កំណើនប្រាក់កម្ចីតាមធនាគារទៅលើវិស័យអចលនទ្រព្យជាកត្តាលីកររុញកំណើនវិស័យសេវាធានារ៉ាប់រង
ដោយសារមានផលប៉ះពាល់ បណ្តាលមកពីគ្រោះអគ្គិភ័យទៅលើរោងចក្រ និងលំនៅឋាន វាបានជំរុញឲ្យសេវាកម្មធានារ៉ាប់រងលើអចលនទ្រព្យកើនឡើងនាប៉ុន្មានឆ្នាំចុងក្រោយនេះ។ ទន្ទឹមនេះ អ្នកជំនាញផ្នែកធានារ៉ាប់រងនៅកម្ពុជា លើកឡើងថា សព្វថ្ងៃនិន្នាការប្រើប្រាស់ធានារ៉ាប់រងលើអចលនទ្រព្យពីសំណាក់ជនបរទេសច្រើនជាងតម្រូវការពីប្រជាពលរដ្ឋក្នុងស្រុក។
អគ្គនាយកក្រុមហ៊ុនធានារ៉ាប់រងកម្ពុជា ហ្វតតេ (Forte Insurance) និងជាប្រធានក្រុមប្រឹក្សាក្រុមហ៊ុនធានារាប់រងអាយុជីវិត លោក យក់ ចំរើនឬទ្ធិ បានប្រាប់ KHB News ថា កំណើនសេដ្ឋកិច្ច ព្រមទាំងមានកត្តាហានិភ័យនានាអាចកើតមានជាយកថាហេតុ បានកើនឡើងច្រើនជាបន្តបន្ទាប់ ដែលធ្វើឲ្យចំនួននៃតម្រូវការប្រើប្រាស់សេវាកម្មធានារ៉ាប់រងលើវិស័យអចលនទ្រព្យកើនឡើង។ ជាក់ស្តែង សម្រាប់ធានារ៉ាប់រងលើអចលនទ្រព្យ នៅឆ្នាំ២០១៩នេះ ក៏មានការកើនឡើងប្រមាណ១៥% បើធៀបនឹងឆ្នាំ២០១៨កន្លងទៅ។
លោកបាននិយាយថា បច្ចុប្បន្នសេវាកម្មធានារ៉ាប់រងលើវិស័យអចលនទ្រព្យគេសង្កេតឃើញថា មានតម្រូវការកើនឡើងជាបន្តបន្ទាប់រៀងរាល់ឆ្នាំ ខណៈដែលប្រជាជនខ្មែរចាប់ផ្តើមយល់ដឹងកាន់តែទូលំទូលាយ ពីសារប្រយោជន៍នៃការទិញសេវាកម្មធានារ៉ាប់រង។ លោកបន្តថា ប្រសិនបើអ្នកខ្ចីប្រាក់ពីធនាគារកើនច្រើននោះវានឹងធ្វើឲ្យ កំណើននៃសេវាធានារ៉ាប់រងក៏កើនឡើងដែរ។
អ្នកជំនាញលើវិស័យធានារ៉ាប់រងរូបនេះ បានឲ្យដឹងទៀតថា សេវាធានារ៉ាប់រងលើអចលនទ្រព្យមានដូចជាសំណង់អគារខ្ពស់ៗ សំណង់លំនៅឋាន ភោជនីយដ្ឋាន រោងចក្រ សណ្ឋាគារ និងស្ថានីយប្រេងឥន្ធនៈជាដើម។ លោកឲ្យដឹងថា នៅរយៈពេលពីរទៅបីឆ្នាំជាប់ៗគ្នានេះ អចលនទ្រព្យប្រទេសកម្ពុជា បានទទួលរងផលប៉ះពាល់យ៉ាងខ្លាំងពីគ្រោះអគ្គិភ័យ និងគ្រោះធម្មជាតិ ហេតុនេះធ្វើឲ្យមានការប្រើប្រាស់សេវាធានារ៉ាប់រង ទៅលើបញ្ហានេះកើនឡើងផងដែរ។
ប៉ុន្តែយ៉ាងណា លោកថា វិស័យធានារ៉ាប់រងលើវិស័យអចលនទ្រព្យកម្ពុជា នៅតែទទួលបានការគាំទ្រប្រើប្រាស់ពីសំណាក់ជនបរទេសច្រើនជាងពលរដ្ឋក្នុងស្រុក ដោយសារតែពលរដ្ឋខ្មែរមួយចំនួន មិនទាន់មានចំណេះដឹង ពីវិស័យធានារ៉ាប់រងបានទូលំទូលាយនៅឡើយ ដែលចាំបាច់ ទាមទារឲ្យមានការផ្សព្វផ្សាយបន្ថែមទៀត។
