រូបសំណាក់គោបូរៈទី៥នៃរង្វង់មូលស្រអែមខេត្តព្រះវិហារបញ្ចប់ការសាងសង់១០០ភាគរយ

រូបសំណាក់គោបូរៈទី៥នៃរង្វង់មូលស្រអែមខេត្តព្រះវិហារបញ្ចប់ការសាងសង់១០០ភាគរយ

ព្រះវិហារ៖ រូបសំណាក់គោបូរៈទី៥ នៃប្រាសាទព្រះវិហារដែល ជានិមិត្តរូបប្រវត្តិសាស្ត្រដ៏ល្បីល្បាញរបស់បុព្វបុរសខ្មែរយើងត្រូវបានមន្ទីសាធារណការនិងដឹកជញ្ជូនខេត្តព្រះវិហារសាងសង់នៅលើរង្វង់មូលស្រអែម មកដល់ពេលនេះការដ្ឋានស្ថាបនារួចរាល់ ១០០ភាគរយហើយ។

ការកសាងរូបសំណាក់គោបូរៈទី៥ នៃប្រាសាទព្រះវិហារគឺជាមួយផ្នែកនៃប្រាសាទព្រះវិហារលើរង្វង់មូលស្រអែមនេះមើលទៅអណ្ដែតស្អាតណាស់ហើយមានសោភ័ណ្ឌភាពល្អ ទុកសម្រាប់ក្មេងជំនាន់ក្រោយបានស្គាល់។ ពាកព័ន្ធការងារសាងសង់រូបសំណាក់គោបូរៈទី៥ ខាងលើនេះលោក សំ លាងទ្រី ជាប្រធានមន្ទីរសាធារណការនិងដឹកជញ្ជូនខេត្តព្រះវិហារបានឱ្យដឹងថា រូបសំណាកគោបរះទី៥នៃប្រាសាទព្រះវិហារលើរង្វង់មូលស្រអែមជាសមិទ្ធផលមួយថ្មីទៀត ដោយបានបង្ហាញរូបរាងយ៉ាងស្រស់ស្អាត នៅលើទឹកដីនៃតំបន់ព្រំដែនកម្ពុជា-ថៃ ក្នុងភូមិសាស្ត្រ ភូមិស្រអែម ឃុំស្រអែម ស្រុកជាំក្សាន្ត ខេត្តព្រះវិហារ។ 

លោកសំ លាងទ្រី បានបញ្ជាក់ថាចំពោះការសាងសង់រូបសំណាក់គោបូរៈទី៥ នៃប្រាសាទព្រះវិហារនេះគឺមន្ទីរសាធារណការនិងដឹកជញ្ជូនខេត្តព្រះវិហារ ជាអ្នកទទួលខុសត្រូវក្នុងការសាងសង់ទាំងស្រុង ក្នុងនោះត្រូវសាងសង់រង្វង់មូលដែលមានអង្កត់ផ្ចិត ៤០ម៉ែត្រ រូបសំណាក់គោបូរៈទី៥ នៃប្រាសាទព្រះវិហារ ខ្នាត ១លើ២៥ ស្មើនឹង ៧៥ភាគរយនៃតួប្រាសាទព្រះវិហារដើម មានរូបនាគ២ ហើយនៅលើរង្វង់មូលនេះក៏នឹងមានការដាំស្មៅ ផ្កានិងដើមឈើ លម្អយ៉ាងស្រស់ស្អាតផងដែរ។

ប្រធានមន្ទីរខេត្តព្រះវិហារបានឲ្យដឹងថាខេត្តព្រះវិហារបានបង្កើតអោយមានរូបសំណាក់គោបូរៈទី៥ នៃប្រាសាទព្រះវិហារដែលជានិមិត្តរូបប្រវត្តិសាស្ត្រដ៏ល្បីល្បាញរបស់បុព្វបុរសខ្មែរយើង លើរង្វង់មូលស្រអែម ដែលមានទាំងសួនកំសាន្ត និងកន្លែងហាត់ប្រាណថែមទៀត។ សមិទ្ធផលថ្មីមួយនេះ វាមិនត្រឹមតែលើកសោភណ្ឌភាពខេត្តព្រះវិហារអោយមានភាពស្រស់បំព្រងប៉ុណ្ណោះទេ តែវាបានទាក់ទាញ ភ្ញៀវជាតិ អន្តរជាតិអោយទៅដើរលែងកំសាន្តនៅ ខេត្តនេះកាន់តែច្រើនឡើង ហើយក៏បានបង្ហាញពីស្នាដៃដែលគ្មានពីររបស់ថ្នាក់ដឹកនាំនិងមន្ត្រីនៅក្នុងខេត្តនេះផងដែរ។ 

គួររំលឹកថារង្វង់មូលស្រអែមនេះបានធ្វើពិធីបែបសាសនាដោយ ក្រុងពាលី បញ្ចុះបឋមសិលាសាងសង់ កាលពីរសៀលថ្ងៃទី១១ ខែធ្នូ ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់ ពី លោកមាស សុភា ទេសរដ្ឋមន្ត្រី ប្រធានក្រុមការងារថ្នាក់ជាតិ ចុះជួយខេត្តព្រះវិហារ៕

អត្ថបទដោយ: Nary