សមាគមអ្នកវាយតម្លៃអចលទ្រព្យជ្រើសរើសក្បាលម៉ាស៊ីនដឹកនាំថ្មីនៅពាក់កណ្តាលខែធ្នូនេះ
សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានកំណត់ថ្ងៃបោះឆ្នោតជ្រើសរើសប្រធានសមាគម និងក្រុមប្រឹក្សាភិបាលនាអាណត្តិទី៦ សម្រាប់ឆ្នាំ ២០១៩-២០២០ ដែលនឹងត្រូវធ្វើឡើងនៅថ្ងៃទី ១៤ខែធ្នូខាងមុខនេះហើយ។
ការជ្រើសរើសរើសប្រធានថ្មីធ្វើឡើងបន្ទាប់ពីអាណតិ្តទី៥នៃសមាគមនេះដែលដឹកនាំដោយលោក បណ្ឌិត គីម ហ៊ាង បានដឹកនាំជាប្រធាននៃសមាគមពីរអាណត្តិជាប់ៗគ្នា ហើយនឹងត្រូវបញ្ចប់នៅនៅចុងឆ្នាំនេះ ដើម្បីផ្តល់ឱកាសដល់អ្នកដឹកនាំថ្មី បន្តវេនដឹកនាំនាវាវិស័យអចលនទ្រព្យអោយកាន់តែរីកចម្រើន។
សម្រាប់អាណត្តិនេះបេក្ខជនបីរូបដែលជាអ្នកគ្រប់គ្រងក្រុមហ៊ុនអចលនទ្រព្យធំៗនៅកម្ពុជាបានឈរឈ្មោះជាបេក្ខភាពប្រធានសមាគម CVEA ហើយបេក្ខជនម្នាក់នឹងត្រូវបានជ្រើសរើសជាប្រធានដឹកនាំក្នុងអាណត្តិថ្មីនេះតាមរយៈការបោះឆ្នោតពីសមាជិករបស់សមាគមដែលមានជាង ១០០ក្រុមហ៊ុននាពេលបច្ចុប្បន្ន។ បេក្ខភាពប្រធានទាំងបីនោះរួមមានលោក ច្រឹក សុខនីម នាយកប្រតិបត្តិក្រុមហ៊ុន Mekong Brokerage Co., Ltd លោក វ៉ន ចាន់ថន នាយកប្រតិបត្តិក្រុមហ៊ុន Town City Real Estate Co., Ltd និងលោក សុត វីរៈ នាយកប្រតិបត្តិក្រុមហ៊ុន Huttons CPL Co., ltd។
ក្រោយការប្រកាសលទ្ធផលនារសៀលថ្ងៃទី១៤ ខែធ្នូ ទាំងប្រធាន និងប្រធានក្រុមប្រឹក្សាភិបាលនៃសមាគម CVEA ដែលទើបជាប់ថ្មីនឹងត្រូវឡើងសម្តែងមតិបេជ្ញាចិត្តចំពោះតួនាទីរបស់ខ្លួនក្នុងការដឹកនាំសមាគមសម្រាប់អាណ្តត្តិថ្មីនេះ។
លោក ច្រឹក សុខនីម នាយកប្រតិបត្តិក្រុមហ៊ុន Mekong Brokerage ដែលជាបេក្ខភាពប្រធានសមាគម CVEA ក្នុងអាណត្តិថ្មីនេះ បានសរសេររៀបរាប់តាមបណ្តាញសង្គមកាលពីម្សិលមិញថា មានភារកិច្ចប្រាំយ៉ាងដែលអ្នកដឹកនាំត្រូវធ្វើមានដូចជា៖ ទី១) បង្កើតយុទ្ធសាស្ត្រនិងដឹកនាំការអនុវត្តឱ្យបានសម្រេចជោគជ័យ, ទី២) កសាង និងពង្រឹងសមត្ថភាព, ទី៣) បម្រើគាំទ្រ និងការពារសមាជិក, ទី៤) បង្កើត និងផ្តល់ឱកាសដល់សមាជិក និងទី៥) សម្របសម្រួលនិងដោះស្រាយបញ្ហាដែលសមាជិកប្រឈម ឬជួបប្រទះ។
បច្ចុប្បន្នសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានសមាជិកជាង១០០ក្រុមហ៊ុន។ សមាគមនេះត្រូវបានបង្កើតដំបូងនៅខែ សីហា ឆ្នាំ ២០០៨ ដែលមានឈ្មោះដើមថា «សមាគមអ្នកវាយតម្លៃអចលនវត្ថុ កម្ពុជា» ( NVAC ) ក្រោមការជួយជ្រោមជ្រែងពីឯកឧត្តម គាតឈន់ អតីតរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ។ ហើយត្រូវបានប្តូរឈ្មោះមកជា«សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នៅថ្ងៃទី០៧ ខែមេសា ឆ្នាំ២០១១»។
សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាមានបេសកកម្មបង្កើនទំនុកចិត្តដល់សមាជិកក្នុងសមាគម និងសាធារណជនតាមរយៈការផ្តល់នូវបទពិសោធន៍ ជំនាញនិងក្រមសីលធម៌វិជ្ជាជីវៈច្បាស់លាស់ទាក់ទងនឹងវិស័យអចលនវត្ថុនៅកម្ពុជា។ ក្នុងអាណត្តិទី១ និងទី ២ សមាគមនេះត្រូវបានដឹកនំាដោយលោក ស៊ឹង ប៉ុណ្ណា អគ្គនាយកក្រុមហ៊ុនប៉ុណ្ណា រៀលធីគ្រុប ហើយលោកឧកញ៉ា ចេង ខេង អគ្គនាយកក្រុមហ៊ុនកម្ពុជា ស៊ីភីអិល បានជាប់ជាប្រធានក្នុងអាណត្តិទី៣ដោយឡែកអាណត្តិទី៤ និងទី៥ ត្រូវបានដឹកនាំដោយលោកបណ្ឌិត គីម ហ៊ាងដែលនឹងត្រូវបញ្ចប់នៅខែធ្នូនេះ៕