លោកបណ្ឌិត គីម ហ៊ាង ប្រធានក្រុមហ៊ុន ខ្មែររៀលអ៊ីស្ទេត និងជាប្រធានក្រុមហ៊ុន KW Cambodiaធ្លាប់មានប្រសាសន៍ថា សេវាកម្មធានារ៉ាប់រងអចលនទ្រព្យលើលំនៅឋានដ្បិតតែមិនទាន់រីកចម្រើនខ្លាំងក៏ពិតមែន ប៉ុន្តែវាផ្តល់អត្ថប្រយោជន៍យ៉ាងច្រើនចំពោះសេដ្ឋកិច្ចដូចជា បញ្ហាអគ្គិភ័យ គ្រោះធម្មជាតិ ទឹកជំនន់ ខ្យល់ព្យុះ និងអាចជួយរំងាប់អារម្មណ៍ដល់ការរស់នៅរបស់ប្រជាពលរដ្ឋឲ្យមានសន្តិភាពផ្លូវចិត្តផងដែរ។
អ្នកជំនាញអចលនទ្រព្យរូបនេះ បានលើកឡើងថា សេវាកម្មធានារ៉ាប់រង ក៏ជាការជួយរក្សាឲ្យមានការវិនិយោគនៅប្រទេសកម្ពុជា និងក៏ជាការទាញយក ប្រាក់ចំណូលចូលរដ្ឋតាមរយៈការកាត់ពន្ធលើប្រាក់ចំណេញពី ក្រុមហ៊ុននានាដែលមានអាជីវកម្មលើវិស័យធានារ៉ាប់រងនេះ។ មិនតែប៉ុណ្ណោះវិស័យមួយនេះថែមទាំងជួយឲ្យប្រជាជនខ្មែរយើងមាន ការងារធ្វើកាន់តែច្រើនផងដែរ ។
យោងតាមរបាយការណ៍ស្តីពីវឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០១៩ និងទស្សនវិស័យឆ្នាំ២០២០ របស់ធនាគារជាតិនៃកម្ពុជា ដែលបានចេញផ្សាយកាលថ្មីៗឲ្យដឹងថា កំណើនប្រាក់កម្ចីក្នុងវិស័យធនាគារជាតិបានកើនឡើងមកវិញ បន្ទាប់ពីបានថយចុះនារយៈពេលបីឆ្នាំកន្លងទៅ ដោយសារមានកំណើនប្រាក់បញ្ញើ២៥% និងប្រាក់កម្ចី២៦%។ មានកត្តាជំរុញចម្បងដោយសារមានកំណើនឥណទាន ទៅកាន់វិស័យសំណង់ និងអចលនទ្រព្យ ។
ធនាគារជាតិនៃកម្ពុជា បានឲ្យដឹងថា ការកើនឡើងនៃប្រាក់ចំណូល តម្រូវការ និងភាពសម្បូរបែបនៃសេវាហិរញ្ញវត្ថុ ឥណទានសម្រាប់ការប្រើប្រាស់បានកើនឡើងនាប៉ុន្មានឆ្នាំចុងក្រោយនេះ ដូចជា ឥណទានសម្រាប់ ទិញទំនិញបើប្រាស់ប្រាស់ និងលំនៅឋានសម្រាប់ស្នាក់នៅ។ កត្តាទាំងនេះ ក៏បានជួយជម្រុញឲ្យមានការប្រើប្រាស់សេវាធានារ៉ាប់រងលើវិស័យអចនទ្រព្យកម្ពុជា កើនឡើងផងដែរ។
យោងតាមរបាយការណ៍ពីក្រសួងសេដ្ឋកិច្ច និង ហិរញ្ញវត្ថុ បានបង្ហាញកាលពីពេលកន្លងទៅថា នៅឆ្នាំ ២០១៨ ឧស្សាហកម្មធានារ៉ាប់រងនៅកម្ពុជា មានការកើនឡើងនៅក្នុងរយៈពេល ៧ ឆ្នាំ ចុងក្រោយនេះ ហើយបុព្វលាភដុលក៏បានកើនឡើងផងដែរពី ៣០ លានដុល្លារ កាលពីឆ្នាំ ២០១១ និងកើនដល់ជាង ១៩៦ លានដុល្លារ កាលចុងឆ្នាំ ២០១៨ កន្លងទៅ៕
