ទីផ្សារគ្រឿងសង្ហារឹមរីកចម្រើន ស្របនឹងកំនើននៃវិស័យសំណង់
ភ្នំពេញ៖ ស្របពេលដែលការអភិវឌ្ឍន៍ វិស័យសំណង់លំនៅដ្ឋាននៅកម្ពុជា កាន់តែមានការរីកចម្រើនឥតឈប់ឈរ វិស័យនេះបានទាញអោយវិស័យដទៃផ្សេងទៀត អាចទទួលបានផលប្រយោជន៍ និងតម្រូវការទីផ្សារខ្ពស់ផងដែរ ដើម្បីផ្គត់ផ្គង់ទៅក្នុងឧស្សាហកម្មថ្មីមួយនេះ។ ជាក់ស្ដែង ការផ្គត់ផ្គង់គ្រឿងសង្ហារឹម នៅក្នុងវិស័យសំណង់ បានក្លាយជាទីផ្សារថ្មីមួយទៀត សម្រាប់វិនិយោគក្នុង និងក្រៅស្រុក។ លោក ដួង អក្ខរា អគ្គនាយក មជ្ឍមណ្ឌល ផ្គត់ផ្គង់គ្រឿងសង្ហារឹម អេស អេ (S A Solutions Co., Ltd) បានផ្តល់បទសម្ភាសផ្ទាល់ដល់អ្នកយកព័ត៌មាន KHB Media ឱ្យដឹងថា ទីផ្សារផ្គត់ផ្គង់គ្រឿងសង្ហារឹមនៅកម្ពុជា មួយរយៈចុងក្រោយនេះ មានតម្រូវការខ្ពស់ ដោយសារមានកំនើននៃសំណង់អគារខ្ពស់ៗ ការរីកចម្រើននៃស្ថាប័នធនាគារ និងវិស័យឯកជនជាដើម។ លោកបានបញ្ជាក់ថា វត្តមានត្រឹមតែជាង ២ ឆ្នាំ នៃមជ្ឍមណ្ឌល ផ្គត់ផ្គង់គ្រឿងសង្ហារឹម អេស.អេ ក្នុងទីផ្សារកម្ពុជា បានធ្វើឱ្យក្រុមហ៊ុន ទទួលបានការបញ្ជាទិញកើនឡើងយ៉ាងច្រើន ដោយការលក់ មានការកើនឡើងពី ២០% ក្នុងឆ្នាំដំបូង រហូតដល់ ៨០% ក្នុងឆ្នាំបន្ទាប់ ដោយក្នុង ១ ឆ្នាំ ការលក់អាចកើនឡើងប្រហែលជាបួនដង។ 
លោកបន្ថែមថា ដើម្បីពង្រីកបាននូវទីផ្សារលក់កើនឡើងឆាប់រហ័ស ក្រុមហ៊ុនរបស់លោក បានពង្រីកកិច្ចសហការជាមួយភ្នាក់ងារលក់ និង ដៃគូសហការជាច្រើនផ្សេងទៀតក្នុងប្រទេស ដើម្បីពង្រីកវិសាលភាពលក់ និងបំពេញតម្រូវការទីផ្សារអោយបានទាន់ពេលវេលា និងឆាប់រហ័សផងដែរ។ ផលិតផលដែលមជ្ឍមណ្ឌល ផ្គត់ផ្គង់គ្រឿងសង្ហារឹម អេស.អេ អាចផ្គត់ផ្គង់បាននៅលើទីផ្សាររួមមាន កៅអី តុប្រតិបត្តិការិយាល័យ គ្រែជាមួយសាឡុង ផ្ទះបាយ ទូដាក់ចាន តុប្រជុំ និងទូផ្ទុកឯកសារក្នុងការិយាល័យជាដើម។ ផលិតផលទាំងនេះ ត្រូវបាននាំចូលពីប្រទេសថៃ និង ប្រទេសចិន ដែលតម្រូវតាមចិត្តអតិថិជនបញ្ជាទិញ។ ក្រៅពីក្រុមហ៊ុនផ្គត់ផ្គង់គ្រឿងសង្ហារឹមយីហោក្នុងមួយនេះ ក៏មានលំហូរចូលនៃការវិនិយោគរបស់ក្រុមហ៊ុនបរទេសមួយចំនួនផងដែរ ដូចជា ក្រុមហ៊ុម RCD Kitchen Cambodia ដែលជាក្រុមហ៊ុនដ៏ធំមួយ មានបទពិសោធន៍ក្នុងវិស័យនេះជាង ៤៥ ឆ្នាំ នៅក្នុងប្រទេសថៃ ក្នុងការផ្គត់ផ្គង់គ្រឿងសង្ហារឹម និង បរិក្ខាសម្ភារផ្ទះបាយ ជាមួយនឹងការផ្ដល់នូវសេវកម្មតម្លើងជូនដល់អតិថិជនសម្រាប់លំនៅដ្ឋានធម្មតា ក៏ដូចជាគម្រោងខុនដូផ្សេងៗផងដែរ។ 
ដោយយោងតាមតំណាងក្រុមហ៊ុនខាងលើ បានបញ្ជាក់ថា វត្តមានជាច្រើនឆ្នាំ នៃការវិនិយោគក្នុងប្រទេសកម្ពុជា បានផ្តោតសំខាន់ទៅលើគុណភាពជាចម្បង ធ្វើយ៉ាងណាប្រាកដថា ផលិតផល និង សេវាកម្មពិតជាឆ្លើយតបតាមតម្រូវការរបស់អតិថិជន។ មិនតែប៉ុណ្ណោះ ពួកគេក៏បានសហការជាមួយ ក្រុមហ៊ុនអន្តរជាតិ ដែលផ្គត់ផ្គង់សម្ភារផ្ទះបាយយីហោ Blum & Hafele ផងដែរ។ គួរបញ្ជាក់ថា ក្រៅពីក្រុមហ៊ុនវិនិយោគពីបរទេស និងក្រុមហ៊ុនក្នុងស្រុកដែលនាំចូល ទៅលើប្រភេទគ្រឿងសង្ហារឹមបែបទំនើប ទាន់សម័យ មកចរាចរលក់នៅក្នុងទីផ្សារកម្ពុជានេះ បានសង្កេតឃើញថា ផលិតផលដែលបានផលិត និងកែច្នៃដោយអ្នកផលិតក្នុងស្រុក ក៏មានតម្រូវការច្រើនផងដែរ ជាពិសេស គ្រឿងសង្ហារឹមរចនាបទបែបខ្មែរបុរាណ ដោយប្រើប្រាស់វត្ថុធាតុដើមក្នុងស្រុក ដូចជាឈើក្រញ៉ូង នាងនួន និង ឈើបេងជាដើម៕ 
