វិស័យវិស្វកម្មនៅកម្ពុជាកំពុងរីកដុះដាលខ្លាំង តែខ្វះធនធានមនុស្ស

ដោយ: Koemsoeun 28 មិថុនា 2019 04:06 PM

ភ្នំពេញ: វិស័យវិស្វកម្មនៅប្រទេសកម្ពុជាកំពុងរីកដុះដាលយ៉ាងខ្លាំង។ ការរីកដុះដាលនេះ មានការងារជាច្រើនសម្រាប់មនុស្សដែលមានសមត្ថភាព ប៉ុន្ដែបច្ចុប្បន្នវិស័យនេះកម្ពុជាកំពុងខ្វះខាតផ្នែកធនធានមនុស្សទៅវិញ។ ការនេះ តម្រូវឪ្យមានច្បាប់គ្រប់គ្រងឪ្យបានត្រឹមត្រូវ។ នេះជាការលើកឡើងដោយបណ្ឌិត លឹម សុខតៃ សាស្ត្រាចារ្យស្ថាបត្យករ និងវិស្វកម្ម និងជាព្រឹទ្ធបុរសនៅសាកលវិទ្យាល័យន័រតុន។ លោកបណ្ឌិត លឹម សុខតៃ បានប្រាប់អ្នកយកព័ត៌មាន KHB Media ថា វិស័យវិស្វកម្មនៅប្រទេសកម្ពុជានាពេលនេះ កំពុងហក់ឡើងខ្លាំងស្ទើតែគ្រប់វិស័យទៅហើយ បូករួមទាំងសំណង់ និងអ្នកគូសប្លង់ ហើយការងារទាំងនេះកំពុងត្រូវការធនធានមនុស្សជាចាំបាច់សម្រាប់ធ្វើ។ លោកបន្តថា ធនធានមនុស្សក្នុងផ្នែកវិស្វកម្មនៅកម្ពុជានៅខ្សោយនៅឡើយ«ខ្ញុំប្រាប់ថា ធនធានមនុស្សយើងនៅខ្សោយខ្លាំងណាស់ គឺយើងមិនអាចបណ្ដុះបណ្ដាល១០០នាក់ ចេញមកមានសមត្ថភាពទាំង១០០ទេ ព្រោះមានអ្នកខ្លះបរាជ័យកណ្ដាលផ្លូវ អ្នកខ្លះបានរៀនចប់ ឬប្រឡងជាប់ចេញមក គឺក្អេងក្អាង ឬហៅថា ចរិកគាត់មិនសូវចុះសម្រុងជាមួយមិត្តរួមការងារដទៃទៀត គឺគាត់អួតហ្មង»។

សាស្ដ្រាចារ្យរូបនេះបានបន្ថែមថា ច្បាប់ស្ដីពីការគ្រប់គ្រងវិស្វកម្មក៏មិនទាន់មានភាពល្អប្រសើរនៅឡើយដែរ ហើយស្ថាប័នពាក់ព័ន្ធត្រូវប្រញាប់គិតគូរពីបញ្ហានេះ ព្រោះត្រូវចៀសវាងការគូសប្លង់មិនត្រឹមត្រូវ គ្មានស្ដង់ដា គ្មានសុវត្ថិភាព ហើយវាក៏មិនមែនមនុស្សគ្រប់រូបក៏អាចគូសប្លង់ ឬសាងសង់បាននោះទេ។ «យើងគួរពង្រឹងផ្នែកច្បាប់នេះ ព្រោះប្រសិនបើមានបញ្ហានៅអគារណាមួយ តើភាគីណាខ្លះដែលពាក់ព័ន្ធ ហើយត្រូវចេញមុខដោះស្រាយ មិនមែនអ្នកនេះចង្អុយដាក់អ្នកនោះទេ។ ដូច្នេះ យើងត្រូវតែមានច្បាប់ឲ្យបានត្រឹមត្រូវគឺអ្នកត្រួតពិនិត្យដី អ្នកគូសប្លង់ និងអ្នកសាងសង់ ត្រូវតែចូលរួមទាំងអស់គ្នា»៕