វិទ្យាស្ថាន NTTI នឹងប្តូរទៅជាមជ្ឈមណ្ឌលស្រាវជ្រាវ និងច្នៃប្រឌិតបច្ចេកវិទ្យាលើវិស័យវិស្វកម្មសំណង់ស៊ីវិល

ដោយ: Pisey 8 មករា 2020 12:43 PM

វិទ្យាស្ថានជាតិបណ្តុះបណ្តាលបច្ចេកទេស(NTTI) នឹងប្តូរទៅជាមជ្ឈមណ្ឌលស្រាវជ្រាវ និងច្នៃប្រឌិតផ្នែកបច្ចេកវិទ្យាថ្មី ដើម្បីផ្តល់ឱកាសដល់និស្សិតក្នុងការរិះរកនូវការបង្កើតថ្មី និងការស្រាវជ្រាវទាក់ទងនិងការអភិវឌ្ឍប្រកបដោយចីរភាព ។

មជ្ឈមណ្ឌលស្រាវជ្រាវ និងច្នៃប្រឌិតផ្នែកបច្ចេកវិទ្យាថ្មីនេះនឹងផ្តោតលើសកម្មភាពស្រាវជ្រាវ និងផ្តោតលើវិស័យវិស្វកម្មសំណង់ស៊ីវិល អគ្គិសនី និងព័ត៌មានវិទ្យា។នេះបើតាម ការឲ្យដឹងពីក្រសួងការងារ និងបណ្តុះបណ្តាលវិជ្ជាជីវៈ។

ថ្លែងក្នុងឪកាសនៅក្នុងពិធីសំណេះសំណាលជាមួយមន្រ្តីរាជការ សាស្រ្តាចារ្យ និងបុគ្គលិកសិក្សា និងអបអរសាទរ ខួប ២០ឆ្នាំ របស់វិទ្យាស្ថានជាតិបណ្តុះបណ្តាលបច្ចេកទេស កាលពីចុងខែធ្នូ កន្លងទៅ លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា វិស័យវិស្វកម្មសំណង់ស៊ីវិល អគ្គិសនី និងព័ត៌មានវិទ្យា គីសុទ្ធតែជាជំនាញដែលមានសារៈសំខាន់សម្រាប់ការចូលរួមអភិវឌ្ឍន៍ប្រទេស និងសម្រាប់បម្រើឱ្យវិស័យជាច្រើនទាំងឧស្សាហកម្ម សិប្បកម្ម និងកសិកម្ម ដើម្បីផ្តល់ឱកាសឱ្យនិស្សិតបានសិក្សា និងបង្កើតនវានុវត្តន៍សម្រាប់ចូលរួមដោះស្រាយបញ្ហានានានៅក្នុងសង្គម។

ជាងនេះទៀត លោករដ្ឋមន្រ្តី អះអាងថា ការបណ្តុះបណ្តាលបច្ចេកទេស និងវិជ្ជាជីវៈ (TVET) ជាផ្នែកមួយដ៏សំខាន់ដែលកម្ពុជាកំពុងត្រូវការ ហេតុនេះហើយទើបគ្រឹះស្ថានសិក្សារបស់រដ្ឋជាច្រើនត្រូវបានបង្កើតឡើងដើម្បីបណ្តុះបណ្តាលជំនាញទាំងអស់នេះ។

លោកថា វិទ្យាស្ថានជាតិបណ្តុះបណ្តាលបច្ចេកទេស (NTTI) ជាផ្នែកដ៏សំខាន់មួយក្នុងការជំរុញឱ្យវិស័យបណ្តុះបណ្តាលបច្ចេកទេស និងវិជ្ជាជីវៈនេះ ទទួលបានជោគជ័យលើការបង្កើតធនធានមនុស្សលើជំនាញសំខាន់ៗជាច្រើន។

ហេតុនេះ លោករដ្ឋមន្រ្តីថា NTTI ក្រៅពីក្លាយជាមជ្ឈមណ្ឌលស្រាវជ្រាវ និងច្នៃប្រឌិតបច្ចេកវិទ្យាលើវិស័យវិស្វកម្មសំណង់ស៊ីវិលហើយនោះ មជ្ឈមណ្ឌលមួយនេះក៏ជាកន្លែងផ្លាស់ប្តូរមតិយោបល់ និងចែករំលែកបទពិសោធលើជំនាញជាច្រើនរវាងវិស័យឯកជន និងគ្រឹះស្ថានសាធារណៈនានានៅកម្ពុជា។

