាគារ ១ម៉ឺន ២ពាន់ម៉ែត្រការ៉េ ដោយឡែកផ្ទៃដីជុំវិញអគារវិញមានទំហំរហូតជាង២ហិចតា។
អគារនេះសាងសង់ឡើង ដោយស្ថាបត្យករក្នុងស្រុក តែមានរួមបញ្ចូលពីរចនាបទបរទេសខ្លះ ដើម្បីរំលេចចេញរូបរាងមជ្ឈមណ្ឌលប្រកបដោយ ភាពទាកទាញ ផាសុខភាព និងគិតពីសុវត្ថិភាពជាចំបង់។ បន្ថែមពីនេះ លោកថា B2B Park ក៏មានចំណតរថយន្តដ៏ធំទូលាយ ងាយស្រួលដល់ការចរាចរណ៍មិនឱ្យកក់ស្ទះថែមទៀត។
ជាមួយនឹងទីតាំងដ៏ល្អ ធំទូលាយ និងមានការចនាអាគារដ៏ទាក់ទាញហើយនោះ មជ្ឈមណ្ឌលពាណិជ្ជកម្មនេះ នឹងត្រូវបានបែងចែកដាច់ដោយឡែក ពីគ្នារវាងជាន់សម្រាប់ដាក់តាំង-លក់ប្រភេទផលិតផល ក៏ដូចជាសេវាកម្ម ក្រុមហ៊ុនទាំងអស់ នឹងទទួលបានផលប្រយោជន៍បន្ថែមជាច្រើនទៀត ដូចជាតម្លៃជួលទីតាំងថោកសមរម្យ រាល់ការផ្សព្វផ្សាយផលិតផល មានប្រសិទ្ធភាពខ្ពស់។ នេះបើតាមការបញ្ជាក់បន្ថែមពី លោក ស៊ីណាន ។
ដោយសារស្ថិតនៅក្នុងតំបន់ទីប្រជុំជន ដែលកំពុងតែមានសក្ដានុពលផងនោះ មជ្ឈមណ្ឌលពាណិជ្ជកម្ម និងពិព័រណ៍ P2B Park ត្រូវបានម្ចាស់វិនិយោគរំពឹងថា នឹងក្លាយជាមជ្ឈមណ្ឌលផ្សារបោះដុំ ដាក់តាំង និងលក់ផលិតផលចម្រុះ ម្ហូបអាហារ និងភេសជ្ជៈដ៏សម្បូរបែប ដោយប្រើឧបករណ៍អេឡិចត្រូនិកបែបព័ត៌មានវិទ្យាដ៏ទំនើប។បន្ថែមពីនេះទៀតនោះ ក៏មានកន្លែងតាំងពិព័រណ៍ រោងភាពយន្ត និងការិយាល័យជួលជាដើម ដើម្បីឆ្លើយស្របទៅនឹងការចង់បាន របស់បណ្តាក្រុមហ៊ុននានាឆ្នាំថែមទៀត។
លោកអគ្គនាយក B2B Park នៅតែអះអាងថា ប្រភេទទីផ្សារ និងទីតាំងរបស់ B2B Park មានលក្ខណៈផ្សេងពីគេ និងមិនប្រកួតប្រជែងជាមួយផ្សារទំនើបដែលមានស្រាប់ ដូច្នេះមជ្ឈមណ្ឌលនេះនឹងអាចទាក់ទាញអតិថិជនគ្រប់វ័យបានច្រើន។
គួរបញ្ជាក់ដែរថា មជ្ឈមណ្ឌលពាណិជ្ជកម្មនេះ នឹងមានការរៀបចំកម្មវិធីពិព័រណ៍ពាណិជ្ជកម្មប្រចាំខែ និងកម្មវិធីផ្សព្វផ្សាយផ្សេងៗ ជារឿងរាល់សប្ដាហ៍ ក្រោមការគាំទ្រពីក្រសួងពាណិជ្ជកម្ម ក្រសួងទូរគមនាគមន៍ ក្រសួងការបរទេស ក្រសួងទេសចរណ៍ និងសមាគមទេសចរណ៍អាស៊ី-ប៉ាស៊ីហ្វិក ផងដែរ។ ទាំងអស់នេះហើយដែលជាហេតុផល សម្រាប់បណ្តាក្រុមហ៊ុន និងហាងលក់ទំនិញនានា ចាំបាច់ជ្រើសយកមជ្ឈមណ្ឌលពាណិជ្ជកម្ម B2B ParK ធ្វើជាដៃគូលក់របស់ខ្លួន។
ក្រុមអ្នកវិនិយោគ នៅតែចាត់ទុកថា នៅពេលដែលមានវត្ថមានមជ្ឈមណ្ឌលពាណិជ្ជកម្ម និងពិព័រណ៍ B2B Parkនេះឡើង មិនត្រឹមតែក្លាយជាផ្នែកមួយដ៏សំខាន់ក្នុងការផ្តល់កន្លែងលក់ទំនិញ និងកន្លែងតាំងពិព័រណ៍លំដាប់អន្តរជាតិនៅប៉ែកខាងជើងរាជធានីភ្នំពេញប៉ុណ្ណោះទេ។មជ្ឈមណ្ឌលនេះ ក៏នឹងរួមចំណែកជួយអភិវឌ្ឍនសេដ្ឋកិច្ចកម្ពុជាថែមទៀតផង៕