ការវិនិយោគរបស់ជប៉ុនផ្តល់ផលចំណេញសេដ្ឋកិច្ចកម្ពុជាអ្វីខ្លះ?

ការវិនិយោគរបស់ជប៉ុនផ្តល់ផលចំណេញសេដ្ឋកិច្ចកម្ពុជាអ្វីខ្លះ?

សហស្ថាបនិក្រុមហ៊ុនអារ៉ាខាវ៉ា លោក អៀង សុធារ៉ា លើកឡើងថា ប្រសិនបើកម្ពុជាមានវិនិយោគិនជប៉ុនកាន់តែច្រើនវានឹងជួយរុញសេដ្ឋកិច្ចរបស់កម្ពុជា ទៅមុខកាន់​តែ​លឿន និងអាចឲ្យអ្នករកស៊ីកម្ពុជា អាចរៀនសូត្រពីរបៀបធ្វើការរបស់ជប៉ុនផង​ដែរ។

ការលើកឡើងបែបនេះ បន្ទាប់ពីរូបលោកបានឆ្លងកាត់បទពិសោធន៍ នៃការរកស៊ីជាមួយវិនិយោគិនបរទេស មកបណ្តាប្រទេសផ្សេងៗជាច្រើននោះ ជាពិសេសវិនិយោគិន
របស់ប្រទេស​ជប៉ុន។

លោក អៀង សុធារ៉ា ពាណិជ្ជករមួយរូបរបស់កម្ពុជា និងជាសហស្ថាបនិកក្រុមហ៊ុនអារ៉ាខាវ៉ា ដែលកំពុងសហការអភិវឌ្ឍន៍លំនៅឋានស្តង់ដារជប៉ុនដំបូងគេនៅកម្ពុជា បានឲ្យដឹងតាមរយៈកិច្ចសម្ភាសន៍​ ជាមួយប្រព័ន្ធផ្សព្វផ្សាយក្នុងស្រុកមួយថា គុណតម្លៃរបស់វិនិយោគិនជប៉ុន ដែលមកបោះទុន វិនិយោគនៅកម្ពុជា គឺពិតជាអាចឲ្យយើងរៀនសូត្របានច្រើន។

លោកបញ្ជាក់ថា៖« ការសហការគ្នាជាមួយជប៉ុន ពិតជាមានភាពងាយស្រួល ដោយជប៉ុនតែងតែមានខន្ដី, សច្ចៈ, កត្តញ្ញូ ទោះបីជាជប៉ុនមិនបានប្រកាសខ្លួនថា ជាអ្នកកាន់សាសនាព្រះពុទ្ធពិតមែន ប៉ុន្ដែតែងតែយកការប្រតិបត្តិ តាមបែបព្រះពុទ្ធសា​ស​នា ដូចជាខន្ដី, សច្ចៈ, កត្តញ្ញូ គឺប្រកាន់ភ្ជាប់រហូត»

សហស្ថាបនិក្រុមហ៊ុនអារ៉ាខាវ៉ារូបនេះ បានលើកឡើងថា៖ «ខ្ញុំចង់ឃើញវត្តមានអ្នកវិនិ​យោគ​ជប៉ុន កាន់តែច្រើននៅកម្ពុជា ព្រោះមាន ២ចំណុចសំខាន់ដែល វិនិយោគិនកម្ពុជា ​អាចរៀនសូត្រ​ពីវិនិយោគគិនជប៉ុនបាន ទី១៖ វាអាចបង្កើន និងរុញសេដ្ឋកិច្ចរបស់ប្រទេសកម្ពុជាទៅមុខ និង ទី២៖ យើងអាចរៀនសូត្រពីការធ្វើការល្អរបស់ជប៉ុនបានច្រើន»

លោកបន្តថា តាមបទពិសោធន៍ ដែលលោកបានរកស៊ីជាមួយ អ្នកវិនិយោគជប៉ុននោះ គឺឃើញថាអ្នកវិនិយោគជប៉ុន មានការគិតល្អិតល្អន់ គិតយូរ ប៉ុន្តែបើគិតរួចរាល់ហើយនោះ គឺមានសកម្មភាពលឿន ដោយមិនរង់ចាំយូរ ហើយនៅពេលរកស៊ីចំណេញ ពួកគេបានជួយឧបត្ថម្ភដល់អ្នកខ្វះខាត សង់សាលារៀន  ទាំងអស់ជាមូលហេតុដែលលោកចង់ឃើញអ្នកវិនិយោគជប៉ុន មកវិនិយោគនៅកម្ពុជាច្រើនថែមទៀត។

ក្រុមហ៊ុន​ជប៉ុន​មួយ​នេះ បាន​សម្រេច បោះ​ទុន​វិនិយោគ​ទឹក​ប្រាក់​ជាង ៧០ លាន​ដុល្លារ​អាមេរិក សាង​សង់​លំនៅឋានអារ៉ាខាវ៉ា បែប​ខុនដូ ដែល​មាន​តម្លៃ​សមរម្យ សម្រាប់​ប្រជាជន​កម្ពុជា។

