ឥណ្ឌូនេស៊ី៖ កាលពីថ្ងៃ ចន្ទ ទី ២៩ ខែ មេសា ឆ្នាំ២០១៩ រដ្ឋមន្រ្តីក្រសួងផែនការ ឥណ្ឌូនេស៊ី បានប្រាប់ប្រព័ន្ឋផ្សព្វផ្សាយថា រដ្ឋាភិបាលនឹងធ្វើការផ្លាស់ប្ដូររដ្ឋធានីរបស់ខ្លួន ចេញពីទីក្រុងហ្សាកាតា។
លោករដ្ឋមន្ត្រីបានបញ្ជាក់ថា លោក Joko Widodo ដែលជាប្រធាននាធិបតីនៃប្រទេសឥណ្ឌូនេស៊ី នៅក្នុងកិច្ចប្រជុំគណៈរដ្ឋមន្រ្តីកាលពីថ្ងៃចន្ទ បានសម្រេចចិត្តថា នឹងប្ដូររដ្ឋធានីចេញពីកោះជ្វា (ក្រុងហ្សាកាតា) ទោះបីជាមិនទាន់បានកំណត់ទីតាំងថ្មីនៃរដ្ឋធានីក៏ដោយ។
យ៉ាងណាក៏ដោយ សារព័ត៌មានក្នុងស្រុកមួយចំនួនបានចុះផ្សាយថា ទីក្រុង Palangkaraya នៃកោះបរនេអូ អាចនឹងត្រូវជ្រើសរើសជាទីតាំងថ្មី សម្រាប់ធ្វើជារដ្ឋធានីនៃប្រទេសឥណ្ឌូនេស៊ី។
តើមូលហេតុអ្វីប្ដូររដ្ឋធានីចេញពីហ្សាកាតា?
តាមពិតទៅគំនិតនៃការផ្លាស់ប្ដូរដ្ឋធានី ត្រូវបានលើកឡើងជាច្រើនលើកច្រើនសារ មកហើយ ពោលគឺតាំងពីឆ្នាំ ១៩៤៥ នៅពេលដែលប្រទេសនេះទទួលបានឯករាជ្យពីប្រទេសហូឡង់មកម្ល៉េះ។
តាមការស្រាវជ្រាវមួយកាលពីឆ្នាំ ២០១៦ បានបង្ហាញថា ហ្សាកាតាជាទីក្រុងដែលមានការកកស្ទះចរាចរណ៍ដ៏អាក្រក់ជាងគេក្នុងពិភពលោក។ ក្រសួងផែនការឥណ្ឌូនេស៊ី បានចេញរបាយការណ៍មួយថា ការកកស្ទះក្នុងក្រុងហ្សាកាតា បានធ្វើឱ្យខាតបង់ដល់សេដ្ឋកិច្ចជាតិ ក្នុងទំហំទឹកប្រាក់ប្រមាណ ៦.៨ពាន់លានដុល្លារ។
ការស្រាវជ្រាវមួយទៀតបង្ហាញថា មួយភាគធំនៃទីក្រុងហ្សាកាតា កំពុងលិចចូលទៅក្នុងទឹកជារៀងរាល់ឆ្នាំ ហើយនៅឆ្នាំ ២០៥០ ទីក្រុងនេះអាចប្រឈមនឹងបញ្ហាលិចទឹកជាប្រចាំ។
ជម្រើសសម្រាប់រដ្ឋធានីថ្មី៖
រយៈពេលមួយថ្ងៃពេញ កិច្ចប្រជុំគណៈរដ្ឋមន្រ្តីឥណ្ឌូនេស៊ី ត្រូវបានធ្វើឡើងដោយការពិភាក្សាអំពីការជ្រើសរើសទីតាំងថ្មីសម្រាប់ធ្វើជារដ្ឋធានី ប៉ុន្ដែដំណឹងនៃទីតាំងថ្មីមិនទាន់ប្រកាសជាផ្លូវការនៅឡើយ។
ទោះបីជាយ៉ាងណា គេដឹងថាទីក្រុង Palangkaraya នៃកោះបរនេអូ ដែលមានចម្ងាយជាង ១០០គីឡូម៉ែត្រ ពីក្រុងហ្សាកាតា ប្រាកដនឹងក្លាយជារដ្ឋធានីថ្មីនៃប្រទេសឥណ្ឌូនេស៊ី។ ផ្អែកលើលក្ខណ្ឌភូមិសាស្ត្រ នយោបាយ និងប្រវត្តិសាស្រ្ត ទីនេះជាកន្លែងដែលសក្តិសមជាងគេ ហើយក៏ជាកន្លែងដែលប្រធានាធិបតី Joko Widodo ពេញចិត្តជាងគេដែរ។
សូមបញ្ជាក់ថា ការប្ដូររដ្ឋធានីនឹងចាប់ផ្ដើមធ្វើឡើងពីការផ្លាស់ប្ដូរអគារការិយាល័យរដ្ឋាភិបាល អគាររដ្ឋសភា ព្រឹទ្ធសភា និងអគារស្ថានទូតបរទេសជាដើម។ ការប្ដូររដ្ឋធានីនេះ មានឥទ្ធិពលយ៉ាងខ្លាំងទៅលើ វិស័យសំណង់ អចនទ្រព្យ និងពាណិជ្ជកម្មជាដើម៕
ប្រភព៖ bbc.co.uk