ចិនជប៉ុនព្រមព្រៀងសហការ៥០គម្រោង
ដំណើរទស្សនកិច្ចរបស់លោកនាយករដ្ឋមន្ត្រីជប៉ុន ស៊ីនហ្សូ អាបេ ទៅកាន់ប៉េកាំងកាលពីថ្ងៃទី២៥ តុលា បាននូវមកផ្លែផ្កាយ៉ាងច្រើន ដោយមានគម្រោងហេដ្ឋារចនាសម្ព័ន្ធចំនួន៥០ ត្រូវបានចុះកិច្ចព្រមព្រៀង ដើម្បីអនុវត្តក្នុងប្រទេសទីបី ដោយចាប់ផ្ដើមពីទីក្រុងឆ្លាតវៃមួយក្នុងប្រទេសថៃនៅឆ្នាំក្រោយនេះ។ ទីក្រុងនេះនឹងស្ថិតនៅក្នុងខេត្ត Chonburi ដែលជាផ្នែកមួយនៃការអភិវឌ្ឍន៍ច្រករបៀងខាងកើត នៃប្រទេសថៃ។ វាពង្រីកតំបន់ឧស្សាហកម្មដែលមានស្រាប់ ដែលសាងសង់ដោយក្រុមហ៊ុន Amata របស់ថៃ និងក្រុមហ៊ុន Yokohama Urban Solution ជាក្រុមហ៊ុនឯកទេសអភិវឌ្ឍន៍ទីក្រុងបៃតង និងក្រុមហ៊ុនសំណង់ចិន JSCC។ ប្រហែល៧០% ក្នុងចំណោមរោងចក្រ៧០០នៅក្នុងតំបន់នេះ ជាក្រុមហ៊ុនរបស់ជប៉ុន។ ការចុះហត្ថលេខានេះធ្វើឡើងបន្ទាប់ពីកិច្ចព្រមព្រៀង រវាងក្រុមហ៊ុន Amata និងក្រុមហ៊ុន Yusa ដើម្បីអភិវឌ្ឍប្រព័ន្ធថាមពលឆ្លាតវៃមួយ សម្រាប់សួនឧស្សាហកម្ម ដែលបានចុះហត្ថលេខាកាលពីខែកក្កដា។ លោកអាបេ ជានាយករដ្ឋមន្ត្រីជប៉ុនទី១ ដែលបានធ្វើទស្សនកិច្ចផ្លូវការទៅកាន់ប្រទេសចិន ក្នុងរយៈពេល៧ឆ្នាំមកនេះ។ ដំណើរទស្សនកិច្ចនេះជាការបើកទំព័រសករាជថ្មីមួយ នៃកិច្ចសហប្រតិបត្តិការរវាងប្រទេសទាំងពីរ ក្រោយពីមានគម្រោងពី២០ ទៅ៣០គម្រោង ត្រូវបានចុះហត្ថលេខាកាលពីខែមុន។ តាំងពីនោះមក មហិច្ឆតារបស់ភាគីទាំងពីរកាន់តែមានការរីកចម្រើនឡើង។ គម្រោង៥០បូកនេះ ដែលត្រូវបានចុះហត្ថលេខានៅពេលលោកអាបេ ទៅទស្សនាវេទិកាមួយ ស្ដីពីការវិនិយោគហេដ្ឋារចនាសម្ព័ន្ធនៅទីក្រុងប៉េកាំង គឺជាកិច្ចព្រមព្រៀងក្នុងចំណោម៥០០គម្រោង ដែលបានគ្រោងឡើងនៅក្នុងអំឡុងទស្សនកិច្ចពាណិជ្ជករចំនួន១.៤០០នាក់ ពីប្រទេសទាំងពីរ។ ចិនសង្ឃឹមថា ការសហការជាមួយជប៉ុននឹងបន្ថយការរិះគន់ដែលថា ផ្លូវមួយ ខ្សែក្រវាត់របស់ខ្លួន កំពុងបង្ខំឱ្យប្រទេសតូចៗធ្លាក់ទៅក្នុងបំណុលលើសកម្រិត។ ឯផ្នែកឯកជនជប៉ុនក៏ស្វាគមន៍ ចំពោះការបញ្ចប់នូវសម្ពាធប្រកួតប្រជែង ពីសហគ្រាសគ្រប់គ្រងដោយរដ្ឋរបស់ចិន ដែលតែងតែមានប្រៀបក្នុងដេញថ្លៃគម្រោងមូលនិធិ។