គម្រោងកីឡាដ្ឋាន eSport ធំបំផុតក្នុងលោក
ដើម្បីឆ្លើយតបទៅនឹងតម្រូវការនៃកីឡាកុំព្យូទ័រ ដែលជាទីផ្សារមួយកំពុងមានការរីកចម្រើនលឿនបំផុតរបស់ពិភពលោក ក្រុមហ៊ុន eSports ដែលមានមូលដ្ឋាននៅទីក្រុងឡុងដុង នៃប្រទេសអង់គ្លេស និង ក្រុមហ៊ុន Gfinity Plc និងក្រុមហ៊ុន Ove Arup & Partners Ltd បានប្រកាសបង្កើតភាពជាដៃគូ ដើម្បីរៀបចំកីឡាដ្ឋានអេឡិចត្រូនិកចម្រុះនាំមុខគេលើពិភពលោក សម្រាប់អ្នកទស្សនា និងការផ្សាយផ្ទាល់ការប្រកួត។ នេះបើយោងតាមគេហទំព័រ Global Construction Review។ 
ក្រុមហ៊ុនទាំងពីរបានរួមបញ្ចូលជំនាញ និងធនធានរបស់ខ្លួន ដើម្បីអភិវឌ្ឍគម្រោងដ៏ធំមួយនេះ សម្រាប់ការលេងកីឡាអាជីព ការទស្សនា ការហ្វឹកហាត់ ការសិក្សា និងការផ្សាយផ្ទាល់ ដែលនឹងអាចឲ្យអ្នកលេងកីឡាគ្រប់កម្រិតទាំងអស់មកប្រមូលផ្ដុំគ្នា ដើម្បីចែករំលែកបទពិសោធន៍ និងប្រកួត នៅកីឡដ្ឋាន eSports ចម្រុះទំនើបឈានមុខគេបំផុតលើពិភពលោក។ eSports គឺជាទីផ្សារសកលដ៏ធំ ដែលមានចំនួនអ្នកទស្សនាប្រមាណ៣៧០លាននាក់ កើនឡើង១៧% ក្នុងមួយឆ្នាំ ហើយរំពឹងថា នឹងមានចំណូល១ពាន់លានដុល្លារ។ កាលពីការប្រកួតវគ្គផ្ដាច់ព្រ័ត្រ នៃ League of Legends World Championship ឆ្នាំ២០១៦ បានទាក់ទាញអ្នកទស្សនា៤៣លាននាក់ ដែលមានអ្នកទស្សនាបានឈ្នះប្រាក់រង្វាន់១លានដុល្លារ។ 
យោងតាមលោក Chris Dite ជានាយករង នៃក្រុមហ៊ុន Arup បានឱ្យដឹងថា គំនូសប្លង់ស្តាត eSport នេះក៏នឹងផ្ដល់ឱ្យអ្នកលេង និងអ្នកគាំទ្រ អាចទទួលបានផ្នែកខ្លះនៃជីវិត ដូចជាការសិក្សា កន្លែងហាត់ប្រាណ និងមជ្ឈមណ្ឌលអាហារូបត្ថម្ភ។ គម្រោងនេះនឹងផ្ដល់នូវកន្លែងមួយលើសពីការរំពឹងទុក សម្រាប់កីឡាករអាជីព កីឡាករស្ម័គ្រចិត្ត និងអ្នកគាំទ្រ នៅក្នុងបរិយាកាសរីករាយ និងមានសុវត្ថិភាព។ លោក Garry Cook ជាប្រធានប្រតិបត្តិ នៃក្រុមហ៊ុន Gfinity បានមានប្រសាសន៍ថា "យើងនឹងទាញយកបទពិសោធន៍ ក្នុងការកាន់កាប់ និងគ្រប់គ្រងកីឡាដ្ឋាន eSports ដំបូងរបស់អឺរ៉ុបនៅក្នុងទីក្រុងឡុងដុង ហើយផ្សារភ្ជាប់ជាមួយសហគមន៍របស់យើង ដែលមានអ្នកលេង eSports និងអ្នកគាំទ្ររាប់លាននាក់"។ "គំនូសប្លង់ចុងក្រោយនឹងត្រូវបានជូនដំណឹង ក្រោយពីការបុកគ្រឹះរួច។ នេះគឺជាឧទាហរណ៍មួយថ្មីទៀត ដែលឧស្សាហកម្ម eSports មានភាពរំជើបរំជួល រីកចម្រើន និងពោរពេញដោយឱកាស"។ 
