បេតុងជ្រាបទឹកបច្ចេកវិទ្យាថ្មីបំផុតរបស់ជប៉ុន នឹងកែប្រែមុខមាត់តំបន់ Pub Street
ខេត្តសៀមរាប: ចិញ្ចើមផ្លូវប្រសព្វតំបន់ Pub Street ក្នុងក្រុងសៀមរាប ត្រូវបានអ្នកជំនាញជប៉ុនចាប់ផ្តើមអនុវត្តន៍គម្រោងសាកល្បងពីបច្ចេកវិទ្យាថ្មីរបស់កម្រាលបេតុងជ្រាបទឹក ដើម្បីស្ថាបនាចិញ្ចើមផ្លូវនៅតំបន់នោះឱ្យមានភាពប្រសើរឡើងវិញ ដោយគម្រោងនេះគ្រោងនឹងបញ្ចប់ទាំងស្រុងក្នុងខែមិថុនា ឆ្នាំ២០១៩ខាងមុខនេះ។ លោក ទៀ សីហា អភិបាលខេត្តសៀមរាបបានបញ្ជាក់ក្នុងជំនួបពិភាក្សាការងារកាលពីថ្ងៃទី១២ កុម្ភៈថា ក្រុមហ៊ុន Omura Ceratec Co.,Ltd របស់ប្រទេសជប៉ុនបានចាប់ផ្តើមអនុវត្តគម្រោងសាកល្បងបច្ចេកវិទ្យាថ្មីសាងសង់កម្រាល និងចិញ្ចើមផ្លូវដោយបេតុងជ្រាបទឹកតាមបណ្តោយផ្លូវ ២ធ្នូ ប្រវែង ៩៣ម៉ែត្រពីចំណុចផ្លូវប្រសព្វ Pub Street ដល់មុខខ្លោងទ្វារមន្ទីរពេទ្យបង្អែក ខេត្តសៀមរាប។ 
លោករំពឹងថា៖«ក្រោយពេលបញ្ចប់ការស្ថាបនានេះ តំបន់ Pub Street នឹងមានសម្រស់កាន់តែស្រស់ស្អាត ហើយវាក៏ជាផ្នែកមួយជួយកែប្រែមុខមាត់ថ្មីនៃក្រុងសៀមរាបយើងនេះ»។ ចំណែក លោក Hiroya Kon អ្នកគ្រប់គ្រងទីផ្សារនៃក្រុមហ៊ុន Omura Ceratec Co.,Ltd បានអះអាងថា គម្រោងសាកល្បងនេះមានគោលបំណងរួមចំណែកការពារទឹកជំនន់ ដក់លើផ្លូវ និងចិញ្ចើមផ្លូវក្នុងទីក្រុង ដោយប្រើកម្រាលដុំបេតុងជម្រាបទឹក (Permeable Interlocking Block Pavement) ជាបច្ចេកវិទ្យាថ្មីចុងក្រោយ និងជាស្តង់ដារជប៉ុន។ លោក គឹម ប៉ុណ្ណា ប្រធានមន្ទីរសាធារណការ និងដឹកជញ្ជូនខេត្តសៀមរាបមានប្រសាសន៍ថា នេះជាគម្រោងមួយថ្មី ដែលបានសិក្សាជាបន្តបន្ទាប់ ក្នុងការបែងចែកទ្រូងផ្លូវ ផ្លូវថ្មើរជើង និងចំណតយានយន្ត ដើម្បីឱ្យមានសណ្តាប់ធ្នាប់របៀបរៀបរយជួយកាត់បន្ថយការកកស្ទះនៅទីប្រជុំជនផងដែរ។ 
លោកបន្តថា គម្រោងនេះ ត្រូវបានលើកឡើងមកពិភាក្សាកាលពីចុងឆ្នាំ២០១៦ ហើយនៅខែមករាឆ្នាំ២០១៧ ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA បានមកទាក់ទងនិងសិក្សាពីទីតាំងក្រោមការសហការសម្របសម្រួលពីអាជ្ញាធរក្រុងសៀមរាប និងការគាំទ្រជំរុញបន្ថែមពីក្រសួងសាធារណការនិងដឹកជញ្ជូន ដោយផ្តោតសំខាន់ទៅលើតំបន់ក្នុងក្រុងដែលមានទេសចរធ្វើដំណើរថ្មើរជើងច្រើន។ លោកបន្តថា៖«គម្រោងសាកល្បងនេះ ចាប់ផ្តើមអនុវត្តន៍ពីខែកុម្ភៈ ឆ្នាំ២០១៩ ហើយគ្រោងនឹងបញ្ចប់ទាំងស្រុងក្នុងខែមិថុនាឆ្នាំ២០១៩ខាងមុខនេះ»៕ 