លោក អៀង សុធារ៉ា​លើក​ឡើងថា លំនៅឋាន​អារ៉ាខាវ៉ា នឹង​ក្លាយ​ជា​លំនៅឋាន​សហគមន៍​មួយ ប្រកប​ដោយ​សុខុដមរមនា។ គម្រោង​ខុនដូ អារ៉ាខាវ៉ា បាន​ចាប់ផ្ដើមសាងសង់​ឡើង​កាលពីខែ​វិច្ឆិកា ឆ្នាំ២០១៧ ដោយដំណាក់កាលទី១នេះ គ្រោងនឹង​បញ្ចប់​ការសាងសង់​អគារ​ចំនួន១០ អគារ កម្ពស់​២១ជាន់ស្មើៗនៅ​ឆ្នាំ២០២០ខាងមុខ។

ជុំវិញការលើកឡើងពីវិនិយោគគិនជប៉ុននេះដែរ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ ធ្លាប់បានថ្លែងថា បច្ចុប្បន្នជប៉ុនបាន​វិនិ​យោគ​ស្ទើរគ្រប់វិស័យ ដើម្បីធ្វើជាមូលដ្ឋានសម្រាប់ធ្វើ​ការ និងរស់នៅរយៈពេលវែង​នៅ​កម្ពុជា។

លោកបញ្ជាក់ថា អ្នកវិនិយោគជប៉ុន ពេលចូលទៅកាន់ប្រទេសណាហើយ ពួកគេតែង​តែស្នាក់នៅ និងធ្វើការរយៈពេលវែងនៅប្រទេសនោះ នេះជាមូលហេតុដែលពួកគេសិក្សា​រយៈពេលវែង មុនមកវិនិយោគ​នៅកម្ពុជា

ជាងនេះទៀត បើនិយាយដល់ការវិយោគរបស់ជប៉ុនឯណោះវិញ ប្រទេសជប៉ុនត្រូវបានពិភពលោកទទួលស្គាល់ថា ជាប្រទេសនាំមុខគេខាងទំនើបកម្មហេដ្ឋារចនាសម្ព័ន្ធ គមនាគមន៍។ គ្រប់ហេដ្ឋារចនាសម្ព័ន្ធទាំងអស់ សុទ្ធតែមានលក្ខណៈពិសេសលើសគេត្រង់ ជប៉ុនតែងគិតពីគុណភាពជាចំបង់ ការរចនា តម្លៃ និងចិរភាពបរិស្ថានជា​ដើម។

អ្នកជំនាញខាងសេដ្ឋកិច្ចរូបនេះ ក៌បានសង្កត់ធ្ងន់ដែរថា ក្នុងសាងសង់ហេដ្ឋារចនាសម្ព័ន្ធ និងសំណង់​អគារ​ជាដើម ជប៉ុនតែងតែគិតគូរជាចាំបាច់នូវផែនការក្នុងការការពារ និងថែទាំហេដ្ឋារចនាសម្ព័ន្ធទាំងនោះ ឲ្យបានរយៈពេលយូរអង្វែង។ មិនតែប៉ុណ្ណោះ ការគិតគូរអំពីប្រសិទ្ធភាពសេដ្ឋកិច្ច ជប៉ុនតែងតែព្យាយាមអភិវឌ្ឍនូវគម្រោងទាំងឡាយណា ដែលមានការចំណាយសមរម្យ ហើយផ្ដល់អត្ថប្រយោជន៍ច្រើនចំពោះសេដ្ឋកិច្ចជាតិ។

ហើយអ្វីដែលកាន់តែពិសេសទៀតនោះ លោកថា ក្នុងការសាងសង់នីមួយៗ ជប៉ុនគេតែងតែខិតខំកាត់បន្ថយឱ្យកាន់តែខ្ពស់នូវហានិភ័យ ការចំណាយនិងផលប៉ះពាល់បរិស្ថាន ប៉ុន្ដែព្យាយាមធ្វើការកែច្នៃ និងប្រើប្រាស់ធនដែលមានស្រាប់ឱ្យបានកាន់តែច្រើន។

ជារួម លោកថា ដោយសារចំណុចទាំង នេះហើយ ទើបជប៉ុនអាចអភិវឌ្ឍហេដ្ឋារចនាសម្ព័ន្ធរបស់ខ្លួនបានយ៉ាងល្អប្រសើរហើយថែមទាំងត្រូវបានរដ្ឋាភិបាលនៃប្រទេសជាច្រើនជ្រើសរើសជាដៃគូអភិវឌ្ឍន៍សម្រាប់ប្រទេសពួកគេទៀត​ផង។

គួរបញ្ជាក់ថា គិតត្រឹមខែកញ្ញា ឆ្នាំ២០១៩ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគ ជប៉ុនចំនួន១៤១គម្រោង ក្នុងទុនវិនិយោគប្រមាណ ២.៥ប៊ីលានដុល្លារអាមេរិក ក្នុងនោះគម្រោងចំនួន ៦៦ ស្ថិតនៅក្នុងតំបន់សេដ្ឋកិច្ចពិសេស ដែលមានទុនវិនិយោគប្រមាណ ៣៤០លានដុល្លារអាមេរិក៕

អត្ថបទដោយ: Pisey