បណ្ឌិត លឹម សុខតៃ ជាវិស្វករម្នាក់ដែលចូលរួមសិក្សា គម្រោងផ្លូវល្បឿនលឿនពីភ្នំពេញទៅបាវិត
ភ្នំពេញ៖ ផ្លូវល្បឿនលឿនពីភ្នំពេញទៅក្រុងបាវិត (Expressway) បានបញ្ចប់ការសិក្សាគម្រោងរួចរាល់ហើយ ដោយរង់ចាំតែពេលវេលាសាងសង់នាពេលឆាប់ៗខាងមុខនេះតែប៉ុណ្ណោះ។ ផ្លូវនេះគ្រោងចំណាយថវិកាប្រមាណ ៣.៨០០ លានដុល្លារអាមេរិក ប៉ុន្ដែមហាជននៅមិនទាន់ដឹងនៅឡើយទេថា នរណាជាអ្នកសិក្សាគម្រោងនោះ? ជាជនជាតិខ្មែរ ឬ បរទេស? KHB Media សូមណែនាំលោកអ្នក ឲ្យស្គាល់អំពីប្រវត្តិខ្លះៗរបស់ បណ្ឌិត លឹម សុខតៃ ដែលបានចូលរួមចំណែកយ៉ាងសកម្មក្នុងការសិក្សាគម្រោងស្ថាបនាផ្លូវមួយខ្សែរដ៏សំខាន់នេះ។ លោក ជាអតីតសាស្ត្រាចារ្យស្ថាបត្យករ នៅវិទ្យាស្ថានបច្ចេកវិទ្យាកម្ពុជា (តិចណូ) The Institute de Technologie du Cambodge ហើយបច្ចុប្បន្នជាសាស្ត្រាចារ្យផ្នែកស្ថាបត្យករ វិស្វកម្ម និងជាព្រឹទ្ធបុរសនៃសាកលវិទ្យាល័យន័រតុន និងជាមន្រ្តីជំនាញរបស់ក្រសួងសាធារណៈការ និងដឹកជញ្ជូនផងដែរ។ រៀបរាប់អំពីប្រវត្តិរបស់ខ្លួន បណ្ឌិត លឹម សុខតៃ ប្រាប់ថា លោកជាកូនអ្នកស្រែចចំការ។ នៅឆ្នាំ ១៩៧៧ លោក បានចាកចេញពីស្រុកកំណើតមកបន្តការសិក្សានៅអនុវិទ្យាល័យទួលស្វាយព្រៃ ហើយក្រោយមកបានជាប់ជាសិស្សពូកែផ្នែកគណិតវិទ្យា ក៏បានដូរទៅសិក្សានៅវិទ្យាល័យបាក់ទូកវិញកាលពីឆ្នាំ ១៩៩០ រហូតដល់ឆ្នាំ ១៩៩៣ លោកបានបញ្ចប់មធ្យមសិក្សាទុតិយភូមិ (បាក់ឌុប)។ ដោយសម័យនោះ គ្រួសារមានជីវភាពមិនធូរធា លោកបានបន្តការសិក្សានៅសាកលវិទ្យាល័យមួយ ដើម្បីបំពេញបំណងចង់ធ្វើជាគ្រូបង្រៀនផ្នែកគណិតវិទ្យា លោកក៏បានចូលរៀនបំប៉ន ត្រៀមប្រឡងចូលបម្រើការងារជាគ្រូបង្រៀន។ 
ក្នុងអំឡុងពេលនោះ លោក ក៏បានសាកល្បងចូលប្រឡងនៅសាលាតិចណូ។ ដោយសារមានសំណាងរួមជាមួយនឹងសមត្ថភាព លោកក៏បានជាប់នៅសាលាលំដាប់អន្តរជាតិមួយនេះ ផ្នែកវិស្វករ ដោយសម័យនោះ គេប្រើប្រាស់ភាសាបារាំង ដែលធ្វើឲ្យមានការពិបាកខ្លាំងក្នុងការសិក្សា ព្រោះលោកមិនសូវចេះភាសាបារាំង។ ក្នុងអំឡុងពេលរៀនវិស្វករនោះ លោកបានឆ្លៀតចូលបម្រើការងារនៅក្រុមហ៊ុនធ្វើក្ដាបន្ទះ (ក្ដាប្លាកេ) មួយរបស់ចិនកាលពីអំឡុងឆ្នាំ ១៩៩៥។ ខណៈរកការងារបានធ្វើ លោកមានគំនិតចង់បោះបង់ចោលការសិក្សានៅសាសាតិចណូ ប៉ុន្ដែដោយមានការគិតពិចារណាម្ដងហើយម្ដងទៀត លោកសុខចិត្តបន្តការសិក្សា ដោយបោះបង់ការងារដែលទើបតែរកបាននោះ។ នៅពេលនោះ និស្សិត លឹម សុខតៃ ត្រៀមចាប់ផ្ដើមតាំងចិត្តបន្តការសិក្សា ព្រមទាំងខំប្រឹងឲ្យខ្លាំងជាងមុនទ្វេរដង។ លុះដល់ឆ្នាំ ១៩៩៩ លោករៀននៅសាលាតិចណូបានដល់ឆ្នាំទី ៤ ដោយប្រឡងជាប់អាហារូបករណ៍ ទៅរៀននៅប្រទេសប៊ែលហ្សិក ផ្នែកវារីសាស្រ្ត (ទឹក)។ ក្រោយពីបញ្ចប់ការសិក្សានៅប្រទេសប៊ែលហ្សិក លោកមានគម្រោងចង់បម្រើការនៅតាមអង្គការបរទេស ប៉ុន្ដែបំណងនេះ ត្រូវបានគ្រូជនជាតិបារាំង មិនអនុញ្ញាតឲ្យធ្វើឡើយ ដោយជម្រុញលោកឲ្យមកធ្វើជាគ្រូបង្រៀន នៅសាលាតិចណូវិញ ព្រោះបារាំងជាអ្នកផ្ដល់អាហារូបករណ៍ និងបណ្ដុះបណ្ដាលឲ្យលោក បានក្លាយជាគ្រូបង្រៀននៅសាលារបស់គេ។ 
នៅឆ្នាំ ២០០១ លោក បានប្រឡងជាប់អាហារូបករណ៍ថ្នាក់ អនុបណ្ឌិតនៅប្រទេសប៊ែលហ្សិកទៀត។ បន្ទាប់ពីបញ្ចប់ថ្នាក់អនុបណ្ឌិតនេះ លោកក៏ត្រឡប់មកធ្វើជាគ្រូបង្រៀននៅសាលាតិចណូវិញដដែល។ លុះដល់ឆ្នាំ ២០០៣ លោក បានជាប់អាហារូបករណ៍ ទៅបន្តការសិក្សាថ្នាក់បណ្ឌិត នៅសាកលវិទ្យាល័យជូឡាឡុងកន ប្រទេសថៃ ហើយបានទទួលសញ្ញាប័ត្រថ្នាក់បណ្ឌិត ពីប្រទេសថៃនៅឆ្នាំ ២០០៩។ បន្ទាប់មក លោក បានជាប់ទៅសិក្សាជំនាញវគ្គខ្លីៗនៅប្រទេសជប៉ុនជាបន្តបន្ទាប់ ក៏ដូចជាប្រទេសផ្សេងៗទៀត នៅក្នុងតំបន់អាស៊ាន។
បន្ទាប់ពីបញ្ចប់ការសិក្សា លោក បានចូលបម្រើការងារឯកជន និងការងារប្រទេសជាតិ បានមួយចំនួនធំ ក្នុងនោះការងារឯកជនរបស់លោកគឺ ទទួលគម្រោងតម្លើងអង់តែនទូរស័ព្ទឲ្យក្រុមហ៊ុន Beeline និង ក្រុមហ៊ុនសំណង់ជាច្រើនទៀតផងដែរ។ ក្រៅពីការងារប្រទេសជាតិ លោក ក៏ជាសមាជិកម្នាក់ ក្នុងចំណោមអ្នកសាងសង់ស្ពានជ្រាយចង្វារ ផ្លូវជាតិលេខ ៥ គម្រោងរបស់អង្គការ (JICA) ចូលរួមធ្វើតេស្ដដីសម្រាប់ការស្ថាបនាឡើងវិញ នូវគ្រឹះស្ពានជ្រោយចង្វារ សា្ថបនា គម្រោងស្ពានបេតុងទាំងអស់ នៅតាមផ្លូវជាតិលេខ ២១ ធ្វើតេស្ដដីក្នុងផ្នែកមួយចំនួននៃគម្រោងផ្លូវជាតិលេខ ៥ ពីព្រែកក្ដាមដល់ធ្លាយម្អម និងស្នាដៃការងារថ្មី ចុងក្រោយរបស់លោកគឺ ជាសមាជិកម្នាក់ ដែលចូលរួមសិក្សាគម្រោងផ្លូវល្បឿនលឿនពីភ្នំពេញទៅបាវិតផងដែរ។
បណ្ឌិត លឹមសុខតៃ ក៏បានឲ្យអ្នកយកព័ត៌មានរបស់ KHB Media ដឹងផងដែរ ចំពោះថ្ងៃអនាគត លោក ចង់បន្សល់នូវស្នាដៃជួយប្រទេសជាតិមួយចំនួន និងធ្វើជាគ្រូបណ្ដុះបណ្ដាលក្មេងជំនាន់ក្រោយឲ្យបានច្រើននាក់ផងដែរ ព្រោះសព្វថ្ងៃ លោកកំពុងធ្វើជាគ្រូបង្រៀនស្រាប់ នៅសាកលវិទ្យាល័យន័រតុន ហើយ លោកក៏ជាមន្រ្តីរាជការ នៅក្រសួងសាធារណការ និងដឹកជញ្ជូនផងដែរ៕ 
