ឥណ្ឌាចំណាយ ៤៣០ លានដុល្លារ សង់រូបសំណាកខ្ពស់ជាងគេលើលោក
ក្រោយចំណាយពេលសាងសង់ជាង ៤ ឆ្នាំ ឥណ្ឌាសម្ពោធរូបសំណាកមេដឹកនាំឯករាជ្យប្រចាំប្រទេស ដែលមានកំពស់ជិត ២០០ ម៉ែត្រ។ យោងតាមគេហទំព័រព័ត៌មានអន្តរជាតិ BBC បានឱ្យដឹងថា រូបសំណាកនេះមានឈ្មោះថា Statue of Unity មានកម្ពស់ ១៨២ ម៉ែត្រ និង ទម្ងន់ប្រមាណ ៦៧.០០០តោន ដែលអាចទប់ទល់បានជាមួយ នឹងការរញ្ជួយដី និង ខ្យល់បក់បានយ៉ាងល្អ។ ការសាងសង់ ត្រូវបានប្រើបន្ទះសំរិតប្រមាណ ១២.០០០ បន្ទះ ទម្ងន់ ១.៨៥០ តោន ត្រូវបានប្រើនៅផ្នែកខាងក្រៅ និង ប្រើកម្លាំងពលកម្មជាង ២.០០០ នាក់ រួមជាមួយកម្មករមកពីចិនរាប់រយនាក់ដើម្បីសម្រេចចេញជារូបរាង។ រូបសំណាកខ្ពស់ជាងគេនេះ ស្ថិតលើដីទំហំជាង ២០ម៉ឺនម៉ែត្រក្រឡា ស្ថិតនៅកោះ Sadhu Island ភាគខាងលិចរដ្ឋ Gujarat ប្រទេសឥណ្ឌា ព័ទ្ធជុំវិញដោយទឹកទន្លេ Narmada ទំហំ ១២ គីឡូម៉ែត្រការ៉េ។ វាត្រូវបានរចនាដោយស្ថាបត្យករ Joseph Menna ដោយបានចាប់ផ្តើមសាងសង់កាលពីចុងឆ្នាំ២០១៣ និង ត្រូវបានស្ថាបនាឡើងដើម្បីជាកិត្តិយសដល់មេដឹកនាំឯករាជ្យ លោក Sardar Vallabhbhai Patel។ ប្រធានាធិបតីឥណ្ឌា លោក Narendra Modi បាននិយាយថា រូបសំណាក់នេះនឹងដើរតួជាអ្នកទាក់ទាញភ្ញៀវទេសចរដ៏សំខាន់មួយ ហើយក៏ជានិមិត្តរូបនៃសុច្ចរិតភាព និងដំណោះស្រាយផងដែរ។ ដោយឡែកប្រជាជនក្នុងតំបន់បានលើកឡើងថា នេះជាការខ្ជះខ្ជាយថវិកា ដែលចំណាយគួរតែត្រូវបានប្រើឱ្យល្អជាងនេះ។ តាមរបាយការរដ្ឋាភិបាលនៃរដ្ឋ Gujarat បានឱ្យដឹងថា ការសាងសង់ត្រូវបានចំណាយលើសពីប្រាក់មូលនិធិ សម្រាប់សាងសង់រូបសំណាក់ ដែលថវិកាទាំងនោះបានមកពីរដ្ឋាភិបាលសហព័ន្ធ ឬ ជាការបរិច្ចាកសាធារណៈ។ តាមការសង្កេត បានឱ្យឃើញថា Statue of Unity មានកម្ពស់ខ្ពស់ជាងរូបសំណាក Statue of Liberty របស់សហរដ្ឋអាមេរិកដល់ទៅ ២ដង និងខ្ពស់ជាងរូបសំណាកព្រះពុទ្ធ Spring Temple Buddha នៅក្នុងប្រទេសចិនជិត ៣០ ម៉ែត្រ៕