ជប៉ុនផ្តល់ជំនួយជាង ៣០០លានដុល្លារ កែលម្អផ្លូវជាតិលេខ៥ និងប្រព័ន្ធទឹកស្អាតនៅកម្ពុជា
ភ្នំពេញ៖ លោកនាយករដ្ឋមន្ត្រី ហ៊ុន សែន បានរម្លឹកថា លោកនឹងចុះហត្ថលេខាលើលិខិតប្តូរសារ ស្តីពីការផ្តល់ជំនួយអភិវឌ្ឍន៍ផ្លូវការរបស់ប្រទេសជប៉ុន ដែលមានទឹកប្រាក់សរុបចំនួន ៣៤.១៣៨លានយ៉េន (ប្រមាណ ៣១០លានដុល្លារអាមេរិក) ដល់រដ្ឋាភិបាលកម្ពុជានាព្រឹកថ្ងៃទី២៤ ខែមីនា នេះនៅឯវិមានសន្តិភាព។
លិខិតប្តូរសារ ត្រូវចុះហត្ថលេខាដោយលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា គ្របដណ្តប់លើការអនុវត្តគម្រោងហិរញ្ញប្បទានឥតសំណង ចំនួន៣គម្រោង និងឥណទានសម្បទានចំនួន២គម្រោង។
ចំពោះជំនួយហិរញ្ញប្បទានឥតសំណង សម្រាប់អនុវត្តគម្រោងចំនួន៣នោះមាន ទី១ គម្រោងពង្រីកប្រព័ន្ធផ្គត់ផ្គង់ទឹកស្អាតក្នុងក្រុងតាខ្មៅ ដែលមានទឹកប្រាក់ចំនួន ៣.៤២១លានយ៉េន (ប្រមាណ ៣១លានដុល្លារអាមេរិក) ទី២ គម្រោងសមាហរណកម្មបោសសម្អាតមីន និងសង្គ្រោះជនពិការដោយសារមីន ដែលមានទឹកប្រាក់ចំនួន ១.០០០លានយ៉េន (ប្រមាណ ៩លានដុល្លារអាមេរិក) និងទី៣ គម្រោងកម្មវិធីអភិវឌ្ឍន៍សេដ្ឋកិច្ច និងសង្គម មានទឹកប្រាក់ ៣០០លានយ៉េន (ប្រមាណ ២,៧លានដុល្លារអាមេរិក)។
ដោយឡែកជំនួយឥណទានសម្បទានវិញ ក្រសួងការបរទេសកម្ពុជាបានអះអាងថា នឹងអនុវត្តនូវគម្រោងចំនួន២សំខាន់ ទី១ គឺគម្រោងលើកកម្ពស់គុណភាពផ្លូវជាតិលេខ៥ ដំណាក់កាលទី២ (ពីធ្លាម្អម ខេត្តពោធិ៍សាត់ ទៅខេត្តបាត់ដំបង រហូតដល់សិរីសោភ័ណ្ឌ ក្រុងប៉ោយប៉ែត ខេត្តបន្ទាយមានជ័យ) មានទឹកប្រាក់ ១៧.៧០២លានយ៉េន (ប្រមាណ ១៦១លានដុល្លារអាមេរិក) និងទី២ គម្រោងធ្វើផ្លូវជាតិលេខ៥ នាដំណាក់កាលទី៣ (ពីព្រែកក្តាម ខេត្តកណ្តាល ទៅធ្លាម្អម ខេត្តពោធិ៍សាត់ និងខេត្តបាត់ដំបង) ក្នុងទឹកប្រាក់ ១១.៧១៥លានយ៉េន (ប្រមាណ ១០៦,៥លានដុល្លារអាមេរិក)។ ការសាងសង់នេះ ត្រូវអនុវត្តតាមស្តង់ដាគុណភាព សុវត្ថិភាព និងបច្ចេកទេសសាងសង់ក្រោមការត្រួតពិនិត្យ តាមដាន អង្កេត និងវាយតម្លៃរបស់ភ្នាក់ងារសហប្រតិបត្តិការអន្តរជាតិជប៉ុន JICA ជាប្រចាំ ។
ក្រសួងការបរទេសកម្ពុជាបានបង្ហាញក្តីរំពឹងទុកថា ហិរញ្ញប្បទានឥតសំណង និងឥណទានសម្បទាន ដែលរដ្ឋាភិបាលជប៉ុនបានផ្តល់ឱ្យនេះ នឹងជួយជំរុញដល់ការអភិវឌ្ឍវិស័យសេដ្ឋកិច្ច និងសង្គម សម្រាប់ប្រទេសកម្ពុជា ហើយពង្រឹងនូវទំនាក់ទំនង និងកិច្ចសហប្រតិបត្តិការល្អរវាងប្រទេសទាំងពីរថែមទៀត៕