ក្រុមហ៊ុនលំដាប់ពិភពលោកធំៗប្រាំនឹងចូលរួមអភិវឌ្ឍអគារណាហ្គាទី៣ នៅកម្ពុជា

ភ្នំពេញ៖ មានក្រុមហ៊ុនលំដាប់ពិភពលោកចំនួនប្រាំ ដែលមកពីបណ្តាប្រទេសផ្សេងៗគ្នាដើម្បីអភិវឌ្ឍគម្រោង​​​​ណាហ្គា ទី៣ ដែលស្ថិតនៅលើទីតាំងអតីតអគារប៊ូឌីញ ទោះបីបច្ចុប្បន្នគម្រោងដែលគ្រោងនឹង​ចាយ​ទុនជាង ៤ពាន់លានដុល្លារអាមេរិកនេះ មិនទាន់កំណត់កាលបរិច្ឆទសាងសង់ក៏ដោយ។ នេះដោយយោតាម របាយការណ៍ត្រីមាសទី១ ប្រចាំឆ្នាំ ២០១៩ របស់ក្រុមហ៊ុនណាហ្គាខប (Naga Corp Ltd) ដែលគ្រប់គ្រងកាស៊ីណូ​ណាហ្គាវើល (Naga World Complex) ដ៍ធំ​នៅ កម្ពុជា។​​​​ ក្រុមហ៊ុនទាំងប្រាំនោះនឹងទទួលបន្ទុកភារកិច្ចផ្សេងៗគ្នាលើការអភិវឌ្ឍគម្រោងណាហ្គាទី៣។ ក្រុមហ៊ុនទាំងនោះមាន ដូចជា៖ ទី១. ក្រុមហ៊ុន Steel man Partners ដែលមានមូលដ្ឋាននៅទីក្រុងឡាស់ វេហ្គាស់ រដ្ឋណីវវាដា សហរដ្ឋអាមេរិក ជាក្រុម​ហ៊ុនស្ថាបត្យកម្មលំដាប់អន្តរជាតិ ដែលមានជំនាញលើការរៀបចំស្ថាបត្យកម្ម កន្លែងកម្សាន្ត ការរចនាផ្នែកខាងក្នុង និង​ការ​រៀបចំផែនការមេ។ ក្រុមហ៊ុននេះ ជាអ្នករចនាប្លង់អគារ និងរចនាផ្នែកខាងក្នុងនៃអគារណាហ្គាទី២ ហើយរួមទាំងណា​ហ្គាទី​១ដែលកំពុងបន្តស្ថាបនាផ្នែកខាងក្នុងឡើងវិញផងដែរ។ បន្ថែម​​ពីនេះ ក្រុមហ៊ុនអាមេរិកមួយនេះ បានគូរប្លង់ និងរចនាអគារ​កាស៊ីណូ និងរីសតជាង ៣ពាន់ គម្រោងមកហើយនៅទូទាំងពិភពលោក។ ទី២. ក្រុមហ៊ុន Dr Tan LM Architect ដឹកនាំដោយលោកបណ្ឌិត Tan Loke Mun ដែលជាអ្នកជំនាញគូរប្លង់រចនា​ផ្នែកខាង​ក្នុង​ និងជាស្ថាបត្យករដ៏ល្បីល្បាញ ទទួលបានពានរង្វាន់ពីប្រទេសម៉ាឡេស៊ី ហើយលោកក៏ជាសមាជិកគណ​ស្ថាបត្យ​ករ Lembaga Arkitek Malaysia និងជាសាស្រ្តាចារ្យបង្រៀនលើមុខវិជ្ជាស្ថាបត្យ​កម្មនៅតាមបណ្តាសាកលវិទ្យាល័យមួយ​ចំនួនផងដែរ នៅប្រទេសម៉ាឡេស៊ី។ មិនតែប៉ុណ្ណោះ ក្រុមហ៊ុនរបស់លោក មាន​​​​បទពិសោធជាច្រើនផងដែរ លើការរៀប​ចំផែនការមេសម្រាប់ការអភិវឌ្ឍទីក្រុង គម្រោងអគារពាណិជ្ជ​កម្ម និងគម្រោងលំនៅដ្ឋានជាច្រើនក្នុងប្រទេសម៉ាឡេស៊ី។ បន្ថែមពីនេះក្រុមហ៊ុនក៏ទទួលបានការដឹកនាំក្រុម​​​ការងារលើការពិគ្រោះយោបល់ខាងវិស្វកម្ម ក្នុងការអភិវឌ្ឍគម្រោងណាហ្គាទី២ ដោយជោគជ័យកន្លង​មក។ ទី៣. ក្រុមហ៊ុន Jacobs Engineering Services Sdn Bhd ជាក្រុមហ៊ុនចុះបញ្ជីផ្សារហ៊ុនក្រុងញូវយ៉កជាមួយ​នឹងប្រាក់​ចំណូល​ប្រចាំឆ្នាំប្រមាណ ១៥ពាន់លានដុល្លារអាមេរិក។ ក្នុងឆ្នាំ២០១៨ ក្រុមហ៊ុននេះ ទទួលបានចំណាត់ថ្នាក់លេខ១ លើជំនាញវិស្វកម្ម