ក្រុមហ៊ុនភ្នាក់ងារអចលនទ្រព្យលំដាប់ពិភពលោកចំនួន៥ កំពុងឈរជើងក្នុងទីផ្សារកម្ពុជា
ភ្នំពេញ៖ ក្រុមហ៊ុនភ្នាក់ងារអចលនទ្រព្យលំដាប់អន្តរជាតិចំនួន៥ បាននឹងកំពុងប្រតិបត្តិការអាជីវកម្មរបស់ខ្លួនដើម្បីផ្តល់សេវាកម្មលក់-ជួល សេវាកម្មវាយតម្លៃ ក៏ដូចជាសេវាកម្មប្រឹក្សាយោបល់ជាដើម ក្នុងទីផ្សារអចលនទ្រព្យនៅកម្ពុជា ស្របពេលដែលសក្តានុពលវិស័យមួយនេះកំពុងបង្ហាញអនុភាពនៃការចម្រើនជាវិជ្ជមាន។ រហូតមកដល់បច្ចុប្បន្នមានក្រុមហ៊ុនបម្រើសេវាកម្មក្នុងទីផ្សារអចលនទ្រព្យសរុប ១០៧ក្រុមហ៊ុនហើយ ដែលបានចុះបញ្ជីចូលជាសមាជិករបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ហើយសមាគមនេះត្រូវបានបង្កើតឡើងក្រោមការផ្តួចផ្តើមរបស់ក្រសួងសេដ្ឋកិច្ច និងហិរញ្ញវត្ថុ។ ក្នុងចំណោមក្រុមហ៊ុនទាំងអស់នោះ ភាគច្រើនជាក្រុមហ៊ុនក្នុងស្រុក ហើយក៏មានវត្តមានក្រុមហ៊ុនភ្នាក់ងារអចលនទ្រព្យលំដាប់ពិភពលោកចំនួន៥ ផងដែរ កំពុងប្រកួតប្រជែងក្នុងការផ្តល់សេវាកម្មក្នុងទីផ្សារអចលនទ្រព្យនៅកម្ពុជា។ 
Century 21 ជាក្រុមហ៊ុនភ្នាក់ងារអចលនទ្រព្យដែលមានមូលដ្ឋាននៅសហរដ្ឋអាមេរិក បានឈានជើងចូលទីផ្សារកម្ពុជាកាលពីខែកញ្ញា ឆ្នាំ២០១៤ ប្រតិបត្តិការតាមរយៈការទិញសិទ្ធអាជីវកម្មបន្ត (Franchise) នាំចូលដោយក្រុមហ៊ុនក្នុងស្រុក VTRUST ដែលមានលោក គុយ វ៉ាត ជាអគ្គនាយក និង ជានាយកប្រតិបត្តិនៃក្រុមហ៊ុន Century 21 Cambodia។ លោក គុយ វ៉ាត បានលើកឡើងថា ការទិញសិទ្ធិអាជីវកម្មក្រុមហ៊ុនអចលនទ្រព្យដ៏ធំរបស់អាមេរិកមួយនេះ ដើម្បីបង្កើនកម្រិតនៃជំនាញភ្នាក់ងារអចលនទ្រព្យក្នុងទីផ្សារកម្ពុជា ក៏ដូចជាការប្រកួតប្រជែងកម្រិតជំនាញអន្តរជាតិ ហើយដើម្បីអាចធ្វើការក្នុងទីផ្សារពិភពលោកបាន។ ក្រុមហ៊ុន Century 21 Real Estate ត្រូវបានបង្កើតឡើងក្នុងឆ្នាំ ១៩៧១ ហើយបច្ចុប្បន្នបានក្លាយជាក្រុមហ៊ុនដែលត្រូវបានគេទទួលស្គាល់ច្រើនជាងគេបំផុតនៅលើពិភពលោក ដោយមាន ៧.៤៥០ ការរិយាល័យនៅក្នុង ៧៩ប្រទេស។ ក្រុមហ៊ុននេះបានផ្តល់នូការបណ្តុះបណ្តាលគ្រប់ជ្រុងជ្រោយ និងការជួយទ្រទ្រង់ជាយុទ្ធសាស្រ្តទីផ្សារ ដល់បណ្តាញក្រុមហ៊ុនដែលទិញសិទ្ធិអាជីវកម្មរបស់ខ្លួននៅទូទាំងពិភពលោក។ 
លោក គុយ វ៉ាត អគ្គនាយកក្រុមហ៊ុន Century 21 Cambodia ក្រុមហ៊ុនភ្នាក់ងារអចលនទ្រព្យមួយទៀតក៏មានមូលដ្ឋាននៅសហរដ្ឋអាមេរិកដែរ គឺក្រុមហ៊ុន Keller Williams Cambodia ដែលទទួលបានសិទ្ធិធ្វើអាជីវកម្មពីក្រុមហ៊ុន Keller Williams ហើយរំពឹងត្រៀមបើកដំណើជាផ្លូវការនៅកម្ពុជានៅដើមឆ្នាំ ២០១៩នេះ។ លោក បណ្ឌិត គីម ហ៊ាង ដែលជាអ្នកទិញសិទ្ធិអាជីវកម្មពីក្រុមហ៊ុន Keller Williams មកប្រតិបត្តិការនៅកម្ពុជា បានលើកឡើងថា៖ “វត្តមានក្រុមហ៊ុន Keller Williams Cambodia នឹងជួយរុញវិស័យអចលនទ្រព្យនៅកម្ពុជាអោយឡើងមួយកំរិតទៀត ព្រមទាំងដាក់កំហិតក្នុងការធ្វើអាជីវកម្មផ្នែកអចលនទ្រព្យ ដោយគោរពតាមច្បាប់របស់ កម្ពុជាអោយបាន ១០០ភាគរយ។” លោកបណ្ឌិត គីម ហ៊ាង បានគូសបញ្ជាក់ថា៖ “Keller Williams Cambodia នឹងបើកសាខាអោយបានគ្រប់ខេត្ត ស្រុក ឬខណ្ឌអោយបានយ៉ាងតិច៣៦ទីតាំង នៅត្រឹមឆ្នាំ ២០២៩។ 
