តើជំនាញស្ថាបត្យកម្មមានសក្តានុពលខ្លាំងប៉ុនណាសម្រាប់កម្ពុជា?

តើជំនាញស្ថាបត្យកម្មមានសក្តានុពលខ្លាំងប៉ុនណាសម្រាប់កម្ពុជា?

ភ្នំពេញ៖ ស្ថាបត្យកម្ម​ជា​ជំនាញ​មួយ​ដែលមាន​សារៈសំខាន់​ខ្លាំងណាស់​សម្រាប់​ពិភពលោក មិនមែន​សម្រាប់តែ​កម្ពុជា​នោះទេ។ ប្រទេស​ទាំងអស់​សុទ្ធតែ​មាន​ស្ថាបត្យកម្ម និង​រចនាប័ទ្ម​សម្រាប់​ខ្លួនគេរៀងៗខ្លួន។ សម្រាប់កម្ពុជាស្នាដៃ​ស្ថាបត្យកម្មជា​ច្រើនដូចជា​ស្នាដៃ​ក្នុង​វត្ត​អារាម អគារ និង​សំណង់​ ផ្សេងទៀត​ដែល​បង្កប់​ដោយ​ស្ថាបត្យកម្ម រចនាប័ទ្ម និងសិល្បៈល្អៗ។

​ដកស្រង់ចេញពីកាសែត​ឡា​រ៉ែ​ន ពាណិជ្ជ បានធ្វើ​បទ​សម្ភាស​ជាមួយ​សាស្ត្រាចារ្យ សុខ ខុម ព្រឹទ្ធបុរស​មហាវិទ្យាល័យ​វិស្វកម្ម និង​ស្ថាបត្យកម្ម នៃ​សាកលវិទ្យាល័យ​បៀ​ល​ប្រាយ កាលពីឆ្នាំ២០១៨ ​តាម​ការសង្កេតរ​បស់​លោកគឺ​ឃើញ​មាន​ប្រហែលជា ៧០ភាគរយដែល​បញ្ចូល​ភាគច្រើន​លើដំបូល របង ក្បូរ-​ក្បាច់រចនា និង​ទំហំ​ស្តង់ដារ​ទ្វា​បង្អួច បែប​ផ្ទះ​ខ្មែរ​ជាដើម។

កាលពីពេលថ្មីៗ លោក ជា សុផារ៉ា រដ្ឋមន្រ្តីក្រសួង​រៀបចំ​ដែនដី នគរូបនីយកម្ម និង​សំណង់ ថ្លែងក្នុងវគ្គផ្សព្វផ្សាយច្បាប់ស្តីពីសំណង់សម្រាប់អ្នកវិជ្ជាជីវៈក្នុងវិស័យសំណង់បានលើកទឹកចិត្តដល់វិស្វករ និងស្ថាបត្យករ​ខ្មែរទំាងអស់ ឲ្យរាល់​ការស្ថាបនា​សំណង់អគារខ្ពស់ៗត្រូវបញ្ចូលគំនិតស្ថាបត្យកម្ម និងរចនាបថខ្មែរ ដើម្បីរក្សាបានអត្តសញ្ញាណជាតិ និងការទាក់ទាញភ្ញៀវ​ទេសចរ។

ដោយឡែកអគ្គលេខាធិការ​គណៈ​វិស្វករ​កម្ពុជា  លោក លឹម សុ​ថាវ ធ្លាប់បានលើកឡើងថា៖ «សំណង់ប្រាសាទ នៃសម័យរាជធានីអង្គរត្រូវបានសាងសង់យ៉ាងល្អឥតខ្ចោះ ប្រកបដោយទេពកោសល្យខ្ពស់ ហើយភាពល្អឯក​នៃវិស្វករ ព្រមទាំងសា្ថបត្យកម្មនេះ មិនត្រឹមតែនាំមកនូវមោទនភាពប៉ុណ្ណោះទេ ថែមទំាងបានផ្តល់ឲ្យប្រទេសកម្ពុជា ក្លាយជាប្រទេសប្រកប​ដោយភាពទាក់ទាញផ្នែកទេសចរណ៍វប្បធម៌ដ៏សំខាន់»។

