សណ្ឋាគារវ័យចំណាស់ Raffles នឹងត្រូវស្ថាបនាឡើងវិញ ក្រោយលក់ឲ្យក្រុមហ៊ុនវៀតណាម

សណ្ឋាគារ Raffles Le Royal​ និង​សណ្ឋាគារ Siem Reap’s Grand Hotel d’Angkor ជាសណ្ឋាគារមានវ័យចំណាស់ជាងគេ​នៅកម្ពុជា ដែលនឹងត្រូវបានស្ថាបនាឡើង​វិញនៅត្រីមាសទី ២​ ក្នុង​ឆ្នាំ២០១៩​ ។ នេះបើយោងតាមសេចក្តីប្រកាសពត៌មានរបស់ក្រុមហ៊ុន Lodgis កាលពីម្សិលមិញនេះ។​​ មានមូលដ្ឋាននៅសិង្ហបុរី ក្រុមហ៊ុន​​ Lodgis គឺជាការវិនិយោគរួមគ្នារវាងក្រុមហ៊ុន​សិង្ហបុរី  Warburg Pincus និង​ក្រុមហ៊ុនវៀតណាម​ Vinacapital ដែលបានទិញយក​សណ្ឋារគារ​ទាំងពីរនេះកាលពីដើមខែ កក្កដា​ ឆ្នាំ២០១៨​ ។​​ រយៈពេលប្រមាណជាង​​បីខែក្រោយពីការប្រកាសទិញសណ្ឋាគារទាំងពីរ ក្រុមហ៊ុន Lodgis បានប្រកាសស្ថាបនាឡើងវិញដោយរក្សានូវរចនាបថដើមរបស់សណ្ឋាគារទាំងពីរនេះ។​ សណ្ឋាគារ Raffle Le Royal ដែលស្ថិតនៅរាជធានីភ្នំពេញ សណ្ឋាគារ​​ Raffles Hotel Le Royal ស្ថិត​ក្នុង​រាជធានីភ្នំពេញនឹងត្រូវបានស្ថាបនាឡើងវិញជាបីដំណាក់កាលដោយចាប់ផ្តើមនៅ ខែ មេសា ឆ្នាំ២០១៩​ ហើយគ្រោង​នឹង​បញ្ចប់ទាំងបីដំណាក់កាលនៅ ឧសភា ឆ្នាំ២០២០។ ក្នុង​អំឡុងពេលស្ថាបនា សណ្ឋារគារនេះត្រូវបានគេអះអាងថានៅបើកដំណើរការធម្មតា ខណៈដែលសណ្ឋាគារ Raffles Grand Hotel d’Angkor ស្ថិតក្នុងខេត្តសៀមរាបនឹងត្រូវផ្អាកដំណើរការ​ដើម្បីធ្វើការស្ថាបនា ដោយចាប់ផ្តើមនៅដើមខែ ឧសភា ​រហូតដល់ចុងខែតុលា​ ឆ្នាំ២០១៩។​ គួររំលេចផងដែរថា ក្រុមហ៊ុន Warburg Pincus និងក្រុមហ៊ុន VinaCapital បានបោះទុនរួមគ្នាក្នុងទំហំទឹកប្រាក់ ៣០០​ លានដុល្លារអាមេរិក ដើម្បីបង្កើតក្រុមហ៊ុន  Lodgis នេះឡើងនៅអំឡុងឆ្នាំ២០១៦។ បច្ចុប្បន្ន​ ក្រុមហ៊ុននេះបានអភិវឌ្ឍន៍រីសតមួយចំនួន និងបានទិញយកសណ្ឋាគារ Sofitel Legen Metropole ក្នុង​ប្រទេសវៀត​ណាម។ ​ដោយសំលឹងឃើញសក្តានុពលវិស័យទេសចរណ៍នៅកម្ពុជា​ ក្រុមហ៊ុនវិនិយោគរួមគ្នាមួយនេះ​ បានឈានជើងចូលទីផ្សារកម្ពុជា ដោយផ្តោត​លើការអភិវឌ្ឍបដិសណ្ឋារកិច្ច ដោយបានទិញយកសណ្ឋាគារ Raffles ទាំងពីរនៅកម្ពុជានៅដើមខែ កក្កដា ខណៈទំហំប្រាក់នៃការ​ទិញយកសណ្ឋាគារទាំងពីរនេះមិនត្រូវបានបង្ហាញនោះទេ។ សណ្ឋាគារ Raffles Le Royal​ នាពេលបច្ចុប្បន្នមាន ១៧៥ បន្ទប់ ខណៈដែល​សណ្ឋាគារ Siem Reap’s Grand Hotel d’Angkor មានសរុប ១១៩ បន្ទប់​។ សណ្ឋាគារទាំងពីរនេះ ត្រូវបានសាងសង់ឡើងដំបូងនៅទសវត្សរ៍ ១៩៣០​ ​ហើយត្រូវបានស្ថាបនា និងដំណើរការឡើងវិញនៅឆ្នាំ ១៩៩៧ ដោយប្រតិបត្តិការក្រោមម៉ាកយីហោ ‘Raffles’ ដែលគ្រប់គ្រងដោយក្រុមហ៊ុនបារាំង ACCOR Hotels​៕ សណ្ឋាគារ Raffle Le Royal សណ្ឋាគារ Siem Reap’s Grand Hotel d’Angkor ដែលស្ថិតនៅសៀមរាប សណ្ឋាគារ Siem Reap’s Grand Hotel d’Angkor ដែលស្ថិតនៅសៀមរាប