ក្រសួងរៀបចំដែនដី៖ការផ្លាស់ប្តូរអគារទីស្តីការថ្មី នឹងជួយពន្លឿនការងារកាន់តែមានប្រសិទ្ធភាពជាងមុន
ភ្នំពេញ៖ អគារទីស្តីការថ្មីរបស់ក្រសួងរៀបចំដែនដី នគរូបនីយកម្ម និងសំណង់ ចាប់ផ្ដើមដំណើរការការដ្ឋានសាងសង់ជាផ្លូវការ នាថ្ងៃទី២៨ ខែមករានេះ ដែលមានទីតាំងជាប់នឹងច្រកចេញចូលទីក្រុងរណបហ្ក្រេនភ្នំពេញអន្តរជាតិ។ ចំណែកឯអគាររបស់ក្រសួងសព្វថ្ងៃនៅជាប់មហាវិថីព្រះមុនីវង្សនឹងត្រូវប្រគល់ឱ្យទៅ មន្ទីររៀបចំដែនដី នគរូបនីយកម្ម និងសំណង់។
នាឪកាសនោះ លោក ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា អគារទីស្តីការក្រសួងរៀបចំដែនដី នគរូបនីយកម្ម និងសំណង់ថ្មី ដែលបានចាប់ផ្តើមសាងសង់ឡើងនេះ មានទីតាំងស្ថិតនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ ដែលស្ថិតនៅជាប់នឹងខាងជើងខ្លោងទ្វារក្រុងរណបហ្ក្រេនភ្នំពេញអន្តរជាតិ នាភាគខាងជើងនៃរាជធានី ជាតំបន់កំពុងមានការអភិវឌ្ឍខ្លាំងផ្នែកលំនៅឋាន។
លោកបានឲ្យដឹងបន្តថា មូលហេតុដែលក្រសួងសម្រេចប្តូរទីតាំងទីស្តីការក្រសួងថ្មីនេះ ដោយសារតែ អគារទីស្ដីការរបស់ក្រសួងរៀបចំដែនដី នគរូបនីយកម្ម និងសំណង់សព្វថ្ងៃនៅជាប់មហាវិថីព្រះមុនីវង្ស ជាកន្លែងមានការកកស្ទះចរាចរណ៍ រាល់ថ្ងៃដោយសារទីតាំងចង្អៀតគ្មានកន្លែងចតរថយន្តក្រោមដី។
ចំណែកមន្ទីររៀបចំដែនដី នគរូបនីយកម្ម និងសំណង់រាជធានីភ្នំពេញ ក៏ស្ថិតនៅជាប់ខាងក្រោយរបង ក្រសួងនេះដែរ។ មិនតែប៉ុណ្ណោះ ឯកសារសុរិយោដី(Hard Copy) នាប៉ុន្មានឆ្នាំចុងក្រោយ បានកើនឡើងច្រើនដល់កម្រិតតោនដែលពិបាកគ្មានកន្លែងទុកដាក់ឲ្យបានត្រឹមត្រូវ ដែលជាហេតុធ្វើឲ្យមានការរាំងស្ទះដល់ការបំពេញការងារកន្លងមក។
ហេតុនេះ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានបង្ហាញក្តីរំពឹងទុកថា ការផ្លាស់ប្តូរអគារទីស្តីការក្រសួងថ្មី នឹងជួយពន្លឿនការងារក្នុងវិស័យដីធ្លី និងសំណង់កាន់តែមានប្រសិទ្ធភាព និងគុណភាពខ្ពស់ជាងមុន។
ពាក់ព័ន្ធនឹងការលើកឡើងនេះដែរ លោក រស់ វិច្ចិកា ជាអាជីវករ ដែលរស់នៅក្បែរគម្រោងសាងសង់ ទីស្តីការក្រសួងថ្មី បានសម្តែងក្តីរីករាយចំពោះវត្តមានអគារនេះ។លោករំពឹងថា វត្តមានទីស្តីការ ក្រសួង នឹងកាន់តែធ្វើឲ្យតំបន់នេះកាន់តែអ៊ូអរ មុខជំនួញលោកកាន់តែរីកចម្រើន ពិសេសជួយលើកស្ទួយជីវភាពរស់នៅរបស់ប្រជាពលរដ្ឋនៅតំបន់នោះផងដែរ។
ស្របជាមួយគ្នានោះ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានសម្តែងការគាំទ្រចំពោះវត្តមានអគារទីស្តីការក្រសួង ដែលមានលក្ខណៈធំទូលាយជាមុននេះ ដែលវានឹងជួយពន្លឿនការងាររបស់ក្រសួងកាន់តែរលូនជាងមុន។ បន្ថែមពីនេះ វិស័យអចលនទ្រព្យនៅតំបន់នេះ ក៏កាន់តែមានសក្តានុពល ខណៈបច្ចុប្បន្នតម្លៃដីនៅតំបន់នេះ មានតម្លៃចន្លោះចាប់ពី ៦០០ដល់២០០០ដុល្លារ ក្នុងមួយម៉ែត្រទៅហើយនោះ។បន្ថែមពីនេះ លោកក៏បង្ហាញការគាំទ្រក្រសួងដែនដី ដែលបានគិតគួរសំណង់ទីស្តីការក្រសួង បានបញ្ចូលជាលក្ខណៈរចនាបទខ្មែរផងដែ។
គួរបញ្ជាក់ថា អគារទីស្តីការនេះមានកម្ពស់៥ជាន់ សាងសង់នៅលើផ្ទៃដីទំហំ៣ ហិកតាមានផ្ទៃក្រឡាសំណង់សរុប ៤៩ ៣៨៩ ម៉ែត្រក្រឡា និងក្រឡាផ្ទៃប្រើប្រាស់សរុបប្រមាណ២៦ ៥៦៧ ម៉ែត្រក្រឡា មានផលធៀបក្រឡាផ្ទៃបាតសំណង់ ៣២.៥៣ភាគរយ។ មិនតែប៉ុណ្ណោះ អគារថ្មីនេះនឹងមានចំណតរថយន្តប្រមាណ ៤៥០ កន្លែង និងសាលបដិសណ្ឋារកិច្ច អាហារដ្ឋាន សម្រាប់មន្រ្តីបុគ្គលិក និងលម្ហសួនកណ្តាលអគារ សាលប្រជុំតូចៗ មាន៣០០នាក់ ១៥០ នាក់ និង សាលសន្និបាតចំណុះ ១ ៥៨៤ នាក់ កន្លែងតម្កល់ឯកសារសុរិយោដី និងរដ្ឋបាល សាលបច្ចេកវិទ្យា មន្ទីរពិសោធន៍ជាតិសំណង់ បន្ទប់សិក្សាបណ្តុះបណា្តលវិជា្ជជីវៈ បណ្ណាល័យ កន្លែងកីឡា។
បន្ថែមពីនេះ អគារទីស្តីការក្រសួងថ្មីនេះមានរចនាបថខ្មែរ រចនាលម្អដោយបុស្បុកប្រាំពីរថ្នាក់ ដំបូលហោជាងមុខដាច់ ប្រកបដោយក្បូរក្បាច់ពិពិតវិចិត្ររចនា ដែលក្រុមការងារប្រមូលផ្តុំសិក្សាចង់លើកស្ទួយនូវសា្នដៃ លម្អស្ថាបត្យកម្មបុរាណខ្មែរ ។ ដោយឡែកប្លង់បាតមានលម្ហសួនក្នុងអគារ។
មិនតែប៉ុណ្ណោះ សំណង់នេះជាផ្នែកមួយដ៏សំខាន់ក្នុងការបង្ហាញអត្តសញ្ញាណខ្មែរ និងទម្រង់ស្ថាបត្យកម្មខ្មែរ ក្នុងសមយ័តេជោដែលបងា្ហញពីសន្តិភាព ស្ថិរភាព ការវិវឌ្ឍ និងសង្គ្រោះសំណង់ប្រភេទនេះឱ្យរស់ឡើងវិញជាសំណង់របស់រដ្ឋទុកតជំនាន់! ក្រសួងថា ទីស្តីការក្រសួងដនស សព្វថៃ្ងរាជរដ្ឋាភិបាលបានប្រគល់ឱ្យមន្ទីរដនសរាជធានីវិញ។បើតាមការលើកឡើងបន្ថែមពីសំណាក់ លោក ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់៕