លោក លឹម សុថាវ៖ សមត្ថភាពវិជ្ជាជីវៈវិស្វករកម្ពុជាគឺត្រូវតែដោះស្រាយមុនគេ
ភ្នំពេញ៖ បើតាមការសិក្សារបស់អង្កការជប៉ុន JICA ដែលធ្វើការនៅកម្ពុជា កាលពីពេលថ្មីៗនេះ បានឲ្យដឹងថា ចាប់ពីឆ្នាំ២០១៨-២០២០ កម្ពុជាត្រូវមានកម្លាំងវិស្វករប្រមាណ ៣៥,០០០នាក់ សម្រាប់បម្រើការងារក្នុងវិស័យឧស្សាហកម្ម កម្មន្តសាល សំណង់ កសិកម្ម សេវាកម្ម ទេសចរណ៍ និងអចលនទ្រព្យក្នុងប្រទេសរបស់ខ្លួន។
ទន្ទឹមនេះ គណៈវិស្វករកម្ពុជា បានលើកឡើងថា ដើម្បីឈានទៅសម្រេចចក្ខុវិស័យសម្រាប់ឆ្នាំ២០២០នេះ ការបង្កើនការផ្សព្វផ្សាយនិងបង្កើនសមត្ថភាពវិជ្ជាជីវៈដល់វិស្វករកម្ពុជាជារឿងសំខាន់របស់គណៈវិស្វករកម្ពុជា ដែលត្រូវតែដោះស្រាយមុនគេ។
អគ្គលេខាធិការគណៈវិស្វករកម្ពុជា លោក លឹម សុថាវ បានប្រាប់ KHB News ថា សម្រាប់យុទ្ធសាស្រ្តសំខាន់របស់គណៈវិស្វករកម្ពុជា ក្នុងឆ្នាំ២០២០នេះ គឺការជំរុញណែនាំដល់គណៈវិស្វករជាតិទាំងអស់ ត្រូវបណ្តុះបណ្តាល និងគ្រប់គ្រងវិស្វករដែលចុះបញ្ជីទូទាំងប្រទេស ឲ្យបានខ្លាំងក្លាជាងមុន ដើម្បីអភិវឌ្ឍន៍សមត្ថភាពជំនាញវិជ្ជាជីវៈរបស់ខ្លួន ប្រកបដោយស្តង់ដារជាតិ និងអន្តរជាតិ សំដៅជំរុញការអភិវឌ្ឍ និងកាត់បន្ថយភាពក្រីក្រ។
លោកប្រាប់ដល់គណៈវិស្វករកម្ពុជាយ៉ាងដូច្នេះថា «ត្រូវបន្តប្រមូលផ្តុំ បណ្តុះបណ្តាលបន្ត និងគ្រប់គ្រងវិស្វករចុះបញ្ជីទូទាំងប្រទេស ធ្វើយ៉ាងណាសំដៅអភិវឌ្ឍសមត្ថភាពជំនាញវិជ្ជាជីវៈ ឱ្យមានស្តង់ដាជាតិ និងអន្តរជាតិ ជំរុញការអភិវឌ្ឍ និងកាត់បន្ថយភាពក្រីក្រ»។
អគ្គលេខាធិការគណៈវិស្វករកម្ពុជា លោក លឹម សុថាវ អះអាងបន្តថា ដើម្បីសម្រេចចក្ខុវិស័យនេះ លោកក៏បានធ្វើការណែនាំ ដល់ក្រុមការងារថ្នាក់ខេត្ត ត្រូវជំរុញ និងផ្សព្វផ្សាយដល់ក្រុមវិស្វករជាតិ-អន្តរជាតិ ដែលកំពុងធ្វើអាជីវកម្មនៅកម្ពុជា ឲ្យមកចូលរួមធ្វើការចុះបញ្ជីឲ្យបានត្រឹមត្រូវ និងស្របច្បាប់ ដើមី្បទទួលស្គាល់គុណភាព របស់វិស្វករកម្ពុជា និងមានគោរម្យងារជាវិស្វករអាជីព ក្នុងគោលដៅអភិវឌ្ឍន៍ធនធានមនុស្ស ឲ្យស្របតាមតម្រូវការសង្គម។ ទាំងនេះ ក៏ដើម្បីឱ្យក្រុមវិស្វករទាំងអស់ ទទួលបានការបណ្តុះបណ្តាលវិជ្ជាជីវៈវិស្វកម្ម ក្នុងការបង្កើននូវចំណេះដឹង និងបច្ចេកទេសរបស់ខ្លួន បានមួយកម្រិតទៀតផង។
ពាក់ព័ន្ធនឹងការលើកឡើងនេះដែរ លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈវិស្វករកម្ពុជា ធ្លាប់បានអះអាងថា ដើម្បីសម្រេចកិច្ចការងារនេះ គណៈវិស្វករកម្ពុជា បានជំរុញឲ្យវិស្វករខ្មែរ និងវិស្វករបរទេសទាំងអស់ ដែលបម្រើការនៅកម្ពុជារួសរាន់មកចុះបញ្ជីជាមួយគណៈវិស្វករកម្ពុជា ដើម្បីក្លាយជាវិស្វករស្របច្បាប់ និងមិនប្រឈមទៅការផាក់វិន័យតាមប្រព័ន្ធផ្លូវច្បាប់ថែមទៀត។
បន្ថែមពីនេះ ក្នុងនាមជាប្រធានក្រុមប្រឹក្សាគណៈវិស្វករកម្ពុជា លោកក៏បានប្តេជ្ញានឹងបង្កើនការផ្សព្វផ្សាយឲ្យបានទូលំទូលាយដល់វិស្វករទាំងអស់នៅកម្ពុជា ដើម្បីឈានទៅទទួលបាននូវការបណ្តុះបណ្តាលពង្រឹងសមត្ថភាព បច្ចេកទេសគ្រប់ជំនាញ និងពង្រីកធនធានមនុស្ស ក្នុងការអភិវឌ្ឍសមត្ថភាពជំនាញវិជ្ជាជីវៈរបស់ខ្លួនកាន់តែរឹងមាំ។
សូមរំឭកថា គណៈវិស្វករកម្ពុជាត្រូវបានបង្កើតឡើងនៅឆ្នាំ២០០០ ដែលមានឈ្មោះដើមថា ស្ថាប័នវិស្វកម្មកម្ពុជា (ស.វ.ក) ដែលបង្កើតឡើងក្នុងគោលបំណងប្រមូលផ្តុំវិស្វករជាតិ ដើម្បីការពារផលប្រយោជន៍វិស្វករ និងលើកកម្ពស់សមត្ថភាព បញ្ញាវន្តវិស្វករជាតិ តាមរយៈការអភិវឌ្ឍសមត្ថភាពវិជ្ជាជីវៈ និងទំនាក់ទំនងការងារជូនសមាជិក ដែលមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាប្រធានកិត្តិយស។
គិតមកដល់បច្ចុប្បន្នកនេះ មានវិស្វករជាង៤ពាន់នាក់ហើយដែលបានចុះបញ្ជីនៅគណៈវិស្វករកម្ពុជាក្នុងនោះមាន៖ វិស្វករដំបូង, វិស្វករអាជីព, វិស្វករបរទេស, វិស្វករអាស៊ាន, វិស្វករអាជីពឆ្នើមអាស៊ាន, វិស្វករអាស៊ានវ័យក្មេង, និងវិស្វករកិត្តិយសអាស៊ាន។នេះបើតាមរយការណ៍ពីគណៈវិស្វករកម្ពុជា៕