លោកបណ្ឌិត គីម ហ៊ាង តំណាងក្រុមហ៊ុន Keller Williams Cambodia បង្កើតឡើងដំបូងនៅឆ្នាំ ១៩៧០ នៅសហរដ្ឋអាមេរិក ក្រុមហ៊ុន ERA Real Estate ក៏បានឈានជើងចូលទីផ្សារកម្ពុជាដែរកាលពីដើមឆ្នាំ ២០១៨ ប្រតិបត្តិការតាមរយៈ ERA Cambodia។ ក្នុងបទសម្ភាសន៍ផ្តាច់មុខមួយជាមួយ KHB Media លោក ខន គង្គា នាយកប្រតិបត្តិក្រុមហ៊ុន ERA Cambodia បានថ្លែងឲ្យដឹងថា ក្រុមហ៊ុន ERA មានលក្ខណៈពិសេសជាងគេមួយក្នុងចំណោមក្រុមហ៊ុនភ្នាក់ងារអចលនទ្រព្យដែលលក់សិទ្ធធ្វើអាជីវកម្មល្បីៗនៅលើពិភពលោក ពោលលក្ខណៈពិសេសនោះគឺក្រុមហ៊ុនមានការប្រើប្រាស់បចេ្ចកវិទ្យាមុនគេក្នុងវិស័យអចលនទ្រព្យ។ បើតាមការលើកឡើងរបស់លោក គង្គា ក្រុមហ៊ុន ERA មាន ២.២៥០ នៅទូទាំង ៣៣ ប្រទេសលើសកលលោក ក្នុងនោះមានជាង ១០ ប្រទេសក្នុងតំបន់អាស៊ី-ប៉ាស៊ីហ្វិក។ លោកបន្តថា៖ "វត្តមានរបស់ក្រុមហ៊ុនភ្នាក់ងារអចលនទ្រព្យអន្តរជាតិនៅក្នុងទីផ្សារអចលនទ្រព្យនៅកម្ពុជា មិនមែនជាការដណ្តើមចំណែកទីផ្សារជាមួយក្រុមហ៊ុនភ្នាក់អចលនទ្រព្យក្នុងស្រុកនោះទេ តែជាការរួមចំណែកចំពោះការអភិវឌ្ឍក្នុងវិស័យនេះ។" 
ការិយាល័យប្រតិបតិ្តការរបស់ ក្រុមហ៊ុន ERA Real Estate នៅតំបន់អាស៊ី ប៉ាស៊ីហ្វិច ក្រៅពីក្រុមហ៊ុនភ្នាក់ងារអចលនទ្រព្យអន្តរជាតិដែលបានរៀបរាប់ត្រួសៗខាងលើនេះ ក៍នូវមានវត្តមានក្រុមហ៊ុនធំផ្សេងៗទៀតដែរ តួយ៉ាងដូចជាក្រុមហ៊ុន CBRE មានមូលដ្ឋាននៅសហរដ្ឋអាមេរិក បានឈានជើងចូល ក្នុងទីផ្សារអចលនទ្រព្យនៅកម្ពុជាក្នុងអំឡុងឆ្នាំ ២០០៨ ខណៈដែលក្រុមហ៊ុន Knight Frank ដែលមានមូលដ្ឋាន នៅទីក្រុង London ចក្រភពអង់គ្លេសបានចាប់ផ្តើមប្រតិបត្តិការនៅកម្ពុជាក្នុងឆ្នាំ ២០០៨ដែរ។ ភាពរីកចម្រើនក្នុងវិស័យអចលនទ្រព្យបានហុចផលដល់ក្រុមហ៊ុនដែលកំពុងបម្រើសេវាកម្មក្នុងវិស័យមួយនេះ តាមរយៈការទទួលបាននូវប្រាក់កម្រៃជើងសារ ដែលគេតែងហៅថា កុំមីសុង (commission)។ ហើយប្រាក់កម្រៃជើងសារនេះត្រូវបានកំណត់ដោយច្បាប់ជាអប្បរមា ៣ភាគរយ នៃតម្លៃអចលនទ្រព្យសរុបនៅពេលដែលមានកិច្ចព្រមព្រៀងទិញ-លក់។ ចំណែកឯ ការដាក់ជួលតាមរយៈភ្នាក់ងារវិញ ត្រូវបង់ថ្លៃកម្រៃជើងសារអាស្រ័យលើរយៈពេលនៃការជួលជួល។ ពោលប្រសិនបើរយៈពេលនៃការជួលតិចជាងមួយឆ្នាំថ្លៃកម្រៃជើងសាគឺអាស្រ័យ ទៅតាមការព្រមព្រៀងគ្នារវាងម្ចាស់អចលនទ្រព្យ និងភ្នាក់ងារ ហើយក្នុងលក្ខខណ្ឌនេះគឺមិនមានកម្រៃជើងសារជាក់លាក់នោះទេ។
