អ្នកជំនាញ៖ គម្រោងខុនដូដែលមានតម្លៃសមរម្យនៅតែទាញការវិនិយោគ

ដោយ: Pisey 8 មេសា 2020 10:17 AM

ទីក្រុងរណប កាំកូស៊ីធី ស្ថិតនៅតំបន់អភិវឌ្ឍន៍ បឹងពោងពាយ ខណ្ឌឫស្សីកែវ ខាងជើងរាជធានីភ្នំពេញ

ភ្នំពេញ៖ អំឡុងពេលប៉ុន្មានឆ្នាំចុងក្រោយនេះ ការអភិវឌ្ឍ និងសាងសង់ខុនដូនៅកម្ពុជា ហាក់មានសន្ទុះរីកចម្រើនគួរឱ្យកត់សម្គាល់ ស្របពេលដែលអចលនទ្រព្យប្រភេទផ្សេងទៀត ក៏មានការរីកចម្រើនខ្លាំងមិនចាញ់គ្នាឡើយ។ បន្ថែមលើគម្រោងដែលមានរួចហើយនោះ រយៈចុងក្រោយនេះ ក្រុមហ៊ុនវិនិយោគទាំងក្នុង និងក្រៅស្រុក បានផ្តើមងាកមកវិនិយោគ លើគម្រោងខុនដូតម្លៃសមរម្យ សម្របតាមស្ថានភាពនៃតម្រូវការទីផ្សារកម្រិតមធ្យមវិញម្ដង។

(រូបតំណាង)

អ្នកជំនាញផ្នែកវាយតម្លៃអចលនទ្រព្យនៅកម្ពុជា បានថ្លែងរម្លឹកថា នាអំឡុងឆ្នាំ២០១៩ ទីផ្សារខុនដូនៅកម្ពុជាបានកើនឡើងយ៉ាងច្រើន ហើយសុទ្ធជាគម្រោងយក្ស ដែលមានខុនដូរចនាប្រកបដោយផាសុខភាព ហើយមានតម្លៃខ្ពស់ តែបច្ចុប្បន្នទីផ្សារខុនដូរនៅកម្ពុជា មានភាពប្រែប្រួលហើយ ព្រោះទាំងអ្នកវិនិយោគ និងអ្នកទិញបានផ្លាស់ទំនោរ ងាកមកផ្តោតការចាប់អារម្មណ៍លើគម្រោងខុនដូរមានតម្លៃសមរម្យវិញ។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានថ្លែងបញ្ជាក់កាលពីពេលថ្មីៗនេះថា កំណើនប្រជាពលរដ្ឋនៅក្នុងរាជធានីភ្នំពេញ ជំរុញឱ្យតម្រូវការអគារស្នាក់នៅរួមប្រភេទខុនដូបន្តកើនឡើងជារៀងរាល់ឆ្នាំ ហើយក្លាយជាទីផ្សារដែលមានកំណើននាំមុខគេ នៅក្នុងរយៈពេលដ៏ខ្លី។ សព្វថ្ងៃអតិថិជនក្នុងស្រុកប្រមាណជាង ៥០% និយមទិញខុនដូដែលមានតម្លៃសមរម្យ ពិសេសខុនដូដែលមានតម្លៃចន្លោះពី ៥០,០០០ ទៅ ៨០,០០០ដុល្លារ ក្នុង១យូនីត។

(អ្នកនាង អាន សុធីតា នាយិកាប្រចាំប្រទេស នៃក្រុមហ៊ុន CBRE Cambodia)

នាយិរូបនេះបានអះអាងថា ការងាកមកវិនិយោគផ្តោតលើប្រភេទខុនដូមានតម្លៃមធ្យម បានជួយឱ្យម្ចាស់គម្រោងទទួលបានជោគជ័យច្រើន។ ដោយសារតម្លៃទាប លទ្ធភាពទិញខនដូររស់នៅរបស់ពលរដ្ឋក្នុងស្រុក ក៏មានការកើនឡើង។ និន្នាការនេះ បានដើរស្របគ្នានឹងទំនោររបស់ពលរដ្ឋវ័យក្មេងរបស់កម្ពុជា ដែលភាគច្រើនពួកគេនិយមបែបផែនរស់នៅឯករាជ្យ មានលក្ខណៈផ្ទាល់ខ្លួនច្រើន។ ឯឧបសគ្គត្រូវធ្វើដំណើរឆ្ងាយទៅកន្លែងធ្វើការជារៀងរាល់ថ្ងៃ និងស្ថានភាពកកស្ទះចរាចរណ៍កាន់តែអាក្រក់នៅក្នុងទីក្រុង ក៏ជាមូលហេតុសំខាន់ជម្រុញឱ្យតម្រូវការទិញខុនដូរស់នៅមានការកើនឡើងដូចគ្នា។

(លោកឧកញ៉ាបណ្ឌិត គីម ហ៊ាង អគ្គនាយកក្រុមហ៊ុនខ្មែររៀលអ៊ីស្ទេត)

សម្រាប់អគ្គនាយកក្រុមហ៊ុនខ្មែររៀលអ៊ីស្ទេត លោកឧកញ៉ាបណ្ឌិត គីម ហ៊ាង លោកយល់ថា ប្រជាពលរដ្ឋខ្មែរភាគច្រើនជាគ្រួសារដែលមានចំណូលមធ្យម ដូច្នេះអ្នកអភិវឌ្ឍន៍គួរផ្ដោតលើគម្រោងខុនដូ ឬគម្រោងលំនៅឋានដែលមានតម្លៃសមរម្យ ទើបសមស្របនឹងស្ថានភាពជីវភាពរបស់ពលរដ្ឋ។

លោកបានបញ្ជាក់ថា បើធៀបនឹងឆ្នាំ២០១៨ អំឡុងឆ្នាំ២០១៩ តម្រូវការលំនៅឋាន ជាផ្ទះល្វែង ឬផ្ទះចម្រុះប្រភេទក្នុងបុរីនានា មានការកើនឡើងខ្លាំង ហើយគម្រោងខុនដូ និងលំនៅឋាន ដែលមានតម្លៃក្រោម ១០ម៉ឺនដុល្លារ ទទួលបានប្រជាប្រិយភាព ទាក់ទាញអតិថិជនក្នុងស្រុកមកទិញបានច្រើនជាងគេ។

(លោក Chen Tai An ប្រធានក្រុមហ៊ុន Yunnan ShengMao Investment)

ពាក់ព័ន្ធនឹងការវិនិយោគលើគម្រោងខុនដូតម្លៃសមរម្យនេះដែរ លោក Chen Tai An ប្រធានក្រុមហ៊ុន Yunnan ShengMao Investment ដែលវិយោគលើគម្រោងខុនដូ ក្នុងមជ្ឈមណ្ឌលពាណិជ្ជកម្មថ្រាយអ៊ឹម (TCC Market) បានថ្លែងបញ្ជាក់ថា គម្រោងខុនដូរបស់ស្ថាប័នលោក បានប្រកាសបើកដំណើរការលក់ជាផ្លូវការ តាំងថ្ងៃទី១៨ មករា ឆ្នាំ២០២០ នេះមកម្លេះ។

គម្រោងខុនដូថ្មីនេះ ក៏ផ្តោតលើពលរដ្ឋដែលមានចំណូលទាប និងមធ្យមដែរ ដោយផ្តើមតម្លៃចាប់ពី ៩៥០ដុល្លារ ក្នុង ១ម៉ែត្រការ៉េ ជាតម្លៃទាបជាងទីផ្សារសម្រាប់រាជធានីភ្នំពេញតែម្តង។ លោក Chen Tai An បានអះអាងថា គម្រោងវិនិយោគនេះ នឹងរួមចំណែកផ្តល់លទ្ធភាពឱ្យពលរដ្ឋខ្មែរកាន់តែច្រើន មានលំនៅឋានរស់នៅសមរម្យ។ តាមរយៈគម្រោងខនដូរបស់TCC Market ពលរដ្ឋដែលមានប្រាក់ចំណូលទាប និងមធ្យម នឹងមានលទ្ធភាពទិញ ឬបង់រំលស់បាន។

(លោក ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់)

បើតាមការបញ្ជាក់របស់រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ក្នុងសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ នាអំឡុងខែធ្នូ ឆ្នាំ២០១៩ កន្លងមកនេះ ប្រទេសកម្ពុជានៅត្រូវការលំនៅឋានជាង ១លានខ្នង បន្ថែមទៀតក្នុងអំឡុងឆ្នាំ២០៣០។ នាឪកាសនោះ លោករដ្ឋមន្រ្តី ក៏បានបង្ហាញការប្តេជ្ញាគាំទ្រ និងជំរុញរាល់ការវិយោគលើគម្រោងបង្កើតខុនដូ និងលំនៅឋាន ដែលមានតម្លៃសមរម្យបន្ថែមទៀត ដើម្បីបង្គ្រប់តម្រូវការផ្ទះស្នាក់នៅសមរម្យ ស្របតាមកំណើនប្រជាជននៅប្រទេសកម្ពុជានាថ្ងៃអនាគត៕