លោកសាស្ត្រាចារ្យ សុខ ខុម បានលើកឡើងថាសម្រាប់​ជំនាញ​ស្ថាបត្យកម្មនេះ​ពិត​ជាមាន​សក្តានុពល​ខ្ពស់ព្រោះ​សំណង់​អគារ​នាពេល​បច្ចុប្បន្ននេះ​កំពុង​រីកដុះដាល​ច្រើន។ បើទោះបីជា​បច្ចុប្បន្ននេះ​មាន​និស្សិត​សិក្សា​ជំនាញ​ស្ថាបត្យកម្ម​ច្រើន​ក៏ដោយ ក៏​ថ្ងៃក្រោយ​នៅតែមាន​តម្រូវការ​ខ្ពស់​ដដែល ព្រោះ​នៅ​ទីក្រុង​យើង​នៅ​ត្រូវការ​អគារ និង​ហេដ្ឋារចនាសម្ព័ន្ធ​ជាច្រើន​ទៀត ទាំង​ស្ពាន អគារធំៗ និង​លំនៅឋាន​ជាដើម។ ឱ្យតែ​និស្សិត​មាន​សមត្ថភាព​ពិតប្រាកដ មិន​ខ្វះ​ទេ​ការងារ ព្រោះ​គេ​ប្រាកដជា​ត្រូវការ​យើង ជាក់ស្តែង​ស្ថាបត្យករ​ខ្មែរ​យើង​ជើងចាស់​ជាច្រើន​ត្រូវបាន​ទទួលស្គាល់ ហើយ​ត្រូវបាន​បរទេស​ជួល​ទៅធ្វើ​ការងារ​ឱ្យ​វិញ​ក៏មាន។

លោកព្រឹទ្ធបុរសបន្តថាមាន​ស្ថាបត្យករ​ខ្លះ​មាន​ស្នាដៃ​របស់ខ្លួន​នៅ​ប្រទេស​សិង្ហ​បុរី នៅ​អឺរ៉ុប និង​នៅ​ប្រទេសអភិវឌ្ឍ​ន៍មួយចំនួន​ទៀតផង។ ហើយ​ចំពោះ​លោកតា វណ្ណ ម៉ូលីវណ្ណ វិញ ក៏មាន​ស្នាដៃ​នៅ​បារាំង នៅ​ប្រេ​ស៊ី​ល និង​នៅ​ប្រទេសធំៗ មួយចំនួនទៀត​ដែល​គេ​ទទួលស្គាល់​ដែរ។ ហេតុនេះ​ទីផ្សារ​ស្ថាបត្យកម្ម​នេះ​ទូលំទូលាយ​ណាស់​សម្រាប់​និស្សិត​កម្ពុជា ព្រោះ​មិនមែន​មានតែ​ទីផ្សារ​ក្នុងស្រុក​ទេ តែមាន​ទីផ្សារ​នៅ​បរទេស​ថែមទៀត​ប្រសិនបើ​មាន​សមត្ថ​ភាពខ្លាំង៕

(លោក លឹម សុ​ថាវ អគ្គលេខាធិការ​គណៈ​វិស្វករ​កម្ពុជា)

(សាស្ត្រាចារ្យ សុខ ខុម ព្រឹទ្ធបុរស​មហាវិទ្យាល័យ​វិស្វកម្ម និង​ស្ថាបត្យកម្ម នៃ​សាកលវិទ្យាល័យ​បៀ​ល​ប្រាយ)

(លោក ជា សុផារ៉ា ឧបនាយករដ្ឋមន្រ្តីរដ្ឋមន្រ្តីក្រសួងរៀបចំដែនដី)

អត្ថបទដោយ: Nary