បន្ថែមលើនេះ លោកថា សកម្មភាពនេះ នឹងជួយជំរុញឱ្យសិស្ស-និស្សិត ឬសិក្ខាកាមទាំងអស់បានទទួលនូវចំណេះដឹងទាំងទ្រឹស្ដី និងការអនុវត្តជាក់ស្តែង សម្រាប់ពង្រឹងសមត្ថភាពវិជ្ជាជីវៈមុនចេញទៅប្រកបការងារ ឬប្រកបអាជីវកម្មជាក់ស្តែងនៅក្នុងសង្គម ពិសេសដើម្បឆ្លើយតបទៅនឹងបដិវត្តន៍ឧស្សាហកម្មទី៤ថែមទៀត។

លោក អ៊ិត សំហេង បានមានប្រសាសន៍ថា៖ «ដើម្បីសម្រេចគោលដៅក្នុងការអប់រំប្រកបដោយប្រសិទ្ធភាពខ្ពស់សម្រាប់ឆ្លើយតបជាមួយនឹងទីផ្សារការងារជាក់ស្តែងក្នុងយុគសម័យបច្ចេកវិទ្យានេះ ក្រសួងជំរុញឱ្យមានទំនើបកម្មដោយផ្ទាល់ទៅគ្រឹះស្ថានអប់រំទាំងអស់ដែលស្ថិតក្រោមចំណុះរបស់ក្រសួងការងារ។លោករំពឹងថា នៅទីនេះទាំងប្រព័ន្ធគ្រប់គ្រង សមត្ថភាពបណ្តុះបណ្តាល និងសមត្ថភាពសិស្សនឹងមានការអភិវឌ្ឍកាន់តែខ្លាំងក្រោយការធ្វើទំនើបកម្ម»។

ពាក់ព័ន្ធនឹងលើកឡើងនេះ លោក ប៉ុង ដែល្លា នាយកគ្រប់គ្រងទូទៅនៃក្រុមហ៊ុន AGB Consulting ព្រមទាំងជាអ្នកជំនាញផ្នែកធនធានមនុស្សដល់ល្បីឈ្មោះនៅកម្ពុជាមួយរូប បានបង្ហាញការគាំទ្រចំពោះដំណឹងនេះ ព្រោះដើម្បីជាការជំរុញឱ្យសិស្ស-និស្សិតដែលភាគច្រើនជាយុវជនចាប់អារម្មណ៍សិក្សាលើជំនាញបច្ចេកទេស និងវិជ្ជាជីវៈ ដែលកំពុងមានតម្រូវការខ្ពស់ក្នុងទីផ្សារការងារនៅកម្ពុជាទាំងបច្ចុប្បន្ន និងអនាគត។

ហេតុនេះលោកថា ការព្យាយាមបញ្ចូលនូវបច្ចេកវិទ្យា ដែលពាក់ព័ន្ធ នឹងវិស័យសំណង់ស៊ីវិល នឹងឈានទៅ ធានាដល់ការអភិវឌ្ឍលើវិស័យនេះ ខណៈតម្រូវការកម្មករ ជំនាញនៅក្នុងវិស័យនេះនៅតែមានតម្រូវការខ្លាំង។នេះតាមបទពិសោធន៍ក្នុងការបំពេញកាងារក្នុងវិស័យជ្រើសរើសបុគ្គលិកនាពេលកន្លងមក។

យ៉ាងណាដើម្បី NTTI ក្លាយជាមជ្ឈមណ្ឌលស្រាវជ្រាវ និងច្នៃប្រឌិតបច្ចេកវិទ្យាលើវិស័យវិស្វកម្មសំណង់ស៊ីវិលប្រព្រឹត្តិដើយរលូន ក្រសួងការងារ បានលើកទឹកចិត្តដល់សាស្រ្តាចារ្យ នៅក្នុងវិទ្យាស្ថានជាតិបណ្តុះបណ្តាលបច្ចេកទេសត្រូវខិតខំបន្តការអប់រំ បណ្ដុះបណ្ដាល និងលើកទឹកចិត្តឱ្យសិស្ស និស្សិត ត្រូវខិតខំសិក្សារៀនសូត្រតាមជំនាញរបស់ខ្លួន ធ្វើយ៉ាងឱ្យវិទ្យាស្ថានជាតិមួយនេះក្លាយជាគ្រឹះស្ថាននាំមុខមួយ ក្នុងការបណ្ដុះបណ្ដាលបច្ចេកទេស និងវិជ្ជាជីវៈ របស់ក្រសួងការងារ និងបណ្ដុះបណ្ដាលវិជ្ជាជីវៈ ទាំងប្រព័ន្ធគ្រប់គ្រង សមត្ថភាពគ្រូបណ្ដុះបណ្ដាល និងគុណភាពរបស់សិស្ស-និស្សិត សិក្ខាកាម៕