ខេត្តសៀមរាបនឹងមានសួនត្រីទឹកសាបសាងសង់លើផ្ទៃដី១០០ហិកតា

ខេត្តសៀមរាបនឹងមានសួនត្រីទឹកសាបសាងសង់លើផ្ទៃដី១០០ហិកតា
ខេត្តសៀមរាប៖ វិនិយោគិនក្នុងស្រុកចាប់ដៃគ្នាជាមួយវិនិយោគិនជប៉ុន និងអាមេរិកគ្រោងសាងសង់ជលវប្បដ្ឋានត្រីទឹកសាប ព្រមទាំងជម្រកអភិរក្សសត្វព្រៃដ៏កម្រដែលប្រឈមជិតផុតពូជ ស្ថិតនៅភូមិក្បូន ឃុំខ្ចាស់ ស្រុកសូទ្រនិគម ខេត្តសៀមរាប។ គម្រោងនេះ​នឹងសាងសង់លើផ្ទៃដីប្រមាណ ១០០ ហិកតា ជាមួយទុនវិនិយោគជាង ៧០លានដុល្លារអាមេរិក។​​ គម្រោងនេះ​ត្រូវបានប្រកាសឡើងក្នុងជំនួបពិភាក្សាការងារមួយរវាងអភិបាលខេត្តសៀមរាប​ ជាមួយក្រុមហ៊ុន Angkor Wildlife និងក្រុមហ៊ុន Aquarium Co.Ltd កាលពីពេលថ្មីៗនេះ។ គម្រោងសាងសង់ជលវប្បដ្ឋាននឹងត្រូវចែកចេញជាបីដំណាក់កាល ហើយក្នុងដំណាក់កាលទី១នេះ ប្រើប្រាស់ថវិកា ២០លានដុល្លា ដែលនឹងគ្រោងបើកការដ្ឋាន ក្នុងខែ មីនា ឆ្នាំ២០១៩ខាងមុខ និងគ្រោងនឹងដាក់ឱ្យដំណើរការនៅចុងឆ្នាំ២០២០។ ជំនួបពិភ្សាការងារមួយរវាងអភិបាលខេត្តសៀមរាប​ ជាមួយក្រុមហ៊ុន Angkor Wildlife និងក្រុមហ៊ុន Aquarium Co.Ltd លោក ទៀ សីហា អភិបាលខេត្តសៀមរាប បានណែនាំឱ្យក្រុមហ៊ុនធ្វើកិច្ចសហការជាមួយបណ្តាមន្ទីរ អង្គភាព និង អាជ្ញាធរពាក់ព័ន្ធ ហើយកត្តាសំខាន់នោះ គឺការធ្វើពាក្យសុំច្បាប់សាងសង់ឱ្យបានត្រឹមត្រូវជាមុន ព្រមទាំងធ្វើការត្រួតពិនិត្យឡើងវិញនូវទីតាំងរបស់គម្រោង អំពីទីទួលបុរាណដ្ឋាន ដើមី្បជៀសវាងក្នុងពេលកំពុងដំណើរការសាងសង់ទៅមានការរំខានធ្វើឱ្យមានការយឺតយ៉ាវ។ លោក សីហា បានគូសបញ្ជាក់ទៀតថា ការបង្កើតឱ្យមានជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វនេះ នឹងក្លាយជាសមិទ្ធផលថ្មីមួយរបស់ខេត្តសៀមរាបសម្រាប់ការទាក់ទាញភ្ញៀវទេសចរជាតិ អន្តរជាតិ និងធ្វើឱ្យពួកគេស្នាក់នៅក្រុងសៀមរាបបានយូថ្ងៃផងដែរ។ ជលវប្បដ្ឋានត្រី (រូបភាព តំណាង) សូមជម្រាបថា​​ កាលពី​ឆ្នាំ​២០១៨ តំបន់​ទេសចរណ៍​ប្រាសាទអង្គរវត្ត​ទទួល​បាន​ភ្ញៀវ​ទេសចរ​អន្តរ​ជាតិប្រមាណ​ជាង ២​លាន ៥​សែន​នាក់ ដោយ​ទទួល​បាន​ប្រាក់ចំណូល​ជាង ១០០​លាន​ដុល្លារ​ពី​ការ​លក់​សំបុត្រ​ឱ្យ​ភ្ញៀវ​ចូល​ទស្សនា​ប្រាសាទ​នានា ហើយភ្ញៀវ​ទេសចរ​អន្តរជាតិ​ភាគ​ច្រើន​បំផុតមក​ពី​ប្រទេស ចិន កូរ៉េ និង​អាមេរិក៕
អត្ថបទដោយ: Bunthoeun