ជប៉ុនជួយបំពាក់អំពូលភ្លើងLEDដ៏ទំនើបតាមវិថី៣ ដើម្បីឱ្យភ្នំពេញក្លាយជាទីក្រុងឆ្លាតវៃ
ភ្នំពេញ: អ្នកជំនាញជនជាតិជប៉ុន បាននឹងកំពុងសិក្សាពីទីតាំងអាទិភាពមួយចំនួននៅក្នុងទីក្រុងភ្នំពេញ សម្រាប់បំពាក់អំពូលភ្លើងប្រភេទ LED តាមបច្ចេកវិទ្យាទំនើបទាន់សម័យសន្សំសំចៃភ្លើងដែលជាផលិតផលក្រុមហ៊ុន មីនេបៀ ខេមបូឌា ដើម្បីជំរុញឱ្យរាជធានីភ្នំពេញក្លាយទៅជាទីក្រុងឆ្លាតវៃ។ នេះបើតាមលោក ម៉េត មាសភក្ដី អ្នកនាំពាក្យសាលារាជធានីភ្នំពេញ។ លោក ម៉េត មាសភក្ដី បានថ្លែងប្រាប់សារព័ត៌មាន KHB Media នៅថ្ងៃទី ២១ កុម្ភៈថា រដ្ឋបាលរាជធានីភ្នំពេញ និងក្រុមហ៊ុន មីនេបៀ ខេមបូឌា ( Minebea Cambodia) បានពិភាក្សាលើការងារនេះ ព្រមទាំងបានចុះហត្ថលេខាលើកិច្ចព្រមព្រៀងស្តីពីការដាក់ឱ្យដំណើរការ និងការថែទាំសេវាបំភ្លឺសាធារណៈតាមប្រព័ន្ធគ្រប់គ្រងទីក្រុងឆ្លាតវៃរួចរាល់ហើយ។ លោកបន្តថា បច្ចុប្បន្ននេះ ភាគីក្រុមហ៊ុនកំពុងជំរុញអ្នកជំនាញរបស់ខ្លួនសិក្សាពីទីតាំងអាទិភាពមួយចំនួននៅក្នុងក្រុងភ្នំពេញ ជាពិសេសខ្លួនបានសាកល្បងរួចហើយតាមវិថីសំខាន់ៗចំនួន ៣គឺ មហាវិថីព្រះនរោត្តម មហាវិថីសហព័ន្ធរុស្ស៊ី និងវិថីសម្តេចតេជោហ៊ុនសែន ជាអំពូលភ្លើងដែលធានាបាននូវសោភ្ឌណភាព និងបរិស្ថានយ៉ាងល្អប្រសើរ។ 
លោកបន្ថែមថា ការដាក់អំពូលភ្លើង LED តាមបច្ចេកវិទ្យាទំនើបទាន់សម័យនេះ វានឹងផ្តល់ផលប្រយោជន៍យ៉ាងច្រើនដល់រាជធានីភ្នំពេញ ជាពិសេសសន្សំសំចៃភ្លើង គុណភាពល្អ គិតគូរពីបរិស្ថាន ងាយស្រួលជួសជុល ក៏ដូចជាការលើកកម្ពស់សោភណ្ឌភាព និងធ្វើឱ្យរាជធានីភ្នំពេញក្លាយទៅជាទីក្រុងឆ្លាតវៃផងដែរ។ លោក មាសក្ដី បានបញ្ជាក់ថា៖«ឥឡូវនេះ យើងបានសិក្សាបានមួយជំហានហើយ គឺទីតាំងដែលត្រូវដាក់ ហើយជំហានបន្ទាប់គឺយើងត្រូវជ្រើសរើសប្រភេទអំពូលទៀត ប៉ុន្ដែខ្ញុំមិនទាន់ពីពេលវេលាជាក់លាក់ដែលយកអំពូលទៅដាក់ទេ តែដឹងតែឆាប់ៗហ្នឹងហើយ។ លក្ខណៈពិសេសអំពូលហ្នឹងមួយទៀត គឺវាអាច alert ប្រាប់យើងនៅពេលវាខូចផងដែរ»។ លោក យូស៊ីហ៊ីសា កៃណឺម៉ា អគ្គនាយកក្រុមហ៊ុន មីនេបៀ ខេមបូឌា ( Minebea Cambodia) បានថ្លែងក្នុងកិច្ចព្រមព្រៀងកាលពីថ្ងៃទី ២០កុម្ភៈនោះថា អំពូលភ្លើងឆ្លាតវៃប្រភេទ LED ដែលក្រុមហ៊ុននឹងផ្គត់ផ្គង់ក្នុងរាជធានីភ្នំពេញនេះ ជាអំពូលភ្លើងដែលអាចសន្សំសំចៃថាមពលអគ្គិសនីរហូតដល់ ៨០ភាគរយ បើប្រៀបធៀបនឹងអំពូលភ្លើងធម្មតា និងអាចដំឡើង ឬបន្ថយពន្លឺតាមរយៈទូរបញ្ជាតាមស្ថានភាពជាក់ស្តែងនៃចរាចរណ៍តាមដងវិថី។ លោកបន្តថា៖«អំពូលភ្លើងនេះ មិនត្រឹមតែជួយដល់បរិស្ថានប៉ុណ្ណោះទេ គឺជួយដល់ផ្នែកសន្តិសុខនៅពេលរាត្រី និងធានាសុវត្ថិភាពចរាចរណ៍ ព្រមទាំងកាត់បន្ថយការចំណាយថវិកាច្រើនទៀតផង»។ 
ចំណែក លោក ឃួង ស្រេង អភិបាលរាជធានីភ្នំពេញ បានលើកឡើងថា ការដាក់ឲ្យដំណើរការ និងការថែទាំសេវាបំភ្លឺសាធារណៈតាមប្រព័ន្ធគ្រប់គ្រងទីក្រុងឆ្លាតវៃក្នុងរាជធានីភ្នំពេញតាមរយៈការចុះកិច្ចព្រមព្រៀងនេះ បានផ្តល់ផលប្រយោជន៍យ៉ាងច្រើនដល់រាជធានីភ្នំពេញ ក្នុងការលើកកម្ពស់សោភណ្ឌភាព និងធ្វើឲ្យរាជធានីភ្នំពេញក្លាយទៅជាទីក្រុងឆ្លាតវៃផងដែរ៕ 
