រដ្ឋាភិបាលថៃផ្ដល់ទូរថភ្លើង៤ ដល់កម្ពុជានៅចុងខែមេសា
ភ្នំពេញ៖ ទូរថភ្លើងដឹកអ្នកដំណើរប្រភេទ DMU (Diesel Multiple Unit) ចំនួន ៤ទូ ត្រូវបានរដ្ឋាភិបាលថៃ ផ្តល់ជូនកម្ពុជានៅចុង ខែ មេសា ឆ្នាំ ២០១៩ ដើម្បីចូលរួមជួយលើកកម្ពស់ការដឹកជញ្ជូនតាមផ្លូវដែកនៅកម្ពុជា ឲ្យកាន់តែប្រសើរ បន្ទាប់ពីមានការស្នើសុំពីសម្ដេចនាយករដ្ឋមន្ត្រី ហ៊ុន សែន កាលពីពេលថ្មីៗនេះ។
ការប្រកាសផ្តល់ទូរថភ្លើងដល់កម្ពុជានេះ ក្នុងជំនួបពិភាក្សាការងាររវាង លោក ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូនកម្ពុជា និង លោក Arkhom Termpittayapaisith រដ្ឋមន្ត្រីក្រសួងសាធារណការ និងដឹកជញ្ចូនថៃ កាលពីថ្ងៃទី ៣ ខែ មេសា ឆ្នាំ ២០១៩ នៅទីស្ដីការក្រសួងសារធារការ និង ដឹកជញ្ជូន។
លោក ស៊ុន ចាន់ថុល ឲ្យដឹងថា ជំនួបនេះ បានផ្ដោតសំខាន់លើសេចក្ដីព្រាងនៃកិច្ចព្រមព្រៀងនៃការដឹកជញ្ជូនតាមផ្លូវដែករវាងកម្ពុជា-ថៃ ហើយភាគីថៃត្រៀមប្រគល់ទូររថភ្លើងចំនួន ៤ទូ មកកម្ពុជា។ លោកបន្តថា៖«ភាគីទាំងពីរបានពិភាក្សាពីការរៀបចំពិធីចាក់បេតុងជានិមិត្តរូបតភ្ជាប់ស្ពាននៃច្រកទ្វារអន្តរជាតិ ស្ទឹងបត់ ដែលសម្ដេច ហ៊ុន សែន និងនាយករដ្ឋមន្ត្រីថៃអញ្ជើញជាអធិបតីរួមគ្នា»។
ជាមួយគ្នានេះដែរ លោក Arkhom Termpittayapaisith បានថ្លែងថា រថភ្លើងដឹកអ្នកដំណើរប្រភេទ DMU (Diesel Multiple Unit) ផលិតដោយក្រុមហ៊ុន Hitachi របស់ជប៉ុន។ ជាប្រភេទខ្សែរថភ្លើងដឹកអ្នកដំណើរមានចំនួន ៤ទូ ដែលក្នុងមួយទូៗដឹកអ្នកដំណើរបាន ៨០នាក់។
លោកបន្តថា លើសពីនេះ ភាគីថៃបានឯកភាពឲ្យមានវគ្គសិក្សាបន្ថែមទៀតស្តីពី DMU ដល់មន្ត្រីកម្ពុជា ដើម្បីជួយឲ្យមន្ត្រីកម្ពុជាឲ្យមានជំនាញ និងសមត្ថភាពច្បាស់លាស់ក្នុងការបើកបរ ថែទាំ និងប្រើប្រាស់រថភ្លើងដែលថៃនឹងប្រគល់ជូនភាគីកម្ពុជា ហើយកម្មវិធីបណ្តុះបណ្តាលអាចនឹងចាប់ផ្តើមនៅសប្តាហ៍ក្រោយ។
សូមបញ្ជាក់ថា ក្នុងជំនួបនោះ ភាគីទាំងពីរ បានពិនិត្យ និងពិភាក្សាគ្នាលើពាក្យពេចន៍មួយចំនួននៃកិច្ចព្រមព្រៀងដឹកជញ្ជូនតាមផ្លូវដែក កម្ពុជា-ថៃ ដែលភាគីថៃបានស្នើសុំបញ្ជាក់ពីភាគីកម្ពុជា។ ក្នុងនោះ ភាគីទាំងពីរបានឯកភាពគ្នាទាំងស្រុងលើពាក្យពេចន៍នៅក្នុងកិច្ចព្រមព្រៀង។
ទាក់ទងនឹងវិស័យផ្លូវដែកនេះ ក្នុងវេទិកា រាជរដ្ឋាភិបាល-ផ្នែកឯកជន លើកទី១៨ កាលពីថ្ងៃទី ២៩ ខែ មីនា ឆ្នាំ ២០១៩ សម្ដេច ហ៊ុន សែន បានស្នើទៅដល់ឯកអគ្គរដ្ឋទូតចិន វៀតណាម និងជប៉ុន ក្នុងការជួយផ្ដល់ក្បាលរថភ្លើង និងអភិវឌ្ឍន៍ផ្លូវដែកនៅកម្ពុជា។ សម្ដេចថា៖«បើមិត្ដវៀតណាមសល់បំរុងចាស់ៗ សុំខ្លះមើល ថៃឲ្យខ្លះហើយ វៀតណាមឲ្យខ្លះមក ហើយឯកអគ្គរដ្ឋទូតចិននៅឯណា សុំក្បាលរថភ្លើងខ្លះនឹង...មើលអាចាស់ៗ ស្រុករបស់លោកឯង សុំមើល ខ្ញុំត្រូវការពន្លឿនអាហ្នឹង ដឹកតាមរទេះភ្លើង ដឹកតាមកាប៉ោលមក ខ្ញុំសុំខ្លះមក»៕
អត្ថបទដោយ:
Koemsoeun
សូមបញ្ជាក់ថា ក្នុងជំនួបនោះ ភាគីទាំងពីរ បានពិនិត្យ និងពិភាក្សាគ្នាលើពាក្យពេចន៍មួយចំនួននៃកិច្ចព្រមព្រៀងដឹកជញ្ជូនតាមផ្លូវដែក កម្ពុជា-ថៃ ដែលភាគីថៃបានស្នើសុំបញ្ជាក់ពីភាគីកម្ពុជា។ ក្នុងនោះ ភាគីទាំងពីរបានឯកភាពគ្នាទាំងស្រុងលើពាក្យពេចន៍នៅក្នុងកិច្ចព្រមព្រៀង។
ទាក់ទងនឹងវិស័យផ្លូវដែកនេះ ក្នុងវេទិកា រាជរដ្ឋាភិបាល-ផ្នែកឯកជន លើកទី១៨ កាលពីថ្ងៃទី ២៩ ខែ មីនា ឆ្នាំ ២០១៩ សម្ដេច ហ៊ុន សែន បានស្នើទៅដល់ឯកអគ្គរដ្ឋទូតចិន វៀតណាម និងជប៉ុន ក្នុងការជួយផ្ដល់ក្បាលរថភ្លើង និងអភិវឌ្ឍន៍ផ្លូវដែកនៅកម្ពុជា។ សម្ដេចថា៖«បើមិត្ដវៀតណាមសល់បំរុងចាស់ៗ សុំខ្លះមើល ថៃឲ្យខ្លះហើយ វៀតណាមឲ្យខ្លះមក ហើយឯកអគ្គរដ្ឋទូតចិននៅឯណា សុំក្បាលរថភ្លើងខ្លះនឹង...មើលអាចាស់ៗ ស្រុករបស់លោកឯង សុំមើល ខ្ញុំត្រូវការពន្លឿនអាហ្នឹង ដឹកតាមរទេះភ្លើង ដឹកតាមកាប៉ោលមក ខ្ញុំសុំខ្លះមក»៕