ហើយក៏ជាវិស្វកម្មស៊ីវិល និងជាអ្នកពិគ្រោះយោបល់លើរចនាសម្ព័ន្ធអគារណា​ហ្គា​​ទី១ និងណាហ្គាទី២ ទៀតងផង។ ទី៤. ក្រុមហ៊ុន KWA Consultant Sdn Bhd នឹងទទួលបន្ទុកផ្នែកប្រឹក្សាយោបល់លើវិស្វកម្មមេកានិច និងអគ្គិសនី ហើយ​ក្រុមហ៊ុន​នេះក៏ជាអ្នកប្រឹក្សាផ្នែកទាំងពីរលើការអភិវឌ្ឍណាហ្គាទី១ ណាហ្គាទី២ និងគម្រោងផ្សេង​ៗទៀតរបស់កាស៊ីណូ​ណាហ្គាវើលដ៍។ ក្រុមហ៊ុន KWA បានបង្កើតឡើងក្នុងឆ្នាំ២០០៧ ហើយក្រុមហ៊ុននេះក៏មានបទពិសោធជា​ច្រើនផងដែរ​លើអគារខ្ពស់ៗ គម្រោងលំនៅដ្ឋានក្នុងប្រទេសម៉ាឡេស៊ី រួមទាំងគម្រោងអភិវឌ្ឍន៍បដិសណ្ឋារកិច្ច និងគម្រោងរោង​ចក្រផលិតថាមពលអគ្គិសនីផងដែរ។ ទី៥. ក្រុមហ៊ុន ELP Quantity Surveyors Sdn Bhd ជាក្រុមហ៊ុនដែលមានជំនាញលើការអង្កេតបរិមាណ​លើគម្រោង​សាង​សង់ (quantity surveyor) ដែលមានការិយាល័យកណ្តាលនៅប្រទេសម៉ាឡេស៊ី និងសាខាការិយាល័យនៅប្រទេស​វៀត​ណាម។ ក្រុមហ៊ុននេះក៏ជាអ្នកពិគ្រោះយោបល់លើការសាងសង់ណាហ្គាទី២ និងការសាងសង់គម្រោងផ្លូវក្រោមដី (Naga City Walk) របស់កាស៊ីណូណាហ្គាវើលដ៍ផងដែរ។ សូមរំលឹកថា គម្រោងណាហ្គាទី៣នឹងត្រូវសាងសង់លើផ្ទៃដីសរុបជាង ១ម៉ឺន ៦ពាន់ម៉ែត្រការ៉េ។ តាមការសិក្សា បឋម គម្រោងនេះ នឹងមានគម្រោងសាងសង់ចម្រុះដូចជា សណ្ឋាគារ Condotel កម្ពស់ ៦៦ជាន់ ចំនួនពីរអគារសណ្ឋាគារកម្ពស់ ៥៣ជាន់ ចំនួនពីរអគារ អគារសម្រាប់កម្សាន្ត កម្ពស់ ១២ជាន់ មួយអគារ និងអគារ​ខុនដូរកម្ពស់ ៥៥ជាន់ មួយអគារ ជាដើម។ បន្ទាប់ពីបញ្ចប់ការសាងសង់ Naga៣ ដែលរួមបញ្ជូលជាមួយសាខាទី១  និងទី២នឹងក្លាយ​ទៅជាកន្លែងកម្សាន្ត​ចម្រុះ​តាមដងទន្លេនៃប្រទេសកម្ពុជា ហើយក៏នឹងក្លាយជាកន្លែងកម្សាន្តដ៏លេចធ្លោមួយផងដែរនៅលើពិភពលោក។ គម្រោងណាហ្គាទី៣របស់ប្រតិបត្តិករអាជីវកម្មកាស៊ីណូធំជាងគេនៅកម្ពុជានេះ គ្រោងបើកទ្វារនៅឆ្នាំ២០២៥​។ ហើយ​កាលពីឆ្នាំ ២០១៨ ក្រុមហ៊ុនកាស៊ីណូនេះបានបង់ពន្ធជូនរដ្ឋចំនួន ៨.៨លានដុល្លារអាមេរិក ហើយរក​បានប្រាក់ចំណេញ​បន្ទាប់ពីបង់ពន្ធរួចមានរហូតដល់ជិត ៤០០លានដុល្លារអាមេរិក។ ទិន្នន័យដែលទទួលបានដោយសារព័ត៌មានជប៉ុន Nikkei Asian Review ចេញផ្សាយកាលពីថ្ងៃទី ១៨ ខែមេសា ឆ្នាំ ២០១៩ បានបង្ហាញ​ថា គិតត្រឹមឆ្នាំ ២០១៨ កាស៊ីណូចំនួន ១៥០ ទទួលបានអាជ្ញាប័ណ្ណប្រតិបត្តិការអាជីវកម្មកាស៊ីណូនៅកម្ពុជា ហើយរដ្ឋប្រ​មូលពន្ធពីវិស័យនេះបានប្រមាណ ៥៦លានដុល្លារអាមេរិក ខណៈដែលច្បាប់គ្រប់គ្រង​កាស៊ីណូថ្មីនឹងត្រូវអនុម័តនៅចុងឆ្នាំ ​២០១៩៕