ក្រុមហ៊ុនចិនធំមួយដាក់ផែនការ១០ឆ្នាំវិនិយោគអចលនទ្រព្យនៅកម្ពុជា ចាយទុន១០ពាន់លានដុល្លារ
ស្របពេលដែលវិស័យសំណង់ និងអចលនទ្រព្យ កំពុងមានការរីកចម្រើន ក្រុមហ៊ុន Prince Real Estate Group បានប្រកាសដាក់ចេញជាផែនការយុទ្ធសាស្រ្តរយៈពេល១០ឆ្នាំខាងមុខ វិនិយោគលើវិស័យអចលនទ្រព្យនៅកម្ពុជា។ ការប្រកាសរបស់ក្រុមហ៊ុនអភិវឌ្ឍអចលនទ្រព្យរបស់ចិនដ៏ធំមួយនេះ បានធ្វើឡើងក្នុងពិធីសម្ពោធបញ្ជប់ការសាងសង់គ្រោងអគារទីស្នាក់ការកណ្តាលរបស់ខ្លួនកាលពីចុងសប្តាហ៍កន្លងទៅនេះ ហើយផ្សារភ្ជាប់នឹងការដាក់ចេញផែនការដែលមានទស្សនៈវិស័យវែងឆ្ងាយនេះផងដែរ ក្រុមហ៊ុនបានអះអាងថាខ្លួនបានជ្រើសរើសកម្ពុជា ធ្វើជាទីតាំងយុទ្ធសាស្រ្តស្នូល ក្នុងន័យពង្រីកវិសាលភាពអាជីវកម្ម ជាមួយនឹងទុនបម្រុង (Reserve capital) ដែលមានទំហំរហូតដល់ ១០ ពាន់លានដុល្លារអាមេរិក។ នេះបើយោងតាមការចេញផ្សាយរបស់ទីភ្នាក់ងារសាពត៌មានកម្ពុជា។ 
លោក Li Min នាយកប្រតិបត្តិក្រុមហ៊ុន Prince Real Estate បានថ្លែងឲ្យដឹងកាលពីខែអំឡុងខែ កញ្ញាកន្លងទៅនេះថា វត្តមានបីឆ្នាំនៅកម្ពុជារបស់ក្រុមហ៊ុនលោក បានចាយទុនប្រមណជាង ២ ពាន់លានដុល្លារអាមេរិក សម្រាប់ការវិនិយោគលើវិស័យអចលនទ្រព្យនៅកម្ពុជា។ 
លោក Li Min នាយកប្រតិបត្តិក្រុមហ៊ុន Prince Real Estate Cambodia លោក Li Min បានគូសបញ្ជាក់ថា ទំហំទុនវិនិយោគនេះក្រុមហ៊ុនបានទិញដីទុករាប់លានម៉ែត្រការ៉េ ដើម្បីអភិវឌ្ឍនៅថ្ងៃអនាគត។ ក្នុងនោះដែរ ក្រុមហ៊ុនបានទិញដីទុកនៅរាជធានីភ្នំពេញប្រមាណជាង ៣០ ម៉ឺនការ៉េ និងខេត្តដែលមានសក្តានុពលផ្សេងៗទៀត ដូចជាខេត្តព្រះសីហនុជាដើម។ គួររំលេចផងដែរថា ក្រុមហ៊ុន Prince Real Estate កន្លងមកក៏បានទិញយកអគារដែលមានការអភិវឌ្ឍន៍ស្រាប់ដូចជា Phnom Penh Tower (កម្ពស់ ២២ ជាន់) អគារខុនដូ Diamond One (កម្ពស់ ១៤ ជាន់) និងគម្រោងមួយចំនួនទៀតដែលក្រុមហ៊ុនអភិវឌ្ឍរួចរាល់ និងកំពុងអភិវឌ្ឍដូចជា Prince Central Plaza (កម្ពស់៣៧ជាន់ បានបើកដំណើការ), អគារ Prince Modern Plaza (កម្ពស់២៧ជាន់ កំពុងសាងសង់), Prince International Plaza (កម្ពស់១២ ជាន់កំពុងសាងសង់)។ ចំណែកសណ្ឋាគារលំដាប់ផ្កាយប្រាំ Prince Times Hotel មាន១៩៧ បន្ទប់ បានបើកដំណើការរួចរាល់ និងគម្រោងអភិវឌ្ឍន៍ចម្រុះ Prince Tian Xi Wan កំពុងដំណើការសាងសង់ ហើយគម្រោងទាំងពីរស្ថិតនៅក្នុងខេត្តព្រះសីហនុ។ 
អគារ Phnom Penh Tower ក្រោយការគ្រប់គ្រងដោយក្រុមហ៊ុន Prince Real Estate ឆ្លើយតបទៅនឹងទស្សនៈវែងឆ្ងាយចំពោះការវិវត្តលើវិស័យសំណង់ និងអចលនទ្រព្យនៅកម្ពុជា លោក ឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL បានថ្លែងប្រាប់សារពត៌មានក្នុងស្រុកមួយកាលពីតុលាកន្លងទៅនេះ ថា សន្ទុះនៃការរីកចម្រើនលើវិស័យអចលនទ្រព្យមិនមែនមានតែនៅរាជធានីភ្នំពេញទេ ពោលគឺភាពរីកចម្រើនក្នុងវិស័យនេះកំពុងកើតឡើងក្នុងខេត្តដែលមានសក្តានុពលមួយចំនួន។ លោកឧកញ៉ា ចេង យល់ឃើញថាវិស័យអចលនទ្រព្យនៅកម្ពុជានៅតែបន្តមានភាពរីកចម្រើននាពេលអនាគត